金正男被殺案

金正男被殺案發生喺2017年2月13號，北韓已故最高領導人金正日個大仔金正男，喺馬來西亞吉隆坡國際機場俾2個懷疑係由北韓特務組織指使嘅女人用VX神經毒劑買起。

經過

2017年2月6號，金正男由澳門飛到馬來西亞。2月13號上晝，金正男到吉隆坡國際機場2號客運大樓登機大堂，準備搭飛機返澳門，突然有兩條女行埋佢度，一個從後勒住佢，一個兜面扤住佢，過程得3秒，之後即閃。金正男跟住就覺得周身唔妥，好唔舒服，即刻搵機場職員幫拖，點知未送到醫院就瓜咗。

馬來西亞警方即刻開始查案，喺2月15號拉咗頭一位女疑犯，嚟自越南南定嘅段氏香（越南文：Đoàn Thị Hương）；再喺2月16號拉咗第二位女疑犯嚟自印尼西冷嘅茜蒂艾莎（印尼文：Siti Aisyah）。佢哋話自己只係畀人請返嚟拍一條整蠱人嘅短片，唔知原來㨃咗友，不過警方認為佢哋講大話，懷疑佢哋係受北韓特務組織指使嘅，警方重通緝緊幾位北韓佬。

2月24號，馬來西亞驗屍結果顯示，金正男塊面接觸到毒性勁高嘅VX神經毒劑。