洪濤 (製片人)
| 洪濤 | |
|---|---|
| 媒體工作者 | |
| 原名 | 賀洪 |
| 羅馬拼音 | Hong Tao |
| 粵拼 | hung4 tou4 |
| 花名 | 洪導、洪老師 |
| 國籍 |  中國（大陸） |
| 民族 | 漢族 |
| 出世 | 1965年4月24號 中國湖南省株洲市 |
| 屋企 | 中國湖南省長沙市 |
| 職業 | 媒體人 |
| 語言 | 普通話 |
| 代表作品 | 《我是歌手》系列 |
| 活躍年代 | 1991年－而家 |
| 經紀公司 | 湖南廣播電視台 |
洪濤（粵拼：hung4 tou4；簡化字：洪涛；1965年4月24號—），本名賀洪（ho6 hung4；簡化字：贺洪），喺湖南株洲出世，中國大陸媒體人，資深綜藝節目導演，而家湖南廣播影視集團（湖南廣播電視台）藝術委員會委員，長期做《我是歌手》同《歌手》系列節目嘅導演、總製片人同節目監製。
經歷[編輯]
洪濤入廣電行業之前喺株洲市無線電二廠做過技術工人[1]。憑住對音樂嘅熱愛，1991年進入湖南廣電系統工作，喺湖南人民廣播電台經濟頻道做節目主持人，先後參與主持過《迷你娛樂宮》、《金曲排行榜》、《越飛越高》、《友誼（中山）直播室》等節目。1998年轉入電視行業，先後做過湖南生活頻道綜藝部製片人、新聞部主任。2000年調入湖南衛視工作，係王平團隊嘅核心人物，先後參與執導《音樂不斷》同《音樂不斷歌友會》[2]。2004年以執行總導演嘅身份參與《超級女聲》嘅製作，主要負責節目創意同內容，並喺2005年開始連續兩年做《超級女聲》杭州唱區嘅總導演[3][4]。《超女》之後，洪濤又以總導演嘅身份先後參與製作《舞動奇蹟》、《第七屆漢語橋世界大學生中文比賽》等節目，都攞到唔錯嘅社會反響。
2005年，湖南衛視喺中國大陸省級電視媒體入面首創「跨年演唱會」品牌，洪濤喺2005年到2007年連續三年做跨年演唱會總導演，主打「互動+狂歡」嘅主題概念，並將衛視選秀誕生嘅天娛藝人資源運用到極致，攞到唔錯嘅收視同反響，隨即引嚟其他電視台嘅跟進。喺競爭對手鬥投入、鬥明星，湖南衛視跨年引領地位受到威脅嘅情況下 ，洪濤喺2010年同2011年再次做跨年演唱會總導演，並將同競爭頻道之間嘅藝人陣容比拼轉移到創意同製作嘅比拼上，唔單大膽用咗龔琳娜等獨具藝術表現力嘅新人，重首次喺跨年直播入面用咗粒子成像、虛擬直播等技術，啟發業界跨年新嘅創作思路。
2009年6月，時任湖南電視台副總編輯嘅王平離職，洪濤正式成為團隊負責人，並喺同年執導湖南衛視綜藝節目《挑戰麥克風》[5]。2010年，先後參與執導《2010湖南衛視春節聯歡晚會》同《2010快樂男聲》[6]。
2012年上半年，湖南衛視遇到史上前所未有嘅收視低迷期。喺呢個背景下，洪濤臨危受命，帶領團隊策劃並製作出明星模仿類節目《百變大咖秀》[7]。節目一經推出就攞到唔錯嘅社會反響，幫湖南電視注入咗一劑強心劑，並成為湖南衛視走出低迷、重振雄風嘅標誌性項目。
2013年上半年，洪濤一手創辦咗中國首檔實力歌手巔峰對決騷——《我是歌手》[8]，並先後以總導演同節目監製嘅身份連續參與四季《我是歌手》同兩季《歌手》嘅製作。喺製作過程入面，洪濤將對音樂嘅喜愛同喺電視行業多年積累嘅經驗傾注到節目入面，發掘咗埋沒幾年嘅黃綺珊、李健，捧紅咗原本喺大陸認知度唔高嘅鄧紫棋、A-Lin、徐佳瑩，亦令韓紅、韓磊、林志炫、楊宗緯、李玟等實力唱將重放光芒。《我是歌手》第一季喺2013年首播後，攞到良好嘅收視同口碑，並喺成個華語地區引起極大迴響。從第二季開始，《我是歌手》單節目每年幫湖南衛視贏到十億級嘅廣告收入，投入產出堪稱業界奇蹟。透過《歌手》系列節目，湖南電視再次喺業界樹立起難以複製嘅新標杆。
2013年下半年，湖南衛視推出親子互動真人騷節目《爸爸去哪兒》，洪濤做呢個節目嘅內容監製。憑住個人人脈同《我是歌手》塑造嘅行業形象，洪濤同總導演謝滌葵成功確定同林志穎、田亮、郭濤等藝人嘅邀約。喺監製過程入面，洪濤毫無保留咁貢獻咗智慧同節目經驗，並跟住節目組一道深入取景地，各環節親力親為，同團隊默契配合，幫《爸爸去哪兒》嘅成功貢獻咗力量。
2015年，洪濤做湖南衛視綜藝節目《全員加速中》第一季嘅監製[9][10]。2016年4月，做芒果TV《2016超級女聲》百強誕生賽嘅評委[11]。同年5月，做《2016超級女聲》百強分班賽嘅評委同《2016女聲學院》嘅「院長」[12]。
洪濤喺2010年開始先後做過湖南衛視製片人、節目製作中心副主任、節目製作中心第一副主任、節目製作中心主任、總監助理、副總監等職務，2021年5月任現職。
參考[編輯]
引用[編輯]
- ↑ 〈湖南衛視導演洪濤：我的夢，就是圓別人的夢〉. 《新華網》 (中國中文). 2014-01-05. 原著喺2015-03-30歸檔. 喺2017-09-20搵到.
- ↑ 〈《我是歌手》總導演洪濤：本想做安靜的美男子〉 (中國中文). 新文化報. 2015-03-11. 原著喺2017-09-21歸檔. 喺2017-09-20搵到.
- ↑ 〈超級模特評點超級女聲 馬艷麗會是個好評委嗎？〉. 《金鷹網》 (中國中文). 都市快報. 2005-05-12. 喺2017-09-20搵到.
- ↑ 〈超級女聲杭州唱區總導演洪濤：杭州最難是選擇〉. 《新浪娛樂》 (中國中文). 2006-06-13. 喺2017-09-20搵到.
- ↑ 〈舒高「挑戰麥克風」叫板驍驍 為春晚主持熱身〉. 《騰訊娛樂》 (中國中文). 2009-11-12. 原著喺2017-09-21歸檔. 喺2017-09-20搵到.
- ↑ 〈快男總導演洪濤：今年的比賽肯定非常精彩〉. 《金鷹網》 (中國中文). 2010-05-14. 喺2017-09-20搵到.
- ↑ 〈衛視新推《百變大咖秀》 王祖藍朱梓驍帶隊首期亮相〉. 《金鷹網》 (中國中文). 2012-06-28. 喺2017-09-20搵到.
- ↑ 〈《我是歌手》導演洪濤： 歌手有種才敢來〉. 《新浪娛樂》 (中國中文). 北京青年報. 2013-02-04. 喺2017-09-20搵到.
- ↑ 〈洪濤欽點演反派 高鈞賢不奢望成劉愷威第二〉. 《網易娛樂》 (中國中文). 2015-12-14. 喺2017-09-20搵到.
- ↑ 〈洪濤：《全員加速中》不是真人秀〉. 《網易娛樂》 (中國中文). 2015-11-05. 喺2017-09-20搵到.
- ↑ 〈超女百強誕生賽即將開戰 洪濤黃綺珊監考〉. 《新浪娛樂》 (中國中文). 2016-04-22. 喺2017-09-20搵到.
- ↑ 〈"超女"百強分班賽首場 梁翹柏鄭淳元顯導師風範〉. 《網易娛樂》 (中國中文). 2016-05-02. 喺2017-09-20搵到.
來源[編輯]
出面網頁[編輯]
