測驗等化

等化，粵拼：dang2 faa3，係教育上講到嘅一種統計程序，用嚟判定同一個考試或測驗嘅唔同版本之間，啲分數要點樣先至算對等。搵等值嘅過程，可以係單靠實際得分，但亦可以用到題目反應理論^[1]。

基本概念

想像依家有兩個人，阿明同阿珍，佢哋都要去考某執業試，目的係想得到做牙醫嘅專業資格。呢個考試一合格就可以執業，所以應考者有誘因作弊。於是監管考試嘅機構決定出兩份唔同嘅題目，考緊嘅係相同嘅內容，畀應考者做，用意係令到作弊嘅難度提高。

設阿明做卷一而阿珍則做卷二，兩份卷都係 100 分做滿分，最後結果係阿明攞 60 分而阿珍攞 70 分。係咪可以百分百肯定，阿珍對牙醫嘅專業知識掌握得好過阿明？一般認為係唔可以，因為有一種可能性，係卷一難過卷二。因此，監考機構唔可以直接比較兩者嘅分數，要做測驗等化嘅工作：佢哋要透過統計學方法，將唔同版本嘅卷嘅分數對齊，對落去某個標準尺度上，確保得出嘅分數盡可能公平。^[2]

簡單做法

平均數等化^{[註 1]}純粹係調整分數嘅頻率分佈，將組嘅分數整體上移或者下移，等其中一個卷本嘅平均分數可以同另一個卷本嘅平均數對齊，互相比較。好多人都中意用平均數等值，因為夠簡單，但呢種方法被指係缺乏彈性—特別係佢無法考慮到唔同卷本之間喺分數嘅標準差上可能存在差異^[1]。

如果兩份卷之間未至於完全唔同，某啲題目係兩份卷都有嘅，噉分析者可以觀察兩組之間喺嗰啲共同題目上有冇差異，例如卷一組喺共同題目上攞 30 分，而卷二組喺呢啲題目上則攞到 32 分，噉就有證據顯示卷二組能力真係稍高^[2]。呢啲共同嘅題目就係所謂嘅定錨題目^{[註 2]}。

統計模型

較進階嘅測驗等化處理，可以用到題目反應理論方面嘅統計模型。

睇埋

教育評估

註釋

↑ 英文：mean equating
↑ 英文：anchor items

引述

1 2 Kolen, M.J.; Brennan, R.L. (1995). Test Equating. New York: Spring. doi:10.1007/978-1-4757-2412-7. ISBN 978-0-387-94486-9.
1 2 Test Score Equating and Linking

[3] 英文：mean equating

[4] 英文：anchor items

[KolenBrennan-1] 1 2 Kolen, M.J.; Brennan, R.L. (1995). Test Equating. New York: Spring. doi:10.1007/978-1-4757-2412-7. ISBN 978-0-387-94486-9.

[assesscom-2] 1 2 Test Score Equating and Linking

[1]

[2]

[註 1]

[註 2]