普教中
用普通話教授中文科，簡稱「普教中」，廣義上屬於中國地方語言教學範疇，係香港特別行政區政府同語文教育及研究常務委員會（語常會）嘅推廣普通話政策，提倡以普通話取代粵語（廣東話）作爲中國語文科嘅主要教學語言（「主要」嘅意思，係指中文科嘅課堂用普通話做授課語言嘅比例超越50%），取代以粵語爲主嘅母語教學。
語常會由2008年起推出《協助香港中、小學推行「以普通話教授中國語文科」計劃》，撥款資助學校推行普教中。[1]喺語常會推出撥款計劃利誘之下，普教中學校嘅數量先至逐步上升。政府執意強行，花費巨額喺學校撥款、評估同調查上面。
由於教學成效存疑，香港教育局網頁亦都曾經承認「目前仍未有確實證據，證明以普通話學習中國語文的學生的一般中文能力會有所改善。其中兩項研究發現，以普通話學習的學生的中文能力，與以廣東話學習的學生並無分別，甚或表現更差。」部份中學接受教育局資助，改爲用普通話教授中文科，引起「推普廢粵」爭議。[2]
背景
[編輯]自從1997年香港主權移交之後，香港政府就以培育市民兩文三語（粵語、普通話同英語）能力作爲最主要嘅語文教育政策，中文包括粵語同普通話，都係學校課程嘅學習領域，而且中文課程教育改革一直成爲教育局嘅重點。早喺1999年，香港課程發展議會喺《香港學校課程嘅整體檢視報告》提出，要「在整體的中國語文課程中加入普通話的學習元素，並以『用普通話教中文』爲遠程目標。」。[3]但係喺當時環境度，要實行普教中有困難，所以並唔普及。2003年，語文教育及研究常務委員會（語常會）發表《語文教育檢討總結報告》，贊成香港課程發展議會嘅長遠展望，但同時強調應該進一步了解學校成功轉用教學語言嘅所需條件，防止造成負面後果之後，先至就全港學校採用普通話作爲中文科嘅教學語言製訂明確嘅政策同推行時間表。[4]
香港主權移交後其中一項重要嘅語文教育政策改變係由以往嘅英語教學，轉變爲母語教學，即係用粵語嚟教授中國語文科同埋各個主要科目，只係保留番百幾間中學實行英語教學，稱爲英文中學。不過，有啲教育界人士同學者認爲普通話教授中文科有優點，大多數支持「普教中」嘅人都認爲「普教中」一大優點係可以做到言文一致，即係口語就係普通話，書面語就係現代白話文，「普教中」可以令「聽、講、讀、寫」統一起嚟，減少俚語入文，減少受「粵語方言」、詞彙同語法影響，等學生掌握好「現代漢語」，行文更加流暢，提升學生書面語表達能力同普通話能力。而且現今中港交流日趨頻繁，同內地交往一定要講普通話，喺呢啲情況下，普教中支持者認爲普教中好重要。其次，支持者亦都認爲普教中可以建立國民身份認同，主張學習中國大陸嘅「規範語言」甚至做埋學習媒介語語，都係必然嘅事，可以加強國民身份認同，建立國家意識噉話喎。[5]
相反，粵教中支持者就認爲粵語對學習中文嘅好處有唔少，例如教授古代經典同文言文會比較押韻或者保留多啲古代漢語嘅特色（例如粵語保留中古漢語嘅入聲），學生容易吸收[6]。而香港一直用粵語嚟到做社會主導語言，喺缺乏社會實踐嘅情況，突然全面推行普教中，並唔可行，喺未有完善配套之下推行計劃，亦會帶嚟隱憂同局限，例如實行普教中時係咪有足夠具備普通話資格、通過語文基準試嘅教師，仲有欠缺配合普教中嘅教師培訓課程、欠缺適當嘅普教中教材等等問題。[5]
而且，尤其係十歲以下嘅學童，以日常生活學習為主，如果喺小學階段就施行「普教中」，唔識普通話嘅家長會無從入手，減少家庭教育，仲可能降低小朋友嘅閱讀理解能力。香港大學中文教育研究中心總監謝錫金進一步指出，目前香港中文教科書都用標準中文書寫，亦可以用廣東話朗讀。無論係對於中學定係小學學生，都冇研究數據證明以普通話學習中文可以改善寫作。如果要學生學好普通話，只要好好用課堂時間嘅10分鐘去讀，然後畀學生光碟返屋企聽，噉學生嘅粵語同普通話都可以好好，唔使作為教學語言。[7]所以喺2000-2002年度嗰陣，謝已經對語常會表明唔贊成「普教中」。
不過，雖然唔少學者反對，語常會依然由2008年推出「普教中支援計劃」，爲有意實行普教中嘅學校提供支援，分4期支援，總共支援咗160間學校，其中28間係中學。[4]
推行情況
[編輯]語常會分別喺2008/09、2012/13同2015/16學年進行「香港中、小學推行『以普通話教授中國語文科』概況調查」，喺呢3個年度有開設「普教中」班嘅學校比率如下：[4]
| 2008/09 | 2012/13 | 2015/16 | |
|---|---|---|---|
| 小學 | 55.5% | 70.4% | 71.7% |
| 中學 | 31.8% | 37.0% | 36.9% |
調查同時揭示2015/16學年小學同中學喺推行「普教中」嘅全面性。[4]
| 全面「普教中」 | 部分「普教中／粵教中」 | 全面「粵教中」 | |
|---|---|---|---|
| 小學 | 16.4% | 55.3% | 28.3% |
| 中學 | 2.5% | 34.4% | 63.1% |
根據港語學普教中學校資料庫Wayback Machine嘅版面存檔備份，全港有超過71%小學設普教中班別，當中有25%嘅學校已全面推行普教中。中學方面，約有25%中學設普教中班別。港語學指小六級全面推行普教中者從2014/15學年嘅161間下跌至2016/17年嘅148間[8]。一般普教中淨係喺中學初中實施，高中課程因應「中學文憑試」所需而定。直至2012年後，德育及國民教育科成爲爭議，之後普教中入面嘅國民教育成份，以及教學成效問題同影響，先至開始受到廣泛關注。
爭議
[編輯]法定語言
[編輯]教育局2014年1月24號喺網站刊登題目係《語文學習支援》文章，當中一段指：「雖然《基本法》規定中英雙語爲本港法定語言，但接近97%本地人口，包括部份香港新移民都以廣東話（一種不是法定語言的中國方言）作爲家居同日常交際的常用語言，而英語則多作商業用途。至於中華人民共同國的法定語言，普通話的使用日見普遍，反映內地同香港經濟同文化的緊密聯繫。」
文中指廣東話「非法定語言」，又指中國法定語言係普通話，引起好多港人不滿甚至憤怒，關注普通話教學嘅組織「港語學」就呢件事，以「粵語中文」去信時任教育局局長吳克儉，指出「喺語言學上大家視粵語爲語言，廣東話係粵語嘅標準語，定性爲『方言』有矮化粵語之嫌」，促請教育局澄清點解廣東話唔係法定語言。[9]
港語學發動一人一信促請教局澄清。事件經傳媒報道，教局罕有回應，承認有關「廣東話」嘅註釋出現「含糊不精準嘅地方」，對引起誤會「深表歉意」，將涉事原文「移除」。發動一人一信要求教育局澄清廣東話法定地位嘅「港語學」，批評教育局冇就廣東話係咪法定語言明確噉回應，而刪走網頁等同「毀屍滅跡」，要求當局要嚴正噉澄清；而《兩文三語正面睇》內文淨係話事件係「註釋引起嘅誤會」，批評當局兒戲。[10][11]
寫作表現
[編輯]2016年1月9號，前財政司司長梁錦松出席一個教育主題講座時，表示支持逐步實施普教中，仲發表一啲爭議性嘅言論。佢聲稱「學習普通話嘅人，會有更好嘅寫作表現」[12][13]。但係文學作家、香港浸會大學語文中心前副教授胡燕青駁斥佢，指廣東話可以幫助寫作，佢嘅學生入面，中文文章寫得最好嘅都係講廣東話嘅學生，「廣東人寫極好的文章者，大有人在」。[14][15]
質疑同問題
[編輯]用普通話教學中文科嘅成效同後果，遭到唔少學者同學生質疑[16][17][18]，亦有聲音反對將語言教學政治化同將原有教育矮化[19]，現時亦有唔少學校反對或唔推行普教中[20][21]。
鮮魚行學校退休校長話普教中同粵教中嘅差別唔大，但考慮香港係粵語城市，推行普通話教學對學生日常溝通幫助唔大，認爲應該取消呢項措施。香港大學中文教育研究中心名譽總監同樣認爲香港語境以粵語爲主，普教中令學生難喺日常生活應用中文[8]，亦有研究指普通話教育未見成功例子，現時研究指普教中對改善語文能力嘅成效唔大[22]，亦無明顯優勢，喺聽、說、寫方面成效更隨年級增加而遞减[23]。另外，國際教育成績評估協會「全球學生閱讀能力進展研究」顯示，「普教中」學生閱讀平均分，低過「粵教中」學生[24]。雖然係噉，香港政府已經投入大量資源推動普教中計劃。有聲音批評港府嘥咗成幾億、推行超過10年，都仲未可以爲普教中成效得出結論[25]。
睇埋
[編輯]參攷
[編輯]- ↑ 〈語文教育同研究常務委員會-推廣兩文三語-常見問題〉。原先內容歸檔喺2016-03-04。喺2015-07-18搵到。
- ↑ 〈教育局鬼祟删普教中壞處 網民：又撐普通話？〉。2014年2月8日。原先內容歸檔喺2015年7月22日。喺2015年7月18日搵到。
- ↑ 《教育局網頁：香港課程發展議會 - 香港學校課程嘅整體檢視報告》，原先內容歸檔喺2015-12-30，喺2015-10-12搵到
- ↑ 4.0 4.1 4.2 4.3 教育局 (2016年6月)。〈立法會教育事務委員會 2015年4月13日會議 就「以普通話教授中國語文科嘅政策」嘅跟進資料 立法會CB(4)1181/15-16(02)號文件〉 (PDF) (香港中文)。原先內容歸檔 (PDF)喺2019年8月15日。喺2018年10月7日搵到。
- ↑ 5.0 5.1 香港中文大學教育學院 (2008–09)。〈對「用普通話教中文」嘅反思〉。原先內容歸檔喺2018-10-07。喺2018-10-07搵到。
{{cite journal}}: Cite journal requires|journal=(help)CS1 maint: date format (link) - ↑ 〈普通話同世界：普教白話 粵教古文〉。《文匯報》。2016-07-05。原先內容歸檔喺2018-10-07。喺2018-10-07搵到。
- ↑ 〈港府推行「普教中」八年，為何父母仍憂心忡忡？〉。《端傳媒》。2016-11-28。原先內容歸檔喺2021-07-29。喺2022-07-27搵到。
- ↑ 8.0 8.1 〈普教中小學數目按年下跌 鮮魚行學校試行後取消〉。《蘋果日報》。2018-10-07。原先內容歸檔喺2018-10-07。喺2018-10-07搵到。 引用錯誤 Invalid
<ref>tag; name "apple181007" defined multiple times with different content - ↑ 〈教局指廣東話非法定語言〉。2014年2月2日。原先內容歸檔喺2015年10月3日。喺2015年10月12日搵到。
- ↑ 〈指廣東話非法定語言 教局道歉〉。2014年2月3日。原先內容歸檔喺2016年2月4日。喺2015年10月12日搵到。
- ↑ 〈涉貶廣東話 教局跪低道歉〉。2014年2月3日。原先內容歸檔喺2016年3月5日。喺2015年10月12日搵到。
- ↑ 〈指廣東話非法定語言 教局道歉〉。《蘋果日報》。2014年2月3日。原先內容歸檔喺2016年2月4日。喺2015年10月12日搵到。
- ↑ 〈壹週Plus：梁錦松贊成普教中 「唔係個個母語都係廣東話」〉。壹周Plus。2016年1月9日。原先內容歸檔喺2018年7月21日。喺2018年7月21日搵到。
- ↑ 〈梁錦松撑普教中 指可助寫作 胡燕青王永平齊反駁：廣東話會幫你學好中文〉。《立場新聞》。2016-01-10。原先內容歸檔喺2018-10-07。喺2018-10-07搵到。
- ↑ 〈駁斥梁錦松名作家撑廣東話係國寶：寫作最好嘅絕非普通話學生〉。《蘋果日報》。2016-01-10。原先內容歸檔喺2018-10-08。喺2018-10-07搵到。
- ↑ 【粵語非母語？】曾鈺成拆解：點止普教中咁簡單 指影響深遠 互聯網檔案館嘅歸檔，歸檔日期2018年6月13號，.明報新聞網 (新聞發布)-2018年5月9日
- ↑ 【七一遊行】9 歲小學生上街：反「普教中」 撐粵語 互聯網檔案館嘅歸檔，歸檔日期2018年7月21號，.立場新聞-2018年7月1日
- ↑ 【DSE狀元時事台】女拔狀元：對普教中有保留 聖保羅狀元：一地兩檢違基本法 互聯網檔案館嘅歸檔，歸檔日期2018年7月13號，.明報新聞網 (新聞發布)-2018年7月10日
- ↑ 「講廣東話等于港獨」係違反歷史同現實嘅亂扣帽子 互聯網檔案館嘅歸檔，歸檔日期2018年7月21號，.關鍵評論網-2018年6月28日
- ↑ 檢視普教中﹕課程不配合家庭欠配套德信「跳船」棄普教中 互聯網檔案館嘅歸檔，歸檔日期2018年7月21號，.明報-2018年4月23日
- ↑ 普教中7年後玫瑰崗高小轉回廣教中 互聯網檔案館嘅歸檔，歸檔日期2018年7月21號，.明報新聞網 (新聞發布)-2018年7月7日
- ↑ 研究揭普教中無明顯成效政府遲遲拒公布 互聯網檔案館嘅歸檔，歸檔日期2018年7月21號，.on.cc東網-2016年5月31日
- ↑ 〈語常會委託研究 報告：無明顯證據「普教中」促進中文學習〉。《香港01》。2016-05-31。原先內容歸檔喺2018-10-08。喺2018-10-07搵到。
- ↑ 國際報告指「普教中」學生閱讀力較低分楊潤雄：無關教學語言 互聯網檔案館嘅歸檔，歸檔日期2018年7月21號，.明報-2018年2月7日
- ↑ 【審計報告】政府逾2 億推普教中審計署：花多年研究成效仍無定論 互聯網檔案館嘅歸檔，歸檔日期2018年7月21號，. 立場新聞-2017年4月25日
連出去
[編輯]
- 〈【西貢、觀塘、深水埗區】 92間小學 普教、粵教中概覽〉。《Oh!爸媽》。2017-10-12。原先內容歸檔喺2018-06-12。喺2018-06-12搵到。
- 香港網絡大典：普教中爭議
- 港語學: 中文教學語言資料庫Wayback Machine嘅版面存檔備份