杜斌

  呢篇文講中國記者。想搵西晉時嘅人嘅話，請睇杜斌 (西晉)。

杜斌
出世	1972年，41歲 中華人民共和國山東郯城
屋企	北京豐臺區
國籍	中國
職業	前《紐約時報》北京攝影記者
知名作品	紀錄片《小鬼頭上的女人》 書《天安門屠殺》
鄉下	山東臨沂
親屬	杜繼榮（妹）
獎項	2010年亞洲人權新聞獎

杜斌（粵拼：dou6 ban1；英文：Du Bin；1972年—），山東郯城人，現居北京，係位中國攝影記者、作家、紀錄片製作人。佢自學攝影，曾經任職中國《北京青年報》、《工人日報》社會法治週刊，2004年起任職《紐約時報》北京分社，佢嘅新聞相發佈喺《紐約時報》、《國際先驅論壇報》、《時代》雜誌、《衞報》等。民權活動家趙岩話，杜斌係近20年來喺《紐約時報》發佈新聞作品最多嘅華人記者，喺約15年嘅新聞生涯中，影低好多中國社會各階層嘅當代新聞，長期跟蹤去影低上訪者嘅生存同抗爭，積累咗好多關注中國弱勢群體嘅嘅作品。2011年以來，中華人民共和國外交部一直唔發畀杜斌爲《紐約時報》工作嘅許可證，不過杜斌仲係同《紐約時報》維持密切關係。

2013年，杜斌發佈紀錄片《小鬼頭上的女人》，揭發馬三家勞教所對上訪者、法輪功學員實施嘅酷刑，由於佢係第一位身處中國內地而出版有關六四事件嘅書嘅人，喺當年六四前夕畀北京當局國保秘密逮捕，國際上非常關注呢件事，BBC、《紐約時報》、《華盛頓郵報》等西方主流媒體始終跟蹤報道。