李福林
李福林（1874年—1952年2月11號），原名兆桐，字登同，係廣州河南大塘鄉人。曾任廣州市長、國民革命軍第五軍長。
事業[編輯]
李福林後生嗰陣，讀過幾年私塾，入過水師學堂，做過號兵。因為劫走衙門八萬兩銀元，俾衙門用一萬兩通緝，於是落草為寇，出入綠林。後來入咗同盟會，應孫中山之請去河內，參加過鎮南關起義。辛亥革命之後，佢喺廣州附近聚眾數千，稱為「福軍」。一九一七年護法之役，孫中山到廣州任「大元帥」；福軍為「大元帥府」親軍，李福林為親軍總司令。一九二四年，李福林選為廣州市長，同年廣州商團暴亂。之後，福軍亦助攻陳炯明。一九二五年國民革命軍成立，福軍編為第五軍，李福林任軍長。
一九二六年，廣州政變，李福林係廣東內留省國民政府委員之一，但向來唔開會[1]。北伐嗰陣，第五軍主力留守廣州。一九二七年，李氏聯合張發奎，喺廣州反蔣介石，同年十二月，中國共產黨搞廣州暴動，李氏加以鎮壓。事後李福林解職回鄉，之後退隱以務農渡日。李福林喺香港同廣州都有農莊，平時住香港大埔康樂園[2]。
一九三八年，日軍進攻廣東，試過用李福林收買廣東將領，意圖喺虎門登陸，進攻廣州。李話畀陳策知，將事轉告余漢謀，二人合演反間計，趁日軍登陸，擊斃數百。日軍攻佔香港後，李福林離港到重慶。及後返港，一九五二年病逝香港。