星島新聞集團發佈假新聞爭議

星島新聞集團係香港其中一個最大嘅傳媒機構，但旗下《星島日報》、《東周刊》同其他媒體，都曾經涉及發佈假新聞，之後被一啲事實檢查嘅機構揭發或反駁，以及備受一啲批評。

爭議列表

日期	涉事媒體	事件 / 議題	針對對象	詳情
2023年12月	《星島日報》	黎智英被控違反國安法案件	壹傳媒、黎智英	壹傳媒創辦人黎智英因為被指違反北京未經諮詢或香港人同意，強行訂立嘅《港版國安法》而被檢控，去到2023年12月，《星島日報》刊登假新聞，話黎智英申請海外證人視像作供被拒，但之後審理案件嘅法官杜麗冰澄清並無收到申請。有評論分析，釋出呢個消息係為咗刺激北京對付黎智英。
2024年1月	《星島日報》、《巴士的報》	2024年台灣總統選舉	賴清德	台灣總統大選前夕，有人指民進黨總統候選人賴清德疑似有私生子。身份不明嘅爆料者喺網上公開晒事件相關人士嘅姓名、地址等資料，仲附上一份所謂嘅「DNA報告」作證。亞洲事實查核實驗室（AFCL）其後訪問咗親子鑑定同基因測序方面嘅專家，兩位教授睇完網上流傳嗰份報告之後一致認為，份報告欠缺鑑定單位、簽署人等關鍵資訊，「可信度唔高」，完全唔能夠作為證據。不過，《星島日報》、《巴士的報》等多間媒體就未經查核就直接引用相關內容。
2025年11月	《東周刊》	蘇永康	蘇永康、馮翠珊	2025年11月，蘇永康畀《東周刊》抹黑，指佢同一位貌似「年輕版鄧麗欣」嘅女子有外遇，仲喺海邊被影到親密傾偈，之後十指緊扣離開。不過，後來有網民進行事實查核，發現《東周刊》刊登嘅脫脂奶包裝其實係十年前嘅設計，證明張相係喺大約十年前影，而相中女子正正就係蘇永康而家嘅太太馮翠珊。事件曝光後，《東周刊》被揭發造假，雖然迅速刪文撤稿，但並冇向蘇永康公開道歉。