聯邦議會，通稱澳洲國會，係澳洲聯邦政府嘅兩院制立法機構。澳洲國會嘅體制好大程度上係跟足英國嘅西敏制，但亦有部分受到美國國會選舉制度嘅影響。根據《澳洲憲法》第一章，國會由三部分組成：澳洲君主、澳洲參議院同埋澳洲眾議院。當君主唔喺澳洲嗰陣，佢任命嘅聯邦總督就會代表君主履行佢嘅職能，包括君主作為國會一部分嘅立法職能。
