減色法

減色法

減色法係指透過將唔同顏料或者染料溝埋一齊，而達致溝出另外嘅第啲色；喺光學嘅角度，將一隻顏料或者染料溝落第隻度，係令額外嘅色光被吸走，亦即係減去某啲波長嘅光，所以叫減色法。畫畫同印刷用嘅都係減色法。

有啲色用減色法會溝唔出，呢啲叫原色，通常講有三種，叫減色法三原色，喺視覺藝術傳統上叫紅黃藍，但係喺光學同印刷會準啲咁叫佢做青、桃紅同黃；三原色溝埋，理論上應該會吸走所有嘅色光，即係理論上應該係黑，但係因為顏料同染料都唔係純色，黑其實唔會溝得出。亦有畫家認為真嘅黑色畀人嘅感覺太死，唔鼓勵用黑色顏料，而係鼓勵用互補色對撞而溝出唔係純黑嘅黑色效果，亦有鼓勵用最少嘅顏料組合溝出心目中想要嘅色，避色用太多顏料令顏色變死，所以亦唔鼓勵下下用三原色溝色，而係盡量用現成嘅色。

因為黑色溝唔出，同其他原因，印刷用嘅其實唔係三原色，而係 CMYK 四種油墨，叫四色印刷，係印彩色嘅標準方法，不過雖然四色印刷係標準，喺某啲情況亦會用到其他嘅色嚟做減色，例如理想印刷一般都唔會用標準嘅四色油墨，或者彩通有好多四色以外嘅其他色油墨，又或者彩色噴墨打印機亦通常唔會淨係用四色，前者冇意圖溝任意色，但係後兩者嘅目的係要溝色準過四色印刷。

相對於減色法嘅係加色法。