公曆

1582年嘅公曆年曆

公曆（粵拼：gung1 lik6）即係世界上大多數地方用嘅曆法，當今嘅公曆係國瑞曆（gwok3 seoi6 lik6），又譯格里曆（gaak3 lei5 lik6）、額我略曆（ngaak6 ngo5 loek6 lik6）、格列高利曆gaak3 lit6 gou1 lei6 lik6，粵口語多數叫新曆，係由意大利醫生兼哲學家阿萊紹斯·列廖斯（Aloysius Lilius）改革儒略曆整出嚟，由教宗國瑞十三世（拉丁文係「Gregorius XIII」；上述曆法以其命名）喺1582年歐洲頒佈推行。

有乜特別

格里曆同儒略曆一樣，都係每四年喺二月底加一個閏日，不過，格里曆特別規定，所有唔可以畀400整除嘅世紀年（即有兩個零喺尾嘅年份，1800年、1900年之類）都冇閏日。其他可以畀400整除嘅世紀年就有閏日，好似1600年、2000年咁，所以2000年係有2月29號。

每400年，額我略曆就只得97個閏年，比儒略曆少 3 個。額我略曆嘅年平均長度係365.2425日，接近平均回歸年嘅 365.24219 日，即係約每3300年先有一日誤差，亦接近春分點回歸年嘅 365.24237日，即係大約每8000年誤差一日。而儒略曆嘅曆年係 365.25日，約每128年就多咗一日。到1582年時，儒略曆嘅春分日（3月21號）同地球公轉到春分點嘅實際時間已經相差咗 10 日。

格列高利曆開始行嗰陣，同時規定，原先儒略曆1582年10月4號星期四嘅遞日係格列高利曆1582年10月15號星期五，即有10日唔見咗，而原先星期嘅週期就唔改。格列高利曆嘅紀年沿用儒略曆，係傳統嘅耶穌出世嗰年開始，有叫「公元」或「西元」。

世界各地嘅使用情況

格里曆係陽曆嘅一隻，中國官方響1912年開始用，取代傳統用開嘅中國曆法夏曆（黃曆），而中國傳統曆法係一隻陰陽曆，格里曆喺中文裏邊又叫陽曆、西曆、新曆。雖然渠好普及，但係而家都重有唔用公曆嘅國。唔少地方會用唔止一種曆法，非公曆嗰啲以用喺民間為主，尤其係喺宗教、節慶、玄學、農業等等嘅領域處。精密科技嘢就冚唪唥用公曆。