橙色天空

《橙色天空》（俄文：«Оранжевое небо»；烏克蘭文：«Помаранчеве небо»，羅馬化：Pomarancheve nebo）係套喺烏克蘭嘅橙色革命之後拍嘅戲，由 Oleksandr Kyryenko 執導，2006年由 Cinema Production 出品。

劇情

呢套戲講兩個性格完全唔同嘅後生仔嘅愛情故仔，女主角 Ivanna 係一個對民主充滿理想、好有愛國心嘅少女，認為國家嘅前途就係民主，所以成日用公開發聲嘅方法去表達自己對國家嘅熱愛，公開發聲支持革命理念，甚至好多時係用抗議當時烏克蘭政權嘅方法；但係男主角阿 Mark 就完全唔同，佢係政府官員子弟，生活富裕，要乜有乜。

兩個人喺烏克蘭國家出現危機期間相遇，當時發生咗一連串大規模抗議同政治事件，但係佢哋一見鍾情，改變咗兩個人嘅命運。阿 Mark 開頭唔想放棄自己舒適嘅生活，但佢想理解 Ivanna 同佢啲朋友點解會咁堅持同政權抗爭，結果喺呢個過程之中，Ivanna 嘅目標亦續漸變成咗佢嘅目標，最後兩個人一齊為國家爭取更好嘅未來。

呢套戲用咗半紀錄片式手法，重現咗橙色革命嗰年烏克蘭冬天嘅實況，無論係當時嘅抗議活動、暴動同寒冷嘅天氣，都喺套戲入便。

製作

預算

呢套戲嘅成本大約係 250 萬烏克蘭幣（約 50 萬美金）。

拍攝同選角

套戲喺2005年 4 月底開工，同年11月6號開拍，分階段喺基輔、卡米亞涅茨-波迪利斯基同克里米亞 拍咗總共廿八日 ；至於戲入便喺基輔獨立廣場嘅橙色革命場面，其實係喺 2005 年革命周年紀念日拍嘅，呢個係點解冇參與革命事件嘅當時嘅烏克蘭總理 Yuriy Yekhanurov 都出現咗喺鏡頭入面。

選角嘅「篩選」有成超過一萬名民眾參加，最後獲選女主角嘅係嚟自文尼察（Vinnytsia）嘅 Lidia Obolenska，佢自己坦言扮演呢個角色好困難，因為佢嘅烏克蘭文根本唔掂，要特別搵咗一個來自列域夫，講烏克蘭語嘅朋友，請佢同佢講幾日，等佢改善佢自己嘅烏克蘭文口語，就算最後，佢都話佢喺套戲入面嘅烏克蘭文都只係「咁上下」（意思係仲有啲唔自然）。