港九勞工社團聯會

出自維基百科,自由嘅百科全書
跳去: 定向搵嘢

港九勞工社團聯會(The Federation of Hong Kong and Kowloon Labour Unions),簡稱勞聯,係香港第三大工會聯合組織,同時亦係政治團體;佢哋喺香港立法會有個議席,響香港區議會中,有四百民選席中深水埗區嘅一席。

歷史[編輯]

勞聯嘅歷史,長過渠歸屬嘅職工盟。響1984年11月成立,當時成員有一萬五千人,有四個勞工組織及十三個職工會加盟。隨住時間發展,勞聯已成為一個有九十一間成員會、十六個贊助團體嘅聯合會,整體會員已超過八萬人,會員人數超過咗工團總會。

截至2006年4月,佢轄下工會數目,僅次於代表建制派香港工會聯合會(工聯會)有一百五十四個,以及泛民主派香港職工會聯盟(職工盟)嘅八十六個,比親中華民國嘅港九工團聯合總會(工團總會)嘅三十九個多。

架構與屬會[編輯]

以會員大會為最高權力架構,下設常務委員會,再下設執行委員會。執委會設主席、三個副主席、秘書長及財政主任,下設財務部、勞聯智康協會、社區發展等十多個委員會。

今屆(2015-2017)常務委員會主席係吳慧儀,而勞聯響立法會嘅代表潘兆平,就係常務委員。

勞聯將旗下工會分為六個行業委員會,分別為:機電行業委員會、服務行業委員會、公務員及資助機構行業委員會、飲食行業委員會、交通運輸行業委員會及資訊電子行業委員會。旗下五十六間成員會,將按著類別成為各行業委員會成員。

同時,勞聯開東興旅行社,用收入支持會務。

政治取態[編輯]

由於響1997年回歸之後,政治形勢大變,親中華民國嘅工團總會地位大大壓縮,而做過中華民國僑選立法委員嘅工團總會主席陳恩賜,未能接掌退任嘅彭震海響立法局嘅勞工界位置,最後更黯然離開工團;作為泛民主派一員嘅職工盟,就打住反對小圈子選舉旗號,杯葛以工會一會一票形式選舉嘅勞工界立法會功能組別選舉,故此令勞聯響立法會有一展所長嘅空間。

李啟明喺進入立法會後,一直奉行親建制路線,同泛民主派有所分隔,而李鳳英接替李啟明之後,同樣奉行如此路線,但曾受到職工盟其他執委質疑。亦因為咁,李鳳英喺2012年宣布唔再連任,由潘兆平接棒。

勞聯響香港嘅政治光譜中,被劃為建制派。但較鮮為人知嘅係,勞聯其實係泛民主派職工盟八十六個屬會中嘅其中一個,而勞聯嘅代表亦係職工盟二十六名執行委員之一,而且重係當然執行委員。

同時,各泛民主派擁有立法會議席嘅政治團體,喺2007年初舉行「普選盃」足球聯賽,港九勞工社團聯會同時參加。

勞聯總部所在地—長沙灣道、界限街交界嘅深水埗區議會南昌南選區,同樣由勞聯李詠民當選。

政治參與[編輯]

勞聯一直有喺政治方面發展,1980年代,當時勞聯嘅代表人物李啟明就已經係基本法諮詢委員會委員(諮委),兼且提出過一啲政治制度嘅建議。

到90年代,勞聯開始正式參與選舉。94年區議會選舉,黃鑑權喺勞聯總部所在嘅南昌南選區贏咗第一個區議會議席返嚟,南昌南呢個位至今都重喺勞聯手上。

95年立法局選舉又同工聯會協調,喺勞工界踢走工團總會,攞到一個立法局嘅位,今時今日勞聯仍然靠同工聯會協調維持喺勞工界嘅一席。不過喺之後嘅十零年,勞聯喺選舉呈現守勢,冇再有咩大動作。

直至2011年嘅區議會選舉,勞聯派咗3個人去選,希望突破區議會得一席嘅情況,不過並唔成功,勞聯依然都係得一個區議員。

喺2016年立法會選舉,勞聯除咗喺勞工界由潘兆平出選之外,重以「搭單」嘅形式暗中出選咗2個地區。勞聯副主席譚金蓮同社區主任陳麗紅分別跟工聯會新思維嘅名單出選新界東同九龍西,不過兩人都冇表明自己同勞聯嘅政治關係。而結果佢哋兩個人所屬嘅名單都冇人當選。

出面網頁[編輯]