無奴學派
無奴學派，亦稱為「無奴派」，係喺中國古代社會研究中共同主張「中國歷史冇奴隸社會」嘅一個學派，亦係中國歷史學最重要嘅學派之一。無奴派嘅「奴」字，即係指「奴隸社會」，唔係指「奴隸」或「奴隸制」。呢個學派因學派成員有相同嘅「無奴主張」而得名。係一個「問題性學派」。呢個學派喺1980年代誕生，始創者係黃現璠。
學派代表觀點[編輯]
- 黃現璠嘅觀點：
唐以前同唐末宋初，僮族嘅社會係奴隸社會抑或封建社會，定係氏族部落社會，值得提出研究。依漢族社會發展史，由氏族部落社會，經奴隸社會，入到封建社會。但社會性質嘅決定，應該根據社會生產力、經濟、政治等發展嘅實際情況而定，唔可以公式化機械嘅硬套。唐以前同唐末宋初，認為僮族社會係奴隸社會抑或封建社會，文獻上都冇記載，凈係氏族部落社會尚可由各方面材料加以推斷[1]。
領主制封建社會之構成，有啲喺奴隸社會崩潰之後，有啲喺氏族部落社會嘅基礎上，要睇具體嘅各個社會歷史發展情況而定，唔可以一般嘅公式化硬套。馬克思嘅經典著作，對呢啲記載好多，即喺《資本主義生產前各形態》一書已一再提及。所以，學術主張，理應百家爭鳴，唔可以隨便戴上違反馬列主義抑或唔符合社會主義發展規律嘅高帽。睇過馬克思著作嘅，首先應該認同呢點，先好討論問題。桂西土州縣喺儂智高起義前，唔係奴隸社會，而係氏族部落聯盟社會[2]。
三點結論：一、世界古代各國歷史發展，絕大多數都冇經過奴隸社會，直接近入封建社會，即希臘、羅馬典型奴隸社會，亦唔係一開始就直接進入奴隸社會。二、由無階級嘅社會進入有階級嘅社會，最初被壓迫剝削嘅階級係農奴，唔係奴隸。農奴嘅產生，比奴隸早。因為農奴制嘅封建社會制度，最容易同農村公社制度結合起來。農奴產生嘅條件，亦比奴隸簡單，故首先發生。三、家庭奴隸制嘅產生，亦比較容易。世界各國古史都有。一啲人成日誤會佢哋係奴隸社會，多半由此。但制度係現象，唔係本質，係一回事，達唔達到奴隸社會，又係另一回事，唔可以相提並淪[3]。
- 張廣誌嘅觀點：
事實上，唔經過奴隸社會，見之於廣大地區，係通例。經過奴隸社會，見諸極個別地區，係變例。以變例為通例，係以偏概全[4]。
- 胡曲園嘅觀點：
商、周社會中嘅奴隸數量都係好少嘅，佢哋喺生產上冇主導地位，反之，喺生產中佔主導地位嘅，係公社農民。前面講過，公社農民並唔係奴隸，既然係噉，點可以話商、周係奴隸社會呢？古代希臘喺公社解體之後，由於奴隸勞動得到高度發展，先被一啲人為做奴隸社會，但喺中國古代並唔存在呢樣嘢[5]。
學派特點[編輯]
「無奴學派」有住三個顯著特點：一爲學派代表人物中好多係地方學者；二爲學派主將中唔少係長期從事先秦史同民族史研究嘅專家；三爲學派精英中部分係長期從事師範高等教育嘅教授。
呢啲學者長期從事師範高等教育，對唔啱中國古代史客觀事實嘅「奴隸社會」嗰啲嘢，寫入歷史教科書尤爲反感，深惡痛絕呢種貽害後學嘅「偽知識」誤導一代代青年。因此，職業道德同學問操守促使佢哋紛紛挺身而出爲真理而戰。
學派代表人物[編輯]
- 黃現璠——學派嘅始創者
- 張廣誌——「無奴主張」最重要嘅傳播者之一
- 黃偉城——「無奴主張」重要嘅傳播者之一，黃現璠嘅學生
- 黃增慶——黃現璠嘅學生
- 胡曲園
- 莫金山——「無奴主張」重要嘅傳播者之一，黃偉城同張廣誌嘅學生
- 祝中熹
- 韋文宣
影響[編輯]
「無奴學派」形成後，家下進入21世紀最初10年，有好多史學者勇敢地放棄舊陣時嘅觀點，基本認可「中國無奴隸社會說」。好似何茲全先生放棄咗魏晉封建論，認為中國無奴隸社會。「有奴論」嘅郭沫若派四大幹將：白壽彜、楊寬、吳大琨、田昌五皆相繼轉變立場，放棄過往嘅「古史分期五種形態」定式，贊同「無奴主張」。