書帖

西式書帖例子，第一張紙一面係第16同第1頁，另一面係第2同第15頁

上面例子喺傳統印刷可能會拼成咁，三摺切開之後變16頁，注意上面嗰行（5､ 12､ 9､ 8）要掉轉印；反轉後面係 7､ 10､ 11､ 6 / 2､ 15､ 14､ 3

雷射印表機或類似機器輸出拼版例子；拼完版輸出之後首先叠埋，對齊，然後只摺一次

由13個書帖組成嘅一個書蕊（未加封面嘅西式 ｢鎖綫精裝書｣）

書帖（英文：signature，又叫 section），簡稱帖，係一種由一張或者一叠印好嘢嘅紙成組摺出嚟嘅結構，係構成用綫聯出嚟或者用釘書釘釘出嚟嘅實體書嘅基本部件；一個或以上嘅書帖會再釘裝成書。

書帖基本上係印刷同訂裝嘅嘢，但係因為平面設計亦會設計實體書，所以有時都要諗同佢有關嘅嘢。

西式訂裝

紙有底面，而西式書就算唔印兩面，底面都係唔同頁數，所以書帖嘅頁數一定係4嘅倍數。喺傳統西式印刷，一個書帖會係由單單一張嘅大紙摺出嚟，摺一次得出4頁，摺兩次8頁，摺三次16頁，摺四次32頁（但係通常唔會摺多過三次）。如果係用細紙（例如淨得雷射印表機或者類似嘅印細紙機器），亦可以每張紙淨係摺一次（除非版面好細）。

原則上，紙紋應該同書脊平行，呢點亦影響一張紙可以摺幾次。

因為摺出嚟會打亂頁數次序，印出嚟嘅 ｢大版｣ 一定要用睇落唔順序嘅頁數；點樣排個別頁面，等印好同摺好之後，喺書帖係啱次序，呢種工序叫拼版（粵拼：ping1 baan2）。

膠裝書理論上係由散頁組成，照計同書帖無關；但係實際上，印刷廠整膠裝書亦會先整書帖，然後用機切走書脊，先至落膠。除此之外亦有所謂穿綫膠裝同破脊膠裝，喺保留書帖結構嘅前提下用唔同嘅方法用膠釘埋啲帖。

中間大頁

喺西式訂裝，書帖最入便嗰張紙會有頁數連續嘅兩頁中間冇嘢隔住，呢兩頁夾埋叫中間大頁（英文：centre spread 或者 centre fold，中文又叫中心大頁）；因為呢兩頁根本係同一張紙，騎釘嘅雜誌可以用佢嚟印海報。

中式訂裝

中式嘅傳統綫裝書由一叠摺過一次嘅紙組成；呢啲摺過一次嘅紙，每張都亦算做係一個書帖。

書目

• 何錦隆編 (2012)。《英漢印刷及傳訊科技雙解詞典》 (PDF) (香港中文) (增訂版)。香港：香港印刷資源中心有限公司。喺2024年8月4號搵到。
• Ekrem, Erica (2018). Bound by Hand (美國英文). Union Square. 喺2025年7月4號搵到.
• London Centre for Book Arts (2018) [2017]. Making Books (英國英文). New York: Princeton Architectural Press.
• Sawyer, Brian (2011). "Create Signatures". DIY Bookbinding (美國英文). O’Reilly.