澳門培正中學

出自維基百科,自由嘅百科全書
跳去導覽 跳去搵嘢
澳門培正中學
地址
Flag of Macau.svg 澳門高士德大馬路7號
明細
私立學校
校訓至善至正
宗教聯繫基督教浸禮宗
成立1889年
校區望德堂區
校監羅永祥
校長高錦輝
教師人數約240人
中小幼共15級
學生人數約3,200人
教學語言中文英文
約7,500平方公尺
校色    紅色、    藍色
電話+853 2852 9333
傳真+853 2833 9056
網站

澳門培正中學英文Pui Ching Middle School葡萄牙文Escola Secundária Pui Ching)係澳門一間以母語授課嘅中文中學。原本係廣州培正中學澳門開設嘅分校。

1938年,因為抗日戰爭嘅關係,廣州培正全體師生遷校到澳門,等培正唔使因為戰亂而停辦,呢個又被視為澳門培正嘅開始。

歷史[編輯]

早期[編輯]

1889年,李濟良、馮景謙、廖德山、李賢士同楊海峰等人為實現興辦新學,籌劃興辦華人基督教學校。融入基督教教義,並按照《聖經十誡,免學童入塾跪拜偶像。學校取名「培正書院」,意義取「培植教會子弟,免送俗塾,有失正虞也。」創校頭30年,多次因財政困乏差啲停辦。

1907年,培正喺廣州東山買地起校舍,為長遠辦學作出計劃。直至1915年,學校陷入嚴重財困。張立才同張新基發起「培正維持會」,楊海峰曾經講:「寧我儕先培正而死,勿令培正死於我儕之手。」

近代[編輯]

1918年,培正校友黃啟明接任校長,並受校董會命令於創校30週年期間前往國外籌款十五萬,以作培正未來發展之用。

九一八事變後,日軍屢犯中國國境,培正員生負起抗日救國職志,組織宣傳隊宣揚愛國思想。

七七盧溝橋事變後,日軍壓境,培正遷校址至鶴山

1938年1月,學校由廣州遷址至澳門,以保培正教育事業。戰火期間,喺澳門、鶴山、坪石、桂林湖南江西都有培正員生上堂,保持教學質素。培正員生喺外面更投入抗戰工作,包括繼續組織宣傳隊傳播愛國思想、向難童提供免費學額嚟幫佢哋學業等、發起「每人每日一仙捐款運動」、「節衣運動」及「募集寒衣運動」。

1939年,黃啟明校長喺香港過身。

1945年8月,抗戰勝利,培正隨即進行復員工作,澳門員生分批返返廣州。幾個月之間,廣州同香港兩地校舍之後回收。

澳門方面,繼續以分校形式留設小學,由趙璧蘭(黃啟明校長遺孀)出掌主任。

1947年,澳校重設初中。

1949年,為慶祝成立十周年紀念,特新建教室四間。

現代[編輯]

1950年,喺澳門嘅「私立廣州培正中學澳門分校」正式正名為「澳門培正中學」,李炎玲出任校長。

1953年,李炎玲校長調職,傅漁冰接任校長,並喺同年開辦高中。

1962年,傅漁冰校長離職,林湛繼任校長。林湛校長在任期間,因澳門受經濟衰退同社會動盪不安嘅時局影響,師生合力喺困難中謀求發展,嚟穩定校務。同年,澳校率先改中學五年制,由中一開始實施,並喺1967年秋開辦中六(大學預科)課程。林湛校長籌建「七十五周年紀念堂」,喺1972年啟用。

1974年,林湛校長榮休,鄺秉仁接任校長,並提出三大辦學方針,嚟配合學校發展需要。包括:

  • 「提高教學質量」:為首要任務,課程設置參照港澳兩地,按實際需要制訂施行。
  • 「改善學習環境」:先後籌建D座課室大樓、興建「創校九十周年紀念培正大樓」同E座教學大樓「創校九十五周年紀念堂」。
  • 「保持嚴謹校風」:重視同學嘅品德教育,以基督教信仰為基礎,服務社會為目標,要求學生德、智、體、群、靈五育並重,嚟發揚校風傳統。

1976年,鄺秉仁校長獲澳督委任為第一屆立法會議員,喺1980年連任,喺1981年獲葡國總統頒授公共教育文職功績司令級勳章,嚟表彰佢對澳門教育嘅貢獻。

1985年,鄺秉仁校長榮休,康顯揚接任校長,秉持澳門培正辦校三大方針,並喺原有嘅基礎上繼續發展。

1995年,康顯揚校長榮休,李祥立接任校長,並喺培正百年輝煌嘅基礎上,銳意提高母校師生嘅學術水平,支持教師專業發展,出版《培正學報》;鼓勵師生合作,開展各科嘅研究型課程,並提倡利用資訊科技輔助教學,建立各科嘅網上學習平台。

當代[編輯]

2003年,澳校以「繼續開來,與時並進」嘅理念,訂定「發展優質教育,創建美好校園」發展計劃。

2006年,李祥立校長榮休,高錦輝接任校長。

2012年,開始起FABLAB創新科教館,並開始有設計科學課程。

2015年夏,C座教學大樓進行外牆瓷磚翻新工程,由啡色改成黃色。

現況[編輯]

規模[編輯]

澳門培正包括幼稚園、小學及中學部,全校學生人數超過三千二百人,教職員逾二百四十位。

學制上,幼稚園實施三年制、小學六年制同初、高中各三年制。澳門培正係一間文法中學,實行母語教學。

畢業生以升學為主,每年有95%以上考入國內外同澳門等地嘅大專院校深造。

幼稚園中學各級設有信、望、愛、善、正五班,其中高中嘅信、望係理組班,愛、善係文商組班,正係文理組班。

培正秉承「至善至正」嘅校訓,堅持「德智體群美靈,六育均衡發展」嘅教育目標,積極貫徹「提高教學質量,改善學習環境,保持嚴謹校風」嘅辦學方針。

校址位於高士德大馬路,佔地七千五百平方公尺。

環境及硬件設施[編輯]

校園中央矗立有A座行政大樓,原本係盧家住所,古色古香,建築別具風格,俾中國政府列為建築及文化遺產。先後興建嘅五棟教學大樓,每層走廊設有花槽,綠化同美化校園。

校園內設置有各種設施,供教學同活動嘅用途,包括:

中小幼各班課室設有投影機、電腦、無線Wifi盒等,方便教學。

目前,澳門培正根據「創建美好校園」發展計劃,積極更新教學硬體設備,已經完成E座教學大樓嘅翻新工程,B座重建工程亦已經竣工同命名為「創校115周年紀念大樓」。自2007年起,喺原來小食部同F座嘅位置興建十層高嘅H座,喺2009年落成使用並命名為「創校120周年紀念大樓」。

社團及組織[編輯]

級社[編輯]

成立級社係培正嘅傳統,每一個畢業班年級都喺小五年級成立級社,社名由穗、港、澳三地嘅培正學生投票決定,社旗由港澳學生以習作方式輪流設計。設立級社嘅目的係要薪火相傳,並聯繫畢業後嘅舊生,令大家聚首一堂。


(年份按照香港培正中學畢業生嘅畢業年份)

管理架構[編輯]

  • 校監:羅永祥
  • 校長:高錦輝
  • 副校長兼總務主任:郭敬文
  • 副校長兼教務主任:陳敬濂
  • 德育主任:梁永棠

學校標識[編輯]

校色[編輯]

校色分為紅色同藍色,學生俾人稱為「紅藍兒女」,而學校嘅優良傳統俾校友稱為「紅藍精神」。

  • 紅色:代表感性——澎湃嘅熱情,充滿熱誠,火熱嘅心,特別係基督嘅愛心。
  • 藍色:代表理性——冷靜機智,週到嘅思考同策劃,堅持,避免衝動同魯莽。

校訓——至善至正[編輯]

有中西文化合璧嘅意味。

基督教意義

我所命爾之言,當聽而守之,致行爾 神耶和華所視為善為正者,而享福祉,爰及子孫,歷世靡暨。

——聖經文理和合本申命記》12:28

耶和華乃善乃正,故以道示罪人兮。

——聖經文理和合本詩篇》25:8

儒家思想意義

  • 「至」:一有「最和極」意思,最正同最善嘅事係培正人追求嘅目標。二係「達到或追求」意思,只要係培正人,都要終身追求「善與正」。
  • 「善」:就好似大學句「止於至善」。

校徽[編輯]

釋義:中間嘅書本圖案「至善至正」校訓。紅色嘅圓盤代表熱頭,每個方向有七道光芒指向四方,代表火熱嘅心。圍住光芒嘅正方形,代表學校成員做事要有規範同原則或抱負,唔可以任意而行。而四條線亦可喻為德、智、體、群四育。四線等長相連者,示四育並重。藍色同四粒星星代表無垠嘅宇宙,喻要放開懷抱,目光遠大,要好似星星噉樣自發光耀喺長空。再向外面係中文校名同英文校名,循圈而列。最外面嘅紅色圓圈表示靈活處事,內裏嘅正方形則代表做人嘅原則,外圓內方,教人既要處理好人際關係,又需堅守原則,唔可以隨波逐流。

校歌[編輯]

荷蘭(原英國)作曲家Henry Litolff英文Henry Litolff作咗一首《Concerto Symphonique No.3》,其中第四樂章Furioso開始由急促鋼琴同管弦樂競美下,引出管弦樂奏出雄壯培正校歌嘅旋律,隨後鋼琴用變奏方式將呢個旋律發揮落去,全長約七分半鐘。作者從英國監獄逃咗出來,得到荷蘭庇護,所以就感激咁將荷蘭國歌嵌入呢段樂段,算係目前史上能獲得有關校歌完整旋律嘅唯一音樂。

呢首國歌係1815年嘅得獎作品,作為紀念1781年英荷北海海戰,原名《Wien Neerlands bloed door d'adeeren vloeit》,作者係定居阿姆斯特丹嘅Johann Wilhelm Wilm英文Johann Wilhelm Wilms,後來被選為荷蘭國歌,而家已經廢咗。

目前三地學校一般只唱誦第二版校歌嘅第一段,用廣州話唱。

歌詞:

培正培正何光榮 教育生涯慘淡營

培後進兮其素志 正軌道兮樹風聲
萬千氣象方蓬勃 鼓鑄群才備請纓

愛我培正謨謀遠 永為真理之干城

校旗歌[編輯]

喺培正同學進行如聚會、比賽等活動時作激勵士氣嘅用途,相當於啦啦隊歌。

歌詞:

紅藍色旗常高飛起  因培正學校永不死

Ray Ray 我培正培正 Ray Ray 我培正培正

Ray Ray 我培正   Ray Ray Ray

校園風貌[編輯]

歷任校長[編輯]

任數 任期
1 李炎玲 1950年-1953年
2 傅漁冰 1953年-1962年
3 林湛 1962年-1974年
4 鄺秉仁 1974年-1985年
5 康顯揚 1985年-1995年
6 李祥立 1995年-2006年
7 高錦輝 2006年-
(只列出喺澳校從廣州分校獨立經營後上任嘅培正校長)

知名/傑出校友[編輯]

  • 呂蓉茵:2008年澳門小姐冠軍
  • 趙倪生:澳門著名歌手
  • 顧家輝GBSBBSMBE:香港著名作曲家
  • 陳輝陽:香港著名作曲家
  • 林兆明:國家一級演員,粵語講古
  • 祖絲(何芷晴):澳門著名歌手、演員、司儀、澳門立法會議員何潤生大女、金沙中國有限公司旗下威尼斯人澳門股份有限公司企業傳訊部公關及英皇教育首席生物科名師
  • 梁君培基督教牧師基督教中福教會牧師。
  • 繆家濤:國際獅子總會中國港澳三0三區前主席、香港鑪峯獅子會前主席、香港品牌發展局成員
  • 李峻一:著名作曲家及填詞人
  • 黃冬柏:新會商會中學校長
  • 甘國衛:香港電視藝員
  • 張偉犖:香港大學計算機科學系系主任(1967年畢業)

出面網頁[編輯]