李松慶

出自維基百科,自由嘅百科全書
Jump to navigation Jump to search

李松慶1952年—),人人叫佢「愛心老闆」,1986年香港何文田愛民邨冬菇亭」開咗間叫明利油器粥品店嘅粥檔。響金融海嘯期間,佢每日免費派粥畀邨入面嘅老人家食,後尾俾電視台報導而出晒名,佢間粥檔都畀人叫做「愛心粥檔」[1]

底細[編輯]

李松慶細個嗰陣住喺九龍城嘅天台鐵皮屋1962年颱風溫黛打到嚟香港,佢屋企俾颱風吹毀。好在當時小學嘅校長同同學仔幫手,籌咗90蚊畀佢一家度過難關[2]

1986年,李松慶同屋企人為咗完成老竇嘅心願,喺何文田愛民邨「冬菇亭」頂咗間粥檔嚟做。點知1992年7月13號,冬菇亭發生咗一場大火,佢間粥檔都燒光燒淨。佢當時諗過索性執咗間粥檔,但係邨入面萍水相逢嘅校服店老闆,同埋佢一個老伙計,一齊拎咗幾十萬出嚟借畀佢應急,於是佢先裝修開返間粥檔[2]

因為自己成日受到人家嘅恩惠,深深明白雪中送炭幾咁好,所以佢能力做得到嘅話,都一定會盡力幫人。佢嘅座右銘係「人為善,福雖未至,禍已遠離。人為惡,禍雖未至,福已遠離。」[2]

2008年9月,「金融海嘯」爆發,佢本來同朋友夾份買的士,但係個朋友甩底,之後就接到皇冠車行通知話佢中咗「黃金大獎」,贏到價值15萬嘅金條。查實,佢幾年前已經開始半價賣粥畀幫襯粥檔嘅老人家,既然突然之間賺咗筆橫財,就索性改做每朝免費派粥。自從「免費派粥」嘅善舉傳開咗之後,唔少有心人主動捐錢或者物資畀佢支持佢,而專登嚟幫襯嘅客人都一日比一日多,粥檔生意不跌反升[2]

2008年11月,李松慶話自從傳媒報道佢間粥檔免費派粥畀老人家之後,每日都吸引咗大批市民嚟幫襯,令佢鋪頭多咗好多生意。雖然粥檔已經請多咗人手,但係仍然搞唔掂;李松慶重病埋,連佢老婆都因工受傷。但係喺辛苦背後,有街坊質疑佢做嘅嘢,重話佢賣嘅白粥得七成滿,但係派嘅粥就滿到瀉,暗指佢只靠賺客人錢派粥,唔係真正自掏腰包。佢對呢啲閒言閒語非常唔服氣,決定要暫停開鋪,等自己同老婆「停一停,抖一抖」[3]。抖咗個幾月之後,粥檔響2009年1月頭重新開返,重繼續免費派粥畀老人家;休息嗰陣,佢租埋隔離嘅吉舖[4]

新聞[編輯]

  • 2008年10月,熟食亭嘅業主領匯,主動搵李松慶傾,畀佢以優惠租金每月10,500蚊租埋隔離嘅吉舖[5]
  • 2009年2月,粥檔逆市加價令一啲街坊唔滿意;李松慶解釋粥檔已經四年冇加過價,但係來貨成本上漲咗好多,例如食油來價就升咗成倍,所以所有食品都要加價1蚊[6]

參考[編輯]

  1. "粥檔老闆免費為獨居長者烹調「愛心粥」". 亞洲電視今日新聞. 2010-8-5. (原先內容喺2010-08-07歸檔). 喺2010-11-15搵到.  檢查日期值喺: |date= (詳情)
  2. 2.0 2.1 2.2 2.3 "不怕蝕底 李松慶". 《東周刊》296期 Book A 【香港打不死】. 2009-4-28. 喺2010-11-15搵到.  檢查日期值喺: |date= (詳情)
  3. "身心俱疲捱到病 太太也因工受傷". 《蘋果日報》. 2008-11-23. 
  4. "月初復業 善心人捐款仍剩三萬餘 愛心粥檔歲晚加派利是". 《蘋果日報》. 2009-1-24. 喺2010-11-15搵到.  檢查日期值喺: |date= (詳情)
  5. "愛心粥檔獲領匯租金優惠". 《蘋果日報》. 2008-10-29. 喺2010-11-15搵到. 
  6. "愛心粥加價 檔主萌去意". 《明報》. 2009-2-5. 喺2010-11-15搵到.  檢查日期值喺: |date= (詳情)
  7. "《2010年度第一屆感動香港十大人物頒獎禮》網站". (原先內容喺2011年9月6號歸檔). 喺2010年11月17號搵到.