楊修之死

出自維基百科,自由嘅百科全書
跳去導覽 跳去搵嘢

楊修之死粵拼joeng4 sau1 zi1 sei2),講楊修因為太過聰明,令曹操產生妒忌,曹操想考楊修嘅事件,一次又一次噉俾楊修解開,搞到曹操好嬲,所以曹操趁機會用雞肋事件令楊修跌落陷阱,以亂軍之罪將楊修處死。

事件[編輯]

篇文以倒敘法嚟寫,一開始先提及雞肋事件,之後再由闊門事件開始,楊修因為以下事件激嬲曹操:

事件 起因 經過 曹操反應
闊門事件 曹操喺新起好嘅花園門上寫咗一個「活」字,其他人都唔明白佢嘅意思。 楊修指出曹操嫌園門太闊,於是改建花園,完成後請曹操去睇。 曹操好開心,但當佢知道係楊修明白佢嘅心意之後,表面雖然話好,心裏面其實好妒忌。
一盒酥事件 曹操喺塞北送嚟嘅酥盒上面寫咗「一合酥」三個字,放喺案頭。 楊修攞羹匙同大家將盒酥分嚟食晒,並向曹操解釋盒上面寫住「一人一口酥」,所以唔敢違反丞相嘅命令。 曹操雖然喜笑,但係心中厭惡楊修。
夢中殺人事件 曹操驚有人謀害自己,喺熟睡嘅時候遭人刺殺,所以吩咐左右喺佢熟睡嘅時候唔好走近。 曹操睏晏覺嘅時候被掉咗落地,一名侍衛慌忙執起被幫佢冚返,曹操跳起並拔劍斬殺咗呢位侍衛,然後再到牀上睏,好耐先起身,醒咗之後扮到好驚問邊個殺咗佢嘅侍衛。 楊修喺被殺侍衛下葬嘅時候,暗示自己洞悉曹操殺侍衛嘅用意,點破曹操殺人嘅詭計,令到曹操更加憎惡佢。
吳質事件 曹操想立曹植為世子,曹丕知道咗,秘密請吳質入府密謀對策。 曹丕用大竹筐收藏吳質,私入府中,楊修知道咗,就向曹操告密,曹操乃派人喺曹丕府外偵察。曹丕知道曹操對佢有所懷疑,話畀吳質知,吳質教佢喺第二日再以大竹筐裝絲絹入府,擾亂曹操視聽。 第二日,使者搜查大竹筐,發現果然係絲絹,稟報曹操。曹操因此懷疑楊修存心誣衊曹丕,就更加討厭楊修。
鄴門事件 曹操想試曹丕同曹植嘅才幹,令佢哋各自出鄴城門,但暗中吩咐門吏,唔好俾佢哋出城門。 曹丕先行,門吏阻擋,曹丕嚇到退返。曹植知道就向楊修請教。楊修教曹植斬殺阻擋佢出城嘅鄭城門吏。 曹植斬咗阻擋佢嘅鄴城門吏,曹操以為曹植決斷,後來知道係楊修教佢,令到曹操好嬲。
答教事件 曹操想試曹丕同曹植嘅才幹,曹操考問曹植嘅軍政知識 楊修為曹植作答十幾條答教,令到佢對答如流。曹操心中有所懷疑。 後來曹丕暗中買通咗曹植嘅左右手,偷咗答教。有人報告曹操,曹操知道之後極之嬲,想殺咗楊修。
雞肋事件 曹操帶兵,被馬超拒守,雙方相持不下,進退維谷,成晚正為咗應唔應該撤兵嘅問題而困擾,咁啱庖官送上雞湯,曹操見湯中有雞肋,就以「雞肋」作為係夜嘅暗號。 楊修聽聞夜嘅暗號係「雞肋」,估到曹操心意,就叫隨行軍士收拾行裝,準備歸程。當晚曹操睏唔到,夜巡營寨,見寨內軍士都已經準備好行裝,大驚,急召夏侯惇查詢,發現因為楊修對人謂魏王有欲歸之意。曹操好嬲,質問楊修,楊修以雞肋之意向曹操解釋。 曹操好嬲,以造謠惑亂軍心嘅罪名,斬殺楊修。


反應[編輯]

正面[編輯]

三國演義》作者羅貫中以呢件事告誡後世人,如果做人下屬,要事事小心,唔好似楊修咁自作聰明,累死自己。現代唔少人都攞呢樣嘢嚟警惕職場人士,要識得睇老細做事[1]

有人認為楊修並唔係因為太過聰明令曹操妒忌,而係因為佢介入王儲之爭(曹丕曹植之間嘅王位爭奪戰)、曹操覺得佢多事到連自己屋企嘅嘢都管埋,因而借雞助一事殺咗佢[2]

仲有人認為係因為楊修出身於弘農楊氏、遠比曹操高貴,士人嘅出身就已經令曹操提防到死下死下(死響曹操手上嘅孔融崔琰,其實都係士人出身),再加上楊修唔識得低調,先至搞到畀人斬頭[3]

反面[編輯]

不過《三國演義》嘅講法同好多歷史書有出入[a],《三國演義》話係楊修太過自作聰明、因而畀曹操以「亂軍心」斬頭;而《三國志·魏志·陳思王植傳》等等就話楊修係因為飲醉酒之後自己走入司馬門(即王宮)、仲要亂咁指控曹彰,因而畀曹操以「前後漏泄言教,交關諸侯」斬頭,雞肋一事雖然發生過,但唔係佢死嘅最終原因。由於《三國演義》只係小說,好多嘢都畀人證實係同史實不符,所以楊修之死真實性存疑。

[編輯]

  1. 響《三國演義》第72卷入面,羅貫中將楊修寫成恃才傲物、自作聰明,因為雞肋一事而畀曹操以「亂軍心」斬頭;《三國志·魏志·陳思王植傳》、《後漢書·楊震傳附玄孫修傳》、《魏略》同埋《續漢書》就寫係因為楊修飲醉酒之後自己走入司馬門(即王宮)、仲要亂咁指控曹彰,因而畀曹操以「前後漏泄言教,交關諸侯」斬頭

[編輯]

  1. "反應快又能幹...曹操竟為「雞肋」殺楊修?職場最忌不長眼:千萬別幫老闆下決定!-歷史批踢踢|商周". 商業周刊 - 商周.com (中文). 喺2021-10-23搵到.
  2. 三立新聞網 (2021-04-11). "楊修被吃剩的雞肋害死?因介入儲君之爭 曹操才想除掉他 | 新奇 | 三立新聞網 SETN.COM". www.setn.com (中文). 喺2021-10-23搵到.
  3. "楊修出身如何成為曹操之忌?". www.bastillepost.com. 2019-08-14. 喺2021-10-23搵到.

出面網頁[編輯]