最後一個企到喺度嘅人

最後一個企到喺度嘅人（取自英文：last man standing / LMS），簡稱可作最後一人，係電子遊戲嘅一種遊戲模式。最後一人玩法同死亡競賽大致上相似，唯一分別係冇得重新生成：某個或者某隊玩家如果死咗，佢哋就出局冇得再玩；所以成場對局就變成玩家之間爭相以生存為首要目的，最後企到喺度嗰個或者嗰隊就贏。最後一人呢種比賽形式，可以話係大逃殺遊戲嘅基礎。

起源

睇埋：炸彈人系列

一般認為，將最後一人呢種玩法普及化嘅，係九〇年代嘅炸彈人系列作品，好似係超級炸彈人等。

風行

内文：大逃殺遊戲

喺二〇一〇年代，大逃殺遊戲呢種遊戲類型，一度風靡全球，好似係食雞同 Apex 英雄等嘅大逃殺遊戲長期高據 Steam 最多人玩嘅遊戲嘅榜首。

睇埋

• 死亡競賽，算係 LMS 嘅相對。