蛋撻

新鮮出爐嘅蛋撻

蛋撻，即係用蛋做餡嘅撻，做法係將餅皮放入圓形嘅模，倒入溝埋砂糖同雞蛋嘅蛋漿，然後放入焗爐；焗出嚟嘅蛋撻外層係鬆脆嘅撻皮，內層就係黃色瓊埋嘅香甜蛋漿。

歷史

由英國傳入，後成為香港著名地道美食。同英式蛋撻分別係，港式蛋撻嘅蛋漿只係溝水，所以又叫撻水，以嫩滑見稱，焗好嘅蛋撻內嘅蛋漿表面滑如水般反光，主張新鮮出爐趁熱食，種類除咗曲奇皮，仲有酥皮蛋撻，英式蛋撻嘅蛋漿會混入忌廉、溫呢拿等料，未注入撻殼前已先煮過，蛋撻焗好後要癱凍至室溫，亦都唔會用酥皮。

西方糕點傳入香港後，其中一部份形成西餅呢個港式概念。而蛋撻就衍生出原創嘅港式西餅椰撻。

種類

香港蛋撻以皮分為牛油蛋撻同埋酥皮蛋撻兩種：

• 牛油蛋撻撻皮光滑完整，好似一塊盆形嘅餅乾，有浸牛油香味，類似西餅嘅餡批底皮（Pie Crust），食落似曲奇，所以又叫曲奇皮蛋撻。
• 酥皮蛋撻撻皮係一浸浸薄酥皮，近似西餅嘅牛油酥皮（Puff Pastry）；但因為用咗豬油（Lard），出來嘅酥皮會粗啲；因為撻皮厚啲，所以餡都會少啲。

亦有喺蛋漿入面混入其他料，例如奶撻、薑汁蛋撻、蛋白蛋撻、朱古力蛋撻同燕窩蛋撻等等。

文化

蛋撻作為香港文化嘅標誌之一，亦喺多個大眾娛樂同文化作品中出現。例如：

• 《牛油蛋撻》，有一首歌以牛油蛋撻作為歌詞嘅歌為人熟知，並無正式歌名，歌詞有多個些微唔同嘅版本，有個版本（大約二千年楊紹鴻、張國林填詞版本）當中一部份係「滑滑劣劣　似豬膏咁滑　牛油蛋撻無咁滑　撩人面珠　我想錫一啖　嘩　味香滑如食新鮮蛋撻」。
• 《光輝歲月》為一個以香港回憶作為賣點嘅遊戲，遊戲入面其中一個道具係蛋撻。

睇埋

• 葡撻