牛油奶

出自維基百科,自由嘅百科全書
鮮奶(左)同牛油奶(右)。牛油奶杰過鮮奶,所以玻璃杯留低嘅奶漬明顯過裝鮮奶嘅杯。

牛油奶(英文:Buttermilk),音譯白脫奶,係一種杰身得嚟帶酸味嘅牛奶飲品

牛油奶最初係指製造發酵牛油剩低嘅液體。依種牛油奶依家會特別指明叫traditional buttermilk。

另一種牛油奶叫cultured buttermilk,係以種咗乳酸菌嘅牛奶發酵而成,酸味非常強烈。可以製作呢種牛油奶嘅乳酸菌有兩種,分別係乳酸球菌德布律克氏乳酸菌保加利亞亞種;用後者發酵嘅牛油奶會更加酸。無論係氣候溫暖定寒冷嘅地區都有國家生產呢種牛油奶。

仲有一種速成版牛油奶叫acidified buttermilk,製作方法係將檸檬汁或者白醋加落牛奶再靜置起碼十分鐘,等到牛奶有少少凝結為止。

牛油奶可以就咁飲或者用喺烹飪。用佢嚟醃肉可以令調味料更易滲透舊肉,而且啲肉(特別係雞肉同豬肉)會更柔軟多汁。

營養成分[編輯]

一杯(約237毫升)牛油奶有99卡路里同2.2克脂肪(全脂奶就有157卡路里同8.9克脂肪)。除此之外,牛油奶亦含有各種維他命、鉀、鈣質同少量磷。

睇埋[編輯]