泡泡交響曲

出自維基百科,自由嘅百科全書
Jump to navigation Jump to search

泡泡交響曲日文バブルシンフォニー英文Bubble Symphony),喺北美洲叫泡泡龍II英文Bubble Bobble II),係由TAITO開發嘅電子遊戲,1994年最先喺街機推出[1],1997年喺世嘉Saturn推出。

故仔[編輯]

有一日Bubby(バビー)、Bobby(ボビー)、Kulun(クルン)、Coron(コロン)四個人去咗圖書館,無意中打開咗一本畫冊。喺呢個時候,Hyper drunk將佢哋四個人變成泡泡龍並封印喺畫冊裏面。

四隻泡泡龍Bubblun(バブルン)、Bobblun(ボブルン)、Kululun(クルルン)、Cororon(コロロン)要揾辦法變返人形,同埋返去原本嘅世界…

玩法[編輯]

泡泡交響曲嘅玩法同之前嘅泡泡龍差唔多,都係要將畫面裏面所有敵人消滅。呢次加咗新嘅敵人角色,而咁多個關被分開成六個唔同嘅世界,每個世界嘅最後一關都要打大佬,同樣要飲魔法水先至能夠攻擊佢。打完一次大佬之後會出現下一個世界嘅門,通常係二揀一。

每個世界打大佬之前咁多關都隱藏住一個音符板(一個世界一隻色),儲夠三個同一隻色嘅音符板就會變出一條同顏色嘅鎖匙,要行埋去先至算真正攞到。喺第五個世界打大佬之前,要揾齊嗮四條唔同顏色嘅鎖匙,唔係就開唔到通去第六個世界嘅門,並提早出現唔好嘅結局。

喺某啲上下有窿嘅關,喺「Hurry up!」嘅警告字句出現之後,會出現其中一個透明嘅"R""O""D"泡泡("E""X""T""E""N""D"嘅泡泡都係有底色),儲齊呢三個泡泡就會出現一支棒,泡泡龍會變返做人,而剩低嘅敵人都會被消滅[2]

另外,遊戲有唔同嘅TAITO遊戲角色客串出場,包括奇奇怪界系列嘅小夜同埋太空侵略者嘅大炮等等,敵人俾佢哋掂到或者擊中就會被消滅。

參考[編輯]

  1. "Bubble Symphony". The International Arcade Museum. 喺2009-10-04搵到. 
  2. Campbell, Stuart (July 2006), "The Definitive - Bubble Bobble", Retro Gamer, Imagine Publishing (28): 58–68 

出面網頁[編輯]