易碎君
易碎君喺香港出世，而家住喺美國，以前喺香港讀過英皇書院。佢因為喺社交媒體度整辱包嘢，鬼鬼馬馬咁恥笑中共政權同埋佢哋嘅領導人習近平，結果十五歲嗰陣就畀國安警察查，警察仲搜咗佢部電腦同手機。[1][2]
易碎君靠佢嘅YouTube頻道「易碎品編年史」出咗名，佢透過YouTube同Discord咁嘅平台講啲同中國政府唔同嘅睇法，鬧佢哋啲政策同埋壓制言論。 佢個網名嚟自黃明志首歌《玻璃心》，首歌就係想恥笑啲小粉紅或者極端民族主義者對人哋批評好敏感嘅反應。[3]
經歷
[編輯]2021年9月，易碎君讀緊中學，開始接觸「公民及社會教育」呢科。呢科俾佢親身感受到啲外界認為係洗腦教育嘅嘢，反而刺激咗佢更加想參與網上恥笑同惡搞習近平嘅活動。[1]
2022年2月10號，香港警察拎住西九龍裁判法院嘅搜查令將易碎君帶到警察局，問佢關於佢兩個YouTube帳號同埋同乳透社有關嘅嘢。警方喺幾次約談度對佢施加壓力，要佢講出其他乳透社成員嘅資料。[2]呢次調查牽涉到一宗涉嫌煽動罪嘅案件，警方要求佢喺自己頻道嘅截圖上面簽名認罪[2] 仲沒收咗佢部電腦、手機咁嘅私人物品。[1]
2022年8月，易碎君離開咗香港，去咗美國尋求政治庇護。 雖然佢申請庇護冇成功，但根據美國法律，佢都攞到合法居留身份，而家同寄養家庭一齊住。同時，易碎君嘅屋企人都全部離開咗香港，搬去咗英國。[4]易碎君嘅經歷反映咗香港國安法實施之後對言論自由嘅壓制。佢喺接受採訪嗰陣話，好多後生仔因為政治局勢而選擇離開香港。[3]
2024年3月4號，阿龍（一個喺網上成立反共群組嘅14歲細路仔）嘅個人資料喺QQ同推特度畀人公開咗好多次，仲有個推特用戶話佢對阿龍進行咗為期一年嘅人肉搜索。阿龍由10歲開始就喺Roblox平台度整咗個叫「香港革命軍」嘅反共群組。[5]易碎君之後幫咗阿龍，協助佢去加拿大申請政治庇護。2024年3月16號，阿龍順利到達加拿大。[6]
2024年11月，易碎君喺47人案嘅國際聲援運動發言，講到其中一個被告係佢香港同學老豆。易碎君話，佢香港同學對判決感到沮喪，又話唔明點解為民服務都會俾人拉。佢覺得中共政權咁嘅行為係對民主嘅公開攻擊。[7]
2025年，易碎君參加咗FAPA-LA「228防止政府暴行研討會」，大洛杉磯台灣會館喺拆除重建之前嘅最後一場大型論壇活動，並與主講吳佳穎交流，了解228事件對台灣原住民嘅影響。易碎君都分享咗自己過往嘅經歷，同埋講解未來嘅計劃，又藉呢個機會發表「中國係民主陣營國家發展所面臨嘅最大威脅」嘅觀點。[8]
資料
[編輯]- ↑ 1.0 1.1 1.2 〈15歲港男惡搞習近平「慘遭政治迫害」 飛美求庇護仍有陰影：回不去了〉。《民視新聞網》 (中文)。2024-02-23。
- ↑ 2.0 2.1 2.2 〈遭警察上門調查 香港少年潤走美國 | 《九評共產黨》 | 時代革命 | 港版國安法 | 大紀元〉。《大紀元 www.epochtimes.com》 (繁體中文)。2023-06-03。喺2024-09-21搵到。
- ↑ 3.0 3.1 〈专栏 | 网络博弈: 香港少年易碎君、小维尼熊和言论自由(2)〉。《自由亞洲電台》 (中文)。2024-04-10。
- ↑ 〈【逃離新香港】香港國安法下的年輕受害者，易碎君的抗爭與流亡之路 | 教育系列 | 同文 Commons〉 (香港中文)。2024-01-06。原著喺2024-09-21歸檔。喺2024-09-21搵到。
- ↑ 〈專欄 | 網絡博弈: 稱建Roblox反共羣被開盒 香港少年赴加尋求政治庇護〉。《自由亞洲電台》 (中文)。2024-04-17。
- ↑ 〈因反共遭起底 香港少年被迫流亡加國 | 23條立法 | 小粉紅 | 團校 | 大紀元〉。《大紀元 www.epochtimes.com》 (繁體中文)。2024-03-25。喺2024-09-21搵到。
- ↑ 〈鄒家成黃碧雲楊雪盈余慧明上訴〉。
- ↑ 〈FAPA-LA「228防止政府暴行研討會」跨族裔參與〉。
