桃色 (電影)

桃色（Colour Blossoms）係一套新加坡Festive Films公司發行嘅香港劇情電影，對白包合粵語、英語同日語，2004年10月28號喺香港上映。套戲由楊凡執導，章小蕙、河莉秀、吳嘉龍、橫內晶、松坂慶子主演。套戲講述地產經紀因為受日本貴婦委託出租一間塵封多年嘅豪宅，而遇到並愛上兩個男人嘅故仔。

呢套戲由於預告片有唔少性感同埋 SM 情節，加上當時章小蕙經常受傳媒關注，而佢又有露點演出，所以未上映之前已經得到咗唔少關注。

角色名單

• 章小蕙 - 地產經紀美麗
• 松板慶子 - 日本貴婦梅木夫人
• 河莉秀 - 年輕梅木夫人
• 吳嘉龍 - 警察（編號：4708）
• 橫內晶 - 年青攝影師Kim

製作過程

呢套戲籌備嗰陣，章小蕙亦曾經被指玩失蹤，亦有好多人勸戒楊凡唔好搵章小蕙，而楊凡就話佢需要一個機會，一個有耐性、又肯冒險嘅人，將佢帶出來，而佢就係嗰個肯冒險嘅人。而佢亦話，呢套戲冇一個比起章小蕙更加適合嘅人做女主角。

章小蕙同楊凡喺2005年8月接受《康熙來了》訪問嘅時候透露，當初楊凡喺街上面撞見章小蕙，就邀請咗佢上去自己嘅攝影室參觀，之後章小蕙就幫佢做筆記同埋試咗一啲 SM 造型，套戲劇本就成咗型。造型相之後畀明報周刊登咗出嚟，引起咗好大迴響，套戲就變成非拍不可。章小蕙又透露，自己當初對SM其實非常抗拒，呢次係佢佢第一次接觸SM。另外，章小蕙亦曾經因為未有心理準備拍一場激情戲，連喊兩個鐘頭。

除咗章小蕙之外，吳嘉龍起初接拍《桃色》嗰陣，起初亦俾佢老豆吳耀漢反對。吳耀漢喺2015年3月接受商台節目《1圈圈》訪問嘅時候，就話雖然欣賞導演楊凡，但就覺得套戲由頭到尾都係噱頭，唔白點解要搵當時唔係演員嘅章小蕙，亦因為呢套係三級片，覺得吳嘉龍拍完呢套戲會玩完，因為呢度係香港，唔能夠用西方思想去睇。吳嘉龍就同楊凡討論，楊凡提議演套戲嘅另一個角色，而吳嘉龍話好難推，最後吳耀漢亦唔再反對，本來比較裸露嘅角色就由橫內晶飾演，但就告誡吳嘉龍唔好做一啲將來自己唔可以接受嘅嘢。