營銷情報

營銷情報，或者叫市場學情報，係營銷上嘅一種工作，講緊要收集、分析同埋使用數據，嚟支援營銷上嘅決策。喺二十一世紀初，營銷包括嘅範圍好廣泛，重點係要確保自己嘅服務或者產品得到消費者關注，而且要係正面嘅關注，營銷情報做嘅就係運用數據嚟支援呢樣工作。

例如喺二〇二五年，美國嘅高德納諮詢公司噉樣嚟描述營銷情報嘅概念^[1]：

營銷情報包括搜集、分析同埋詮釋描述營銷活動同消費者行為嘅數據，從而幫企業做明智嘅決策。佢哋用嘅數據，會描述市場有咩趨勢、競爭對手係點嘅樣、消費者嘅特性同埋對行為嘅洞見等。

呢個過程中時常會用到各種嘅網頁相關工具。

基本定位

品牌推廣建立意思，而營銷跟住就將呢啲意思傳達畀適當嘅受眾睇。^[2]

營銷情報工作係為咗營銷而做嘅。營銷嘅其中一個重點，在於產品或服務嘅提供者用各種方法，令到消費者知道提供者能夠有效噉滿足佢哋嘅需要同慾望，途中會用到品牌推廣^{[註 1]}等嘅手段^[3]。