歸納問題

歸納問題（粵拼：gwai1 laap6 man6 tai4；英文：problem of induction）係知識論同科學哲學上嘅一條大問題，問題重點係：

「

齋靠由過往觀察度歸納出嚟嘅陳述，可唔可以算得上係『知識』？

」

背景

睇埋：知識論、科學哲學同黑天鵝

歸納（inductive reasoning）係現代科學嘅根基：科學家係靠一路噉做實驗同觀察，並且由呢啲實驗觀察度推導出普遍嘅定律－例如牛頓觀察到包括蘋果在內嘅好多嘢（一大拃觀察）都會向下跌，就提出萬有引力嘅諗頭（普遍定律）嚟解釋研究緊嘅現象；不過佢始終都冇辦法去真係「證明」呢個宇宙入面真係所有嘢都會跟萬有引力－可能喺宇宙嘅某啲黑暗角落度會有啲冇引力嘅嘢，只係人類仲未搵到；科學家靠嘅係實驗同觀察，佢哋冇辦法好似數學家噉真係吓吓都證明佢哋講嘅嘢，頂櫳係可以靠住重複做實驗同觀察嚟加強自己嘅論證，但始終係冇方法排除一個可能性：呢個宇宙入面可能真係有啲嘢係唔跟佢哋諗出嚟嗰啲定律嘅，只係佢哋未搵到呢啲嘢。

想像下圖：$u$ 表示宇宙入面一切嘅現象，$A$ 表示人類觀察得到嘅現象，而 $A^{c}$ 表示宇宙當中人類觀察唔到嘅現象。原則上，$A$ 永遠會細過 $u$ 一大截，所以難保 $A^{c}$ 裏面唔會有啲「唔跟從人類嘅科學定律，但人類唔知佢哋存在」嘅事物。

於是有唔少哲學家就產生咗個疑問：到底呢啲靠過往經驗嚟得到嘅知識算唔算真係知識？

睇埋

• 科學方法
• 數學證明
• 葛提雅問題
• 黑天鵝效應

拎

• The Problem of Induction. The Stanford Encyclopedia of Philosophy.