沙弗魯丁鉸剪

當年對沙弗魯丁鉸剪政策形象化嘅宣傳圖。圖入面係一張爪哇銀行發行嘅5荷属东印度盾鈔票係中間剪開：左半部價值減半後可以繼續用到指定期限，右半部就強制變成國債。呢個政策適用範圍涵蓋圖入面所示嘅5盾及以上嘅所有殖民時期嘅舊鈔票。

沙弗魯丁鉸剪（印尼文：Gunting Syafruddin）係印尼聯邦共和國喺1950年3月實施嘅一項貨幣政策。呢個政策由當時嘅財政部長沙弗魯丁·普拉維拉內加拉頒布，佢個名係黎自於政策嘅執行嘅方法，超級簡單直接——直接將流通緊嘅特定紙幣從物理上剪開一半。

呢個政策嘅目的係對應當時嚴峻嘅經濟問題，包括咗政府繼承殖民時期遺留落黎嘅巨額債務、嚴重嘅財政赤字、多種貨幣同時流通市面導致嘅金融秩序混亂，同埋因為貨幣供應過多引發嘅惡性通貨膨脹。政策目標係透過減少貨幣流通量嚟抑制通貨膨脹，並透過強制轉換做債券嚟增加國家財政收入。根據規定，剪開咗嘅紙幣，左邊一半按照原本面額嘅一半價值繼續用，要喺限時之內轉過一張嘅新鈔；右邊嗰一半就變成為政府長期債券。

呢個政策係執行方面，引起咗市場波動同埋公眾疑慮，即使短期內減少咗貨幣流通量，但係佢嘅正面影響唔能夠持續。主要係因為冇解決政府支出呢嘅根源問題，令到貨幣供應量再次攀升，通脹亦同時失控。呢個舉動令市場失去信心，令到班有錢佬、商家囤積物資，造成人為短缺，令民眾喺物價飛漲嘅同時仲需要擔心物資匱乏嘅困境。最後，呢個政策被視為一次未能從根源上解決殖民時代遺留經濟結構問題嘅失敗嘗試。

背景

係1949年年底，印尼面臨嚴峻嘅經濟危機。呢個時候又正值國家政治轉型嘅關鍵時期——印尼同荷蘭喺海牙談判，佢地喺1949年11月2日簽署《圓桌協定》。喺同年12月27日成立印尼聯邦共和國，逐步過渡成為單一制國家。不過，政治動盪嚴重影響經濟穩定，特別係荷蘭曾經試過利用佢地嘅軍事組織荷屬東印度民政署重新佔領印尼，導致國家政治局勢長期都唔穩定。

喺呢個背景下，新成立嘅印尼政府唔單止被迫承擔咗荷屬東印度政府遺留落黎嘅45億盾嘅外債，仲面臨高達51億盾嘅巨額財赤。再複雜啲嘅係，國內有好多種貨幣一齊流通嘅混亂局面。當時印尼流通緊三種唔同嘅貨幣：新成立嘅共和國發行嘅印尼盾、荷蘭時期爪哇銀行發行嘅荷属东印度盾、荷蘭東印度群島戰役同印尼獨立戰爭期間荷蘭東印度民政署發行嘅貨幣（別稱「紅錢」，印尼文：uang merah）。

當時市場上嘅貨幣總流通量高達39億盾，遠遠超過商品供應量，嚴重削弱咗市民眾購買力，成為引發起惡性通貨膨脹嘅關鍵因素之一。同時，高估咗匯率制度，削弱咗貿易部門嘅盈利能力，令到以貿易稅為主要收入來源嘅政府稅基萎縮，財政預算狀況惡化。為咗應對呢個嚴峻嘅局面，哈達第二次內閣、當時財政部長沙弗魯丁·普拉維拉內加拉決定推行金融整頓措施，目標係平衡貨幣流通量同埋商品供應量，去穩定國家經濟。

政策推手

沙弗魯丁嘅個人背景同經濟理念對印尼日後貨幣政策嘅制定有深刻影響。佢唔單止係當時嘅財政部長，更喺1951年獲任命為爪哇銀行（後黎改組做印尼銀行）嘅第一任印尼籍行長，象徵印尼喺荷蘭人手中攞返金融主權嘅重要里程碑。作為馬斯友美黨成員，沙弗魯丁喺政治上被視為溫和嘅宗教社會主義者。佢嘅務實作風甚至獲得即將離任嘅荷蘭銀行高層認可，認為佢「接受現實並做出必要妥協」，經濟觀點「同荷蘭人非常接近」。

沙弗魯丁強調財政紀律同貨幣穩定嘅保守立場，同另一位有影響力嘅民族主義經濟學家蘇米特羅·佐約哈迪庫蘇莫有好大嘅分歧。蘇米特羅主張激進嘅發展主義，認為應該要透過擴張財政同貨幣政策，由國家做主導推動工業化，徹底擺脫殖民經濟結構。對沙弗魯丁嚟講，貨幣穩定就係經濟活動嘅基石；不過蘇米特羅就覺得貨幣政策只係為服務國家發展嘅工具。

不過喺印尼銀行喺籌建過程入面，就出現左兩個人嘅理念衝突。關鍵爭議係喺中央銀行法規設計上面：沙弗魯丁堅持要求貨幣發行總額必須有至少20%嘅黃金同外匯儲備做支持，佢認為呢個舉動係維持幣值穩定同國際信譽嘅必要保障，咁先能夠有效約束政府濫發鈔票嘅情況發生。而蘇米特羅就強烈反對，佢批評呢個係「過時嘅儲備要求」，仲會嚴重限制咗政府發展項目嘅融資能力。

喺1950年印尼經濟瀕臨崩潰嘅背景下，沙弗魯丁主張「先穩定、後發展」嘅保守主義，明顯比起蘇米特羅嘅長期發展藍圖更加有即時性同說服力。同時，沙弗魯丁係馬斯友美黨嘅重要人物，深深受到印尼社會黨夏赫里爾嘅民主社會主義思想影響，呢樣係促成社會黨同馬斯友美黨政治聯盟嘅關鍵因素。呢個政治聯盟喺印尼獨立初期（尤其係喺哈達同納席爾內閣期間）構成咗政府嘅核心力量。因為咁，沙弗魯丁推行激烈嘅經濟政策，唔單止係基於佢本身嘅職權，更係有跨黨派嘅政治支持。

政策背景

政策內容與執行

1950年3月10日，沙弗魯丁透過印尼共和國廣播電台向全國發表政策演講，正式提出幣值整頓嘅貨幣政策。佢喺演講入面話，呢項政策嘅目標係透過大幅削減貨幣流通量嚟抑制惡性通貨膨脹，為新獨立國家建立穩健嘅經濟基礎。沙弗魯丁特別強調，呢個舉動並唔係想掠奪民眾嘅財產，而係全體國民為咗國家利益所必須要承擔嘅共同犧牲。

沙弗魯丁所提出嘅措施，機制係咁嘅：

• 貨幣分割：所有面額5盾及以上嘅荷屬東印度盾同「紅錢」一定要對半剪開，講緊係物理上將佢一分為二。
• 左半部分：紙幣嘅左半邊仍然係法定貨幣，但係佢嘅價值即刻貶為原面額嘅一半，有效期至8月9日下午6時。民眾需要喺1950年3月22日至4月16日期間，將呢啲左半邊嘅紙幣兌換成新嘅印尼聯邦共和國紙幣。如果過期冇兌換嘅話，市民持有嘅左半邊紙幣將會作廢。
• 右半部分：紙幣嘅右半邊唔再有貨幣功能，強制轉換做一筆為期30年、年利率為3%嘅國債。呢個舉動相當於政府向市民進行一次性嘅強制性貸款，影響最深嘅係一班持有大額現金嘅中上層階級。

呢項政策並唔係針對所有貨幣，而係專門針對面額為5盾及以上嘅荷屬東印度盾同「紅錢」；印尼共和國自己發行嘅貨幣同低過5面值嘅小額貨幣就唔受影響。呢個顯示咗政策設計嘅精準性，旨意係打擊持有大量舊殖民政府貨幣嘅富裕階層，同時保護大部份持有小面額貨幣嘅普通民眾嘅小額資產。此外，政策除左現金，同樣適用於銀行存款，所有超過400盾嘅帳戶餘額，其中一半都會被強制轉換為年利率3%嘅政府貸款。

沙弗魯丁打算通過呢項備受爭議嘅政策，試圖實現「一石多鳥」嘅目標：用新貨幣取代多種舊貨幣、減少貨幣流通量以抑制通貨膨脹、通過強制國債充實國庫，預計將會發行15億印尼盾嘅國債 。

法律基礎

「沙弗魯丁鉸剪」政策嘅法源依據係《1950年關於緊急貸款嘅第13號緊急狀態法》（印尼文：Undang-Undang Darurat Nomor 13 Tahun 1950 tentang Pinjaman Darurat）。依項法案明確規定：被剪開咗一半嘅半額貨幣，喺法律上被定性為政府對民眾嘅強制性貸款。具體執行細節就透過《印度尼西亞聯邦共和國財政部長PU第一號令》（印尼文：Surat Keputusan Menteri Keuangan RIS Nomor PU I）予以規範，呢個行政命令喺1950年3月19日頒布之後，隨即喺第二日（3月20日）晚上8時正式實施。

外匯

喺呢一個禮拜之前，沙弗魯丁仲發佈咗一項有爭議嘅政策，叫做外匯憑證（印尼文：Sertifikat Devisa，簡稱SD）。呢項政策目的係鼓勵出口同抑制進口。根據嗰份政策，每位出口商除咗獲得相當於貨物價格嘅款項之外，仲可以獲得相當於其出口價格50%嘅外匯憑證。相反，進口商就必須購買同擬進口貨物價格等值嘅外匯證。所以，進口商除咗準備相當於擬購貨物價格嘅款項之外，仲要以政府規定嘅匯率購買外匯憑證。

啱啱開始執行政策嘅時候，政府將匯率定為市場價嘅兩倍，即係面值10000盾嘅外匯憑證售價係20000盾。匯率會根據市場波動，所以呢，喺唔改變官方匯率嘅情況下，外匯賺取者（出口商）嘅有效匯率係官方匯率嘅兩倍，而外匯使用者（進口商）嘅有效匯率係官方匯率嘅三倍。咁中間嘅差額就自自然流入國庫喇。

社會同經濟影響

一張1946年版嘅25盾「紅錢」。圖片上嘅文字描述大意為：「喺1950年印尼政府實施嘅『沙弗魯丁鉸剪』貨幣政策中，呢類面額2.5盾（原文如此；理應為5盾，請參照頁首嘅圖片）及以上、殖民政府所發嘅鈔票被從中剪開：左半部價值減半後可短暫流通，右半部則被強制轉換為政府長期公債」。藏於蘇門答臘錢幣博物館。

政策推手

即時反響同短期成效

根據對當時報紙嘅分析，「沙弗魯丁鉸剪」頒布嘅政策喺社會層面上立即引發混亂嘅反應。政策宣布後嘅第二日，市場一片混亂，商店紛紛關門。由於信息傳播緩慢，消費者覺得錯愕。一星期之後，警方控制下市場秩序恢復正常。除此之外，工人亦因為擔心人工會受到政策影響而罷工，喺福利部長再三保證下，罷工得到控制。一啲地區亦發生咗犯罪案件，犯罪者聲稱受到經濟壓力同生活所迫先犯案，但大部份都好快得到解決。政策一開初遭受到公眾嘅負面反應，但係喺政府持續嘅溝通宣傳，同警方嘅幫助下，公眾逐漸理解並接受咗金融整頓政策對經濟復甦嘅必要性。

喺政策實施初期，「沙弗魯丁鉸剪」達成咗佢嘅最主要嘅目標。市場上嘅貨幣流通量大幅減少，有效遏制咗惡性通貨膨脹嘅勢頭。政府透過強制國債嘅方式，成功吸收咗部分資金，緩解咗財政壓力。及後印尼盾走強，商品價格，尤其係基本生活必需品嘅價格變返穩定，政府財政收入亦呈指數級增長，由18.71億印尼盾增至69.9億印尼盾。此外，政策實施後冇耐，韓戰爆發，全球對橡膠、錫等原材料嘅需求激增，作為主要商品出口國嘅印尼，外匯收入水漲船高。呢一個外部因素同剪鈔政策嘅短期效相得益彰，令印尼經濟喺短期內呈現穩定嘅跡象。

政策推手

國際反應

美國《時代》雜誌喺1950年3月27日嘅報導入面話，將呢個政策稱為「魔術鉸剪」（The Magic Scissors），並形容佢係一個令貨幣消腫嘅「巧妙又簡單」嘅新方法。篇報導話，除咗剪紙鈔之外，所有超過400盾嘅銀行帳戶金額亦都會有一半被強制轉為政府貸款。其實主要目的係「大幅削減印尼國內對商品嘅有效需求」，令到印尼嘅物價水平同其他國家睇齊。

長期成效同失敗

雖然短期係有成效嘅，可惜政策嘅正面影響持續唔到。經濟嘅根本問題冇解決到，政府嘅支出依然龐大，令到貨幣供應量再度攀升。去到1953年通貨膨脹重新失控，印尼國內基本商品嘅價格已經比起1950年飆升咗250%。1950年至1957年間嘅平均通脹率達到17% 。更嚴重嘅係，呢項激烈嘅政策動搖咗市場信心。好多富商同投機者預期未來經濟會持續唔穩定，開始大量囤積生活必需品，再次造成人為嘅物資短缺。呢個舉動令到普通民眾同小商人唔單止要面對飛漲嘅物價，仲要應對物資難以購得嘅困境，社會經濟秩序更加混亂。

喺蘇基曼內閣中比優素福·維比索諾取代之後，沙弗魯丁變咗做政府嘅批評者，即係政治立場改變咗，佢由內閣成員變成公開批評政府。佢喺1951年6月話，政府政策已經導致經濟衰退，只係被因為韓戰而引致嘅商品出口飆升所掩蓋。最後，「沙弗魯丁鉸剪」被視為印尼自由民主時代一系列未能從根本上解決經濟結構問題嘅改革嘗試之一，亦唔能夠成功帶領印尼擺脫殖民經濟嘅遺留困境。此外，嗰陣時嘅印尼政局極度不穩，由1950年到1959年嘅九年間，內閣頻繁更迭高達七次咁多。呢種短命嘅內閣輪替導致政府冇辦法推行連貫且長期嘅經濟改革，令到好似「沙弗魯丁鉸剪」咁激烈嘅短期政策難以解決根本嘅結構性問題。持續嘅政治動盪亦削弱咗市場信心，成為該政策未能帶領印尼擺脫經濟困境嘅關鍵政治背景因素之一。

背景

「沙弗魯丁鉸剪」政策唔單止係一項應對惡性通脹嘅激進貨幣措施，更加標誌住印尼自由民主時期嘅一系列經濟實驗開端。呢個政策雖然喺短期內穩定咗金融，但係未能改善到殖民時代遺留嘅經濟結構性失衡問題。因為咁，印尼政府旋即推行咗目的係扶植原住民（Pribumi）企業家階層嘅「堡壘計畫」（Gerakan Benteng），試圖由根源上改變經濟權力嘅局。

由於尋租行為好普遍，好多攞到進口特許權嘅原住民商人，佢地將許可證轉讓畀更加有資本實力同經驗嘅華裔商人，導致個計劃失敗。呢一個現象催生咗叫做「阿里-峇峇阿里-峇峇經濟系統）嘅非正式合作模式，其中政府向「阿里」（原住民）提供信貸同許可證，再由「阿里」同經驗豐富嘅「峇峇」（華裔商人）合作經營，希望「阿里」能夠學習對方嘅經驗同技術。呢一個由貨幣干預走向結構扶植、再到非正式合作嘅演變軌跡，突顯咗印尼建國初期喺尋求經濟獨立自主道路上所面臨嘅困境同政策嘅內在不穩定性。

喺貨幣學上，有學者將「沙弗魯丁鉸剪」定義做幣值整頓政策，本質係喺高通脹嘅環境下，諗住用削減貨幣嘅面值嚟降低佢嘅購買力，打算抑制貨幣流通。呢個同現代經濟學中只係為咗簡化計算、唔影響貨幣實際價值嘅「貨幣改值」有本質上嘅分別。由於1950年呢一次慘痛嘅經驗，當印尼政府喺2010年提議進行貨幣改值（計劃將印尼盾面額除去三個零）嘅時便，公眾嘅普遍擔憂同埋唔信任，好多民眾驚會重演「沙弗魯丁鉸剪」歷史，顯示嗰段歷史事件對印尼民眾嘅經濟心理同埋對政府貨幣政策嘅態度有長期負面嘅影響。

參考文獻

「沙弗魯丁鉸剪」作為一項對民眾經濟生活有深刻影響嘅政策，喺後來嘅政治活動中亦被用作政治宣傳嘅工具。例如，喺舊秩序時代，印尼共產黨曾經出海報，諷刺黎自馬斯友美黨嘅財政部長沙弗魯丁所推行嘅呢項貨幣剪半政策，將佢描繪成為帶畀人民帶嚟痛苦嘅根源，用呢樣野攻擊馬斯友美黨、爭取群眾支持嘅手段。