法律罅

法律罅，顧名思義，就係法律中間嘅漏洞，亦即係法律條文涵蓋唔到嘅法外空間；

要明白，制訂法律時係有訂出大題目，但同時裡面係有好多好多小枝小節，甚至有專門解釋某啲涵義嘅章節，或者法律附件，去令到民眾解釋法律時有更明確嘅定義同指引，可惜法律條文並唔能夠做到面面俱圓，亦都要考慮好多實際因素，再加上訂出法律之前係要經過好多咨詢、審議、落實等等，所以當前雖然有大題目嘅法規，但係當中嘅枝節與枝節嘅中間，仍然會出現一啲條文中並冇明確提到嘅灰色地帶。

於是有所謂走法律罅，意思係畀對於法律有認識嘅人喺法律條文中間游走，利用法律唔清楚嘅地方，或者法律條文中間冇提到，又或者喺法律條文中搵出可以避開硬性規則，從而令件事變成合法嘅方法，去益自己或者「幫人」，避開法例規定，甚至用嚟搵食。

簡單咁假設一下可能容易啲明白：某政府宣佈即日起禁止市民售賣蘋果，表面睇即係賣蘋果就係犯法，但係條文裡面個定義係話售賣紅色蘋果就要罰款，於是啲人走去賣青色蘋果嚟避開「賣紅色蘋果」呢個硬性規則，變成合法賣蘋果，就係走緊法律罅。

例子

某個時間點之前，香港嘅禁煙條例，係指喺某啲公眾場所禁止啲人吸食燃燒中嘅煙草類物品，但未立例禁止吸食電子加熱煙，於是當時啲人就走呢啲法律罅，喺禁煙嘅公眾場所裡頭公然咁吸食電子煙。
公屋唔可以分租或者出租畀其它人，有公屋居民貪錢走法律罅，租自己間公屋出去畀街外人，唔畀政府知就得。
司機酒後駕駛有罪，所以醉酒司機走法律罅，吹波波前猛飲清水，以為可以避免酒精過量。

附註

走法律罅，若果一知半解，唔識，以身試法，會誤入歧途，終身遺憾。