日頭、月光、塔莉亞

睡公主 插圖

《日頭、月光、塔莉亞》( Sole, Luna, e Talia ) 係由 Giambattista Basile （巴西萊）創作嘅「童話故事」，喺一六三六年作者死後出版，收錄喺《Pentamerone》入面。

巴西萊呢個版本（一六三六年）一般認為係現代「睡公主」故仔嘅源頭，即係後來大家熟悉嘅《La bella addormentata》。包括 Charles Perrault 喺一六九七年發表嘅版本，都係由呢個故事發展出嚟。

喺巴西萊嘅版本入面，而故事嘅更早源頭可以追溯到十四世紀嘅匿名小說《Perceforest》，嗌醒沉睡公主嘅唔係王子，而係一個國王。而且公主醒過嚟，並唔係因為一個吻，而係因為國王趁佢熟睡時對佢施暴。再者，呢位國王本身已經有老婆。佢喺侵犯公主之後，就離開咗受施咒嘅城堡，返去自己嘅王國。

呢個故事可以睇成一種「狹義童話」：雖然包含奇幻元素，但內容涉及破處、強暴、婚外情等主題，明顯唔係寫畀細路睇，而係寫畀當時嘅成年貴族讀者，反映咗作者作為拿坡里作家嘅創作背景同文化環境 。

故仔

有個國王生咗個女，叫塔莉亞。佢即刻召齊成個王國啲預言家入宮，叫佢哋幫個女預測將來。點知啲預言家話畀佢聽，話個女中咗詛咒，將來會遇到致命危險，而呢個危險就象徵住一條亞麻纖維。國王嚇到即刻下令，全國唔准有任何可能整傷公主嘅工具——唔准有亞麻、唔准有大麻，總之全部相關嘅嘢都禁晒。

不過塔莉亞大個咗之後，有一日見到個老婆婆拎住個紡錘喺城堡前面行過。佢好奇，就叫老婆婆上嚟睇下。點知佢一摸到個紡錘，就刺親手指，即刻死咗。國王傷心到不得了，只好將佢放喺城堡入面一間房，鎖晒所有門，然後永遠離開咗。

過咗一段時間，有另一個國王入森林打獵。佢見到呢座封死咗嘅城堡，好奇之下就強行打開門入去，見到公主好似瞓著咗咁。佢將公主抱上床，同佢發生關係之後就走返自己王國。九個月之後，塔莉亞生咗對孖仔。有兩個仙女照顧佢哋，幫手養大。有一日，兩個細路仔想搵媽媽食奶，搵唔到，就啜咗佢隻手指，竟然啜走咗條致命嘅亞麻纖維。塔莉亞即刻醒返，開始同兩個仔過新生活。

之後嗰個國王再返嚟城堡，見到塔莉亞醒咗，仲有兩個仔陪住佢。佢哋熟絡起上嚟，國王仲同佢哋一齊住咗幾日，臨走時答應塔莉亞會返嚟接佢。 國王返到自己城堡之後，日日都講住塔莉亞同對孖仔，仲幫佢哋改名叫「日頭」同「月光」。結果激嬲咗皇后——即係佢原本個老婆。皇后叫僕人將兩個細路帶嚟，仲命令廚師殺咗佢哋，煮嚟畀國王食，當係懲罰佢不忠。不過廚師見到兩個細路咁得意，唔忍心，就煮咗野味頂替，扮係啲孖仔嘅肉。皇后仲不停催國王食，話：「食啦食啦，全部都係你嘅！」國王唔知有暗示，只覺得老婆煩到爆，好嬲就走咗。

皇后怒火中燒，叫人將塔莉亞帶嚟城堡，仲下令要燒死佢。塔莉亞跪低求情，話死之前想除低身上啲衫。皇后貪佢啲衫上面啲珍珠，就答應咗。啱啱好國王趕到，知道晒成件事，即刻下令將皇后掟落火堆燒死，仲獎賞個廚師，封佢做宮廷首席紳士。最後國王娶咗塔莉亞做皇后，一家團聚。

故事最後就係童話式嘅結局：塔莉亞同老公、兩個仔幸福快樂咁生活落去。

睇埋

• 睡公主