梁皓妤

梁皓妤（Ruby Leung，1990年4月2號—）係香港警務處警察公共關係科前女警員，2017年到2020年做電視節目《警訊》主持。

簡歷

梁皓妤中學讀聖保祿學校，大學讀香港樹仁大學新聞與傳播學系。2012年，佢做過亞洲電視新聞報導員。2014年3月，佢投考香港警隊，做過軍裝巡邏小隊、報案室、東區特別職務隊職務，2017年調任警察公共關係科影視聯絡組，3月25號開始接替甄淑賢做《警訊》主持，同時亦有份參與構思拍攝內容同資料搜集嘅幕後製作工作。

2020年4月5號，有自稱香港警察嘅網民喺微博批評梁皓妤嘅網上言行，包括佢讚好反警嘅「香港黑警」Facebook專頁，同埋上載支持平反六四嘅圖。消息話警隊管理層覺得佢嘅網上言行唔符合警隊價值觀，所以決定即時將梁皓妤調職，調到黃大仙警署。4月1號嗰集《警訊》亦係佢最後主持嘅一集，之後由男警張繼安（藝人張繼聰細佬）接任主持。4月8號，佢決定用個人理由主動辭工，計劃轉投動物保護工作。