油麻地街市
22°18′30.6504″N 114°10′9.7392″E / 22.308514000°N 114.169372000°E
油麻地街市（英文：Yau Ma Tei Market）分為兩部分，其一係指位於香港九龍油麻地甘肅街20號嘅一座多層街市大廈，於1957年落成；其二係指昔日至依家歷史悠久嘅街市大廈傍嘅新填地街戶外街市市集，鄰近港鐵油麻地站、佐敦站同埋柯士甸站。
歷史
[編輯]1953年以前油麻地有兩個地方經營公眾街市，其一係新填地街市場（位於現街市原址），主要聚集雞鴨、水果同埋蔬菜檔；其二係位於上海街同埋街市街之間嘅街市街市場，主要銷售豬牛肉同埋鮮魚。戰後街市街市場的建築物因為日久失修已經殘舊不堪，1953年7月間倒塌，翌個月開始清拆，檔口遷至新填地街市場經營，隨後當局決定拆卸新填地街市場，並在原址興建一座新街市大廈以取代兩個街市的功能[1]，新街市興建期間原新填地街市場檔口遷移至街市街市場原址繼續經營，當局搭建簡單金字木架三座，以鐵皮作上蓋供商販臨時使用[2]，待新街市大廈建成後遷回。街市大廈的建築工程於1956年冬天開始，工程費約62萬港元[3]，1957年11月1日上午8時45分由時任市政局民選議員李有璇醫生主持啟用典禮，並由李夫人進行剪綵[4]。
現況
[編輯]街市大廈樓高三層，面積二萬平方呎[5]，當年由市政局管理，攤位投標出租同埋個體戶，地下出售海鮮、家禽、蔬果同埋肉類等，二樓主要係屠宰場[6]，而三樓早年係市政事務處職員宿舍以代替前九龍裁判處舊大廈內嘅宿舍，東側(面向新填地街)屬衛生局工人宿舍連廚房及餐廳，西側同南側(面向炮台街同北海街)設公眾廁所同埋16間各200平方呎設有廚房同埋陽台嘅已婚職員宿舍，天台(當年稱「假四樓」)另設一座有兩個中型住宅嘅建築物，分別係一廳兩房同埋一廳一房，亦用作職員宿舍[7]，隨著住客陸續遷出後大部份單位空置咗，現時三樓部份地方闢作辦公同埋物資貯存等用途；2000年市政局解散後，街市由食物環境衞生署接手管理。街市大廈北面甘肅街附設公共廁所。
油麻地街市大廈內外幾條街道嘅攤販都係零售海鮮、肉類、家禽、蔬菜、水果、糧食同埋日用品等。油麻地街市大廈外攤販眾多，採自由市場競爭。
圖片集
[編輯]
街市大廈內景1
街市大廈內景2
鄰近戶外街市
參考資料
[編輯]- ↑ 〈油蔴地新建街市 昨晨開幕後營業 李有璇議員主持開幕禮 致詞預祝市塲生意興隆〉。《香港工商日報》。1957-11-02。
- ↑ 〈新塡地街市塲 籌備改建 街市街市塲恢復〉。《工商晚報》。1954-04-19。
- ↑ 〈甘肅街新街市 進行興築上蓋 全部建築費六十餘萬元 共三層樓今年秋間完成〉。《香港工商日報》。1957-02-12。
- ↑ 〈油蔴地新街市 明日啓用 李有璇主持典禮〉。《香港工商日報》。1957-10-31。
- ↑ 〈油蔴地新街市 本年八月啓用〉。《工商晚報》。1957-05-13。
- ↑ 《樂遊九龍街市》，爾東、許嘉汶著，明報出版社，第49頁
- ↑ 〈油蔴地甘肅街 市塲動工拆卸 將改建三層新型市場〉。《華僑日報》。1956-06-05。
