步練師

出自維基百科,自由嘅百科全書
(由步夫人跳轉過來)
Jump to navigation Jump to search
步練師
皇后(追尊)
在位 195年~238年
私人明細
夫君 孫權
仔女 孫魯班
孫魯育
尊位 夫人(生前)
皇后(身後)
過世 238年
建業
安葬
蔣陵

步練師粵拼bou6 lin6 si1;?—238年),臨淮淮陰人(而家江蘇淮安),係三國東吳皇帝孫權嘅側室夫人,稱爲步夫人bou6 fu1 jan4)。佢同吳國丞相步騭係同族。

生平[編輯]

東漢末年,佢阿媽帶住佢走去廬江(大約係而家安徽潛山)。興平二年(195年),孫策攻佔廬江,於是兩母女過去咗江東,由於佢生得靚女,畀孫權寵幸,做咗佢嘅側室夫人,成爲後宮中最受寵愛嘅人[1]。步練師同孫權生咗兩個女,大女叫孫魯班,字大虎,細女叫孫魯育,字小虎。

步練師嘅性格唔多妒忌人,重周不時同孫權介紹啲好女人,就呢下得孫權鍾意。到咗孫權稱帝時(229年),就想將步練師立爲皇后,但群臣都話要立太子孫登嘅老母徐氏做皇后先合體統,結果孫權十幾年時間都無立皇后。不過步練師已經成咗實際上嘅皇后,宮內人默認佢係皇后,連親戚上疏都嗌佢做中宮[2]

至於徐氏,由於佢份人鍾意妒忌,畀孫權廢咗打入冷宮。佢嘅仔孫登面對步夫人嘅賞賜時,只係行完應有嘅禮節就算,但對於老母賜嘅衫,必定沖過涼先再着,佢同樣希望自己老母可以立爲皇后。到佢要立爲太子時,佢就提議父皇先立皇后再講,孫權問:「噉你母上重響度咩?」佢就答話「喺吳(廢咗後身處嘅冷宮)」,結果孫權唔出聲[3]

於是就噉相持不下,直到步練師身後先獲得皇后嘅名號。赤烏元年(238年),步練師過身,啲群臣唔再阻住孫權,肯追封步練師做皇后。於是步練師以皇后嘅身份葬入蔣陵(孫權嘅皇陵)。

從195年到238年間,過咗43年,所以到步練師死時肯定有44歲以上,但孫權重係咁執着於將佢定爲皇后,可見佢幾咁鍾意步夫人,而佢追認步練師做皇后嘅策命中亦吐露出悲痛嘅心情。

原文:

惟赤烏元年閏月戊子,皇帝曰:

嗚呼皇后,惟后佐命,共承天地。虔恭夙夜,與朕均勞。內教脩整,禮義不愆。寬容慈惠,有淑懿之德。民臣懸望,遠近歸心。

朕以世難未夷,大統未一,緣后雅志,每懷謙損。是以於時未授名號,亦必謂后降年有永,永與朕躬對揚天休。

不寤奄忽,大命近止。朕恨本意不早昭顯,傷后殂逝,不終天祿。湣悼之至,痛於厥心。

今使使持節丞相醴陵亭侯雍奉策授號,配食先後。魂而有靈,嘉其寵榮。嗚呼哀哉!

粵文大意譯:

赤烏元年閏月戊子,皇帝詔曰:

嗚呼!皇后啊!唯有皇后係朕天命中嘅賢內助,共同承載住天地嘅秩序。日日夜夜敬虔努力,同朕分擔勞苦。身爲夫人打理得好內事,從未違背過禮義。爲人寬容和善,有賢淑嘅品德。民衆同臣下中有威望,遠遠近近嘅人都歸服。

當時朕未克服掂時世困難,未統一到天下,然而皇后嘅心咁謙讓不爭,無爭住要皇后嘅名號。當時雖則未授予名號,係諗住皇后你會長命百歲,最後肯定同朕一齊面臨天下,以謝上天嘅恩惠。

但係諗唔到,壽限噉就到咗。朕實在痛恨自己唔早啲坦白本意,等到皇后你逝世後,爲得唔到呢份福分而淨低無盡嘅哀傷遺憾。諗到呢啲,實在係心痛至極。

而家派使持節丞相醴陵亭侯雍奉冊封授號,踐行皇后嘅禮遇。若果人死有魂魄,噉就可以領受呢份榮耀。嗚呼哀哉!

參攷資料[編輯]

  • 陳壽(著);裴松之(注). "吳書 — 妃嬪傳:步夫人傳". 《三國志》. 
  • 許嵩. "卷第一校勘記". 《建康實錄》. 權夫人步氏諱練師,臨淮淮陰人也。隨母徙廬江,廬江為桓王所破,皆東渡。夫人以美麗得幸於帝,生二女:魯斑、魯育。性不嫉妬,多推進,故久見愛,寵冠後庭。及帝即位,數次欲立為后,公卿意在太子母徐氏,帝不得已依違十餘年。薨,追思之,至是年追拜之後,合葬蔣陵。  External link in |chapter= (詳情)

[編輯]

  1. 陳壽. "吳書 — 妃嬪傳:步夫人傳". 《三國志》. 漢末,其母攜將徙廬江,廬江為孫策所破,皆東渡江,以美麗得幸於權,寵冠後庭。 
  2. 陳壽. "吳書 — 妃嬪傳:步夫人傳". 《三國志》. 夫人性不妒忌,多所推近,故久見愛待。權為王及帝,意欲以為后,而群臣議在徐氏,權依違者十餘年,然宮內皆稱皇后,親戚上疏稱中宮。 
  3. 陳壽. "吳書 — 吳主五子傳:孫登傳". 《三國志》. 後徐氏以妒廢處吳,而步夫人最寵。步氏有賜,登不敢辭,拜受而已。徐氏使至,所賜衣服,必沐浴服之。登將拜太子。辭曰:「本立而道生,欲立太子,宜先立后。」權曰:「卿母安在?」對曰:「在吳。」權默然。