日本軍用手票
 |
日軍佔領香港後發行軍用手票（軍票）作日常流通之用。一開初兌換率係 軍票壹圓兌兩蚊港幣，後來改為軍票壹圓兌四蚊港幣。由1943年6月1日開始，港幣停止兌換軍票，軍票成為香港唯一流通嘅貨幣。根據日本銀行調查局係1974年出版嘅《日本貨幣畫冊：外地貨幣的發行》，日本總共係香港發行19億圓軍票。扣除由日軍同英軍收回銷毀嘅7億圓，留係香港民間入面嘅仲有12億圓。[1][2]
歷史
[編輯]係1941年12月25日「黑色聖誕節」日軍佔領香港之後，即刻宣布軍票作為香港流通貨幣，初期港幣同軍票一齊流通，啱岩開始時係1兌1，之後1942年1月規定軍票同港幣嘅兌換率為1兌2。當時港幣係以英鎊作為支持，匯率係1英鎊兌16港元，即係代表1圓軍票嘅背後可以兌0.13英鎊，呢個係日本軍國主義者掠奪資源嘅一個方法[3]。
其後於1942年7月，日軍再將港元貶值，改為1軍票兌4港元（1圓軍票兌0.25英鎊），令到更少人願意兌換軍票，但日軍宣布行政命令由1943年6月1 日起，規定軍票成為香港唯一合法嘅交易媒介，港幣同其他貨幣通通禁止流通，收埋港幣屬違法行為，藉此強逼市民交出港幣和外幣[4][5]。
日軍對香港經濟有嚴重嘅影響程度，日軍係清理外資銀行帳目時，曾迫滙豐銀行係冇『無息負債證明書』作擔保嘅情況下，發行鈔票[6][5]，軍票無限發行，不斷大幅貶值，而且無貴金屬或者外匯儲備做擔證，完全係由日軍任意印發，所以直到日本投降為止，香港人口只剩下60餘萬人，但總共有多達19億圓嘅軍票在香港流通。
1945年8月14日，日本投降，8月30日香港重光，港幣恢復為香港法定貨幣。9月24日，英國海軍上將夏慤（Adm Cecil Harcourt）領導嘅香港軍政府宣佈日本軍票無效，全部日本軍票即刻變廢紙[1]。英國重新接管香港之後，曾經計劃再次發行加蓋鈔票，諗住盡快取締軍票，不過因為港幣新鈔及得切運到香港，所以取消有關計劃[6]。
戰爭令香港經濟變差，濫發鈔票亦加據通脹；再加上香港人唔信任軍票嘅價值，收到軍票都會盡快轉手，呢個情況增加咗貨幣流通速度，都是物價上升嘅因素之一，形成惡性通貨膨脹。根據香港大學經濟學榮譽副教授陸炎輝博士 發表嘅文章，喺1941年底，香港一斤白米（英文版本為 a catty of rice[7]，即司馬斤，約0.6公斤）嘅價格約莫0.13港元，但四年後，即1945年中，價格已經上升到要100日圓軍票，如果用返1942年嘅兌換價 1日圓軍票兌換4港元嘅話，講緊一斤白米要400蚊港紙。實際上日本軍票其實唔應該兌到咁多港元，所以即使當1日圓軍票兌換0.4港元嘅話，一斤白米都要40蚊港紙。
根據香港政府發出嘅食米統計數字[8]，2025年每公斤嘅食米平均零售價大約係13-15蚊港紙左右，可想而知以1945年黎講，大米作為主要食糧嘅香港人有幾大負擔。
賠償問題
[編輯]日本大藏省（今財務省）係1945年9月16日宣佈所有軍票作廢，夏愨組成嘅香港軍政府其後宣佈禁止軍票流通[5]，令好多被占領國人一夜之間失去全部財產。1993年8月13日，香港軍票索賠委員會向東京地方法院提起訴訟，要求日本政府償還欠下香港百姓嘅軍票債務[9]。1999年6月17日，東京地方法院認同香港人係軍票問題上嘅痛苦遭遇，但因為日本冇相關賠償法而未有作出賠償判決[10]，日本政府亦以1951年《舊金山和約》自辯，話英國外相摩理臣同外交次官楊格係和談入面講左，確認香港唔會再追討日本賠償，但呢件事決定前冇曾諮詢過香港人[11]。追討亦最終係2001年10月被日本最高裁判所終審駁回[1]，至今手持軍票嘅香港人仍然拎唔返任何資產。[12]
成立於1882年的日本銀行是日本央行，日圓由其發行。軍票上印有「此票一到即換正面所開日本通貨」字句，而呢12億圓軍票係1945年終戰一刻，相當於至少有48億港元，參考日本銀行制定嘅戰前基準版企業商品價格指數（CGPI）換算，相當於2024年的3102億日圓，或153億港元（19.7億美元；144億元人民幣；645.7億元新台幣）[1]
香港目到目前為止仲有幾個民間團體向日本政府索償，當中最為人熟悉嘅係香港索償協會，協會會員包括3000個家庭，合共持有5億4千多萬元軍票，聲稱估算如果兌返做港幣，現時價值約有1千8百億港元[13]。
參考
[編輯]- 1 2 3 4 〈日本投降80週年：這群香港老人堅持向日本索賠軍票〉。《BBC News 中文》 (繁體中文)。2025-08-13。喺2025-11-25搵到。
- ↑ 香港史學會叢書編委會 (2011)。《香港歷史探究 EXPLORING THE HISTORY OF HONG KONG》 (PDF)。三 日治時期的香港（黑暗期）：香港史學會。頁 35–39。ISBN 978-988-17743-0-9。
- 1 2 〈香港還記得日圓軍票禍害嗎？ - HKU Business School〉 (香港中文)。2025-09-03。喺2025-11-26搵到。
- ↑ 〈日本軍用手票 (2)〉。sls.hkpl.gov.hk (香港中文)。喺2025-11-25搵到。
- 1 2 3 〈終戰70年：香港索賠日本軍票了無期〉。《BBC News 中文》 (繁體中文)。2015-08-14。喺2025-11-25搵到。
- 1 2 〈日佔時期的香港貨幣〉。www.hkmemory.hk (英文)。喺2025-11-25搵到。
- ↑ Man, Peonie (2025-09-03). "Do we still remember the military yen? - Impact Factors - HKU Business School" (美國英文). 喺2025-11-26搵到.
- ↑ 工業貿易署 (2025–11)。〈食米統計數字 (截至2025 年10 月31 日)〉 (PDF) (中文): 13–15。
{{cite journal}}: Cite journal requires|journal=(help);|chapter=ignored (help)CS1 maint: date format (link) - ↑ 〈香港索償協會〉。www.hkra2002.com。喺2025-11-25搵到。
- ↑ 〈香港軍票補償請求：控訴審（2）, 1999-2001, undated | CUHK Library Archival Collections〉。archives.lib.cuhk.edu.hk。喺2025-11-25搵到。
- ↑ 中文, BBC News (2025-08-15)。〈日本投降80週年：這群香港老人為何堅持向日本索賠「軍票」？〉。《TNL The News Lens 關鍵評論網》 (中文)。喺2025-11-26搵到。
- ↑ BBC News 中文 (2015-08-14)，《林彦斌与他的10万元日本军票》，喺2025-11-25搵到
- ↑ 鄭翠碧 (2018-08-15)。〈戰後軍票成廢紙 三千個家庭向三菱日聯銀行民事索償逾一千億港元〉。《香港01》 (香港中文)。喺2025-11-25搵到。