有機化合物
(由有機物跳轉過嚟)
甲烷係最簡單嘅有機化合物
有機化合物（英文：organic compounds）係指大多數有碳嘅化合物，係生命產生嘅基礎物質，好似烷烴、烯類、苯、醇類等。例外嘅主要包括碳化物、碳酸鹽、山埃、一氧化碳、二氧化碳等。
有機化合物比無機化合物多好多，有成幾百萬種，大部分都可以燃燒。
分類[編輯]
一般有機化合物有芳香類同脂肪類兩大種。芳香類係有苯環喺入面，好似苯、甲苯、苯甲酸等等；而其他嘅就係脂肪類，例如甲烷、乙烯、乙酸等。
有機化合物仲可以用渠嘅官能團分類。
- 烴類：净係有碳同氫嘅有機化合物，又叫碳氫化合物。主要有烷烴（净係得碳-碳單鍵嘅，甲烷係最簡單嘅）、烯烴（有碳-碳雙鍵嘅，最簡單嘅就係乙烯）、炔烴（有碳-碳三鍵嘅，最簡單嘅係乙炔），同埋環烴（即係碳鏈係個圈，好似環己烷、環丁烷等）。
- 鹵代烴：就係化合物入面除咗有碳、氫之外，仲有鹵素分子，例如氟、氯、溴、碘。
- 醇：就係分子入面有個羥基（OH-基團）。常見例子有酒精（乙醇）、異丙醇等。
- 醚：同醇係同分異構物，有-O-基團，兩邊碳鏈可以係一樣或者唔同嘅。
- 酮：有個酮基（C=O），可以用氧化二級醇嘅方法製備，唔容易再被人氧化。最簡單嘅酮係丙酮，係有機溶劑。
- 醛：係酮嘅同分異構物，有醛基（-CHO)
- 羧酸：有個羧基（-COOH），最簡單嘅係甲酸，平時用開嘅醋入面有乙酸，算羧酸嘅一種。
- 酯：係羧酸嘅同分異構物，有個-COO-基團。由羧酸同醇脫水生成，要濃硫酸做催化劑。通常有種香味，可以用來做香味。最簡單嘅酯係甲酸甲酯，係由甲酸同甲醇酯化生成嘅。平時講嘅肥膏、油脂，就是一種酯，叫三酸甘油酯，入面嘅三個酸可以唔同，而且通常都係高級脂肪酸。
- 胺：一種含氮元素嘅有機化合物，當氨嘅其中一個或者多個氫被碳鏈取代，就係胺啦。通常有一級胺（有-NH2基團，又叫伯胺）、二級胺（有-HN-基團，兩邊都要連碳，又叫仲胺）、三級胺（包含-NR2基團，R係碳鏈，又叫叔胺）同四級胺鹽（又叫季胺鹽，可以講成係銨根離子嘅四個氫都被人取代咗，中間嘅氮帶正電荷）幾種。