林卓夫
林卓夫（1897年—1943年2月1號），字壽源，香山隆都安堂鄉人，係廣東政治人。[1]
生平[編輯]
林卓夫喺1897年出世，喺廣東省高等師範學校（中山大學前身）畢業，做過省、縣中學老師，上海市體育專科學校總務。1929年天熱，做中山縣立中學（依家嘅中山一中）校長。1937年，出任廣東省教育廳督學。
1930年，林卓夫做過好短時間中山縣西鄉區長。1939年，林獲任國民黨中山縣黨部書記長。同年7月，日軍進攻橫門，中山第一次淪陷，佢要求部屬疏散到五區，自己就隨軍抗戰。10月2號，日軍轟炸尖峰山附近，林炸到重傷，送咗去澳門醫。1940年3月中山第二次淪陷前，縣政府遷往八區斗門。同年春，佢畀國民黨中央黨部調去重慶，進入中央訓練團第七期訓練。受訓完畢，返中山無耐，就兼任中山縣長、中山縣戰地國民兵團團長、中山縣地方守備總隊副總隊長。
1942年，佢改任國民黨港澳灣總支部委員兼澳門支部主任委員，維持國民黨黨務响香港嘅正常運作。香港淪陷後，喺葡屬澳門繼續組織抗日活動。
林卓夫一方面積極抗日，另一方面防止赤化，按上級要求落令解散廣東省青年抗日先鋒隊中山縣隊、中山縣戰時婦女協會，禁止呢啲受中國共產黨領導或影響嘅抗日團體嘅一切活動。[1]
過身同後事[編輯]
林卓夫喺澳門做嘢嗰陣，揭露日軍分子嘅惡行，引來日僞憎恨，畀日偽列做第2名暗殺對象。有人勸佢走佬離開澳門避風頭，佢話：「為國死，吾何憾」，並立下遺囑，準備好後事。
1943年2月1號晏晝，林卓夫參加澳門鏡湖醫院新值理就職會並上台演講，揭露日軍暴行，又主持咗國民黨紀念活動。晚黑8點半散會，佢喺返柯高馬路（依家嘅高士德馬路）途中，跟尾嘅兇徒鮑德（又名鮑滋常，中山人）向佢連開五槍後逃去。佢送去山頂醫院搶救，不治身亡，終年46歲。出殯嗰日，澳門各界人士、邑僑親朋，出席喪禮嘅超過二千人。[2]抗日戰爭勝利後，佢畀國民黨中央黨部列為35烈士之一，傳令表彰。1947年，中山縣民眾迎林卓夫靈柩返中山，葬响石岐迎陽山烈士墳場。中山縣立中學同學會幫佢單獨起咗個墓，立咗碑文。文化大革命期間，林卓夫墓被毀，骸骨不知所終。
2007年，《中山日報》報導，佢嘅墓碑喺石岐南下麻洲街畀人攞來鋪路，踩咗幾十年。報導之後，佢嘅墓碑卒之當係珍貴文物畀中山市文化部門收藏。[1]