二聖宮係喺香港新界元朗區橫洲東頭圍嘅一間廟。嗰度係一條雜姓嘅村，間廟就大約喺康熙五十七年由「橫洲六村」（西頭圍、東頭圍、林屋村、忠心圍、福慶村同楊屋村）嘅村民合力夾錢起嘅，廟裏面有一口康熙戊戌年製造嘅古鐘，因而估計呢間廟就喺呢一年起好嘅。裏面供奉嘅「二聖」係洪聖爺同車公元帥，分別係南海嘅守護神同埋驅除瘟疫嘅神。二聖宫喺1996年被評為法定古蹟，跟住就進行全面嘅維修，所有費用係由香港賽馬會出嘅。
