檳城蝦麵

出自維基百科,自由嘅百科全書
  呢篇文講嘅唔係咖喱喇沙福建炒麵
檳城蝦麵
檳城茶餐室售賣嘅福建蝦麵

福建蝦麵,又叫福建麵,係一樣東南亞料理,其中以馬來西亞檳城新加坡嘅最具代表性,係一道利用蝦殼同辣椒熬煮嘅赤紅辛辣湯底,再配上黃麵條米粉蕹菜等而成嘅麵食料理。

好多馬來西亞同新加坡嘅華人餐廳同美食中心都可以揾到佢嘅踪跡,深受當地華人歡迎。

來歷[編輯]

檳城蝦麵據說係由早期移民檳城島嘅福建人所研發。喺日據時期,捕撈嘅魚產都只可以賣畀日本軍人,於是當地嘅福建漁民只好將剩低嘅蝦殼、蝦頭熬成,再配上黃麵,繼而創出呢道庶民美食

亦有人指出呢道係福建流傳嘅食物,喺泉州一帶叫做蝦麵,隨住華裔老一輩去到南洋,再加啲南洋辛香料,形成咗呢個麵[1]

烹飪[編輯]

檳城蝦麵

將蝦殼同蝦頭以及紅蔥頭等辛香料一齊放入熱油爆炒,之後再加入辣椒,用布袋將炒過嘅蝦殼包埋一齊,同豬大骨、沙葛熬成湯頭。跟住用開水汆燙好黃麵米粉蕹菜後,同肉片豆芽水煮蛋一同放入裏面,加上湯頭,最後加入參巴辣椒醬,就係一碗傳統檳城蝦麵。

吉隆坡同南馬一帶,參巴辣椒醬會裝喺一旁嘅小盤子裏面,食用方式係用筷子蘸啲辣椒醬度,再送入口,同檳城直接將辣椒醬拌入湯內嘅食法有啲唔同。福建麵除咗上述所提及嘅配料之外,仲可以附加燒肉燒腸魚丸雞腳粉腸等,麵類亦唔限於黃麵同米粉,可以選擇粿條伊麵、「美極即食麵(Maggi麵)、粗米粉等。

參考[編輯]

  1. San Peng蝦麵 互聯網檔案館歸檔,歸檔日期2016年1月26號,.,星洲日報,2008-1-27