跳去內容

特別興趣

出自維基百科，自由嘅百科全書
(由狹窄興趣跳轉過嚟)
呢幅畫描繪想像中一位自閉症人士對貓有特別興趣。

特別興趣（粵拼：dak6 bit6 hing3 ceoi3），又叫特殊興趣或者狹窄興趣，係自閉症譜系障礙（ASD）相關討論上成日提到嘅概念，指自閉症譜系人士常有嘅高度專注興趣[1]。自閉症譜系其中一個特徵，就係患者對某啲特定嘅嘢有強烈嘅興趣，強烈過一般嘅興趣[2]，可能會佔用佢哋大部份嘅休閒時間。有特別興趣嘅人可以一路做佢有興趣嗰樣嘢，做到一路超專注幾個鐘咁耐，想盡力學習關於嗰個課題嘅嘢[3]，會收集相關嘅物品[4]，仲會將佢嘅特別興趣融入玩耍[5]同藝術創作入面[6]。

特別興趣有異於超專注[7]：超專注係短期嘅，指一個人高度專注於某啲嘢之上，可能維持幾日到幾個月不等，任何人都可能有呢種情況，亦常見於 ADHD 人士[8]，而特別興趣就係自閉症譜系嘅特徵，通常會起碼持續幾年咁耐[9]。

發展

[編輯]
二〇一八年影到有人喺度搜集益蟲嘅標本。患有 ASD 嘅人成日會猛咁收集有興趣嘅物品[註 1]。
睇埋：學者症候群同雙重特殊

研究估計，大約 75 至 90% 嘅自閉症人士會有特別興趣[4]，當中有啲研究仲話個發生率去到 95% 咁高[10]。特別興趣通常喺一至四歲之間開始出現，但有時亦可能要等到成年先出現[4]。特別興趣好多時初頭係對某樣嘢著迷，之後就發展成對某個主題嘅興趣——想像一個處於自閉症譜系嘅細路，初時對玩具火車有興趣，之後發展成對火車同鐵路有特別興趣，又或者一個噉嘅細路玩寵物小精靈，特別鍾意蟲系（望落似昆蟲）嘅精靈，大個啲就變成對昆蟲有特別興趣，仲走去勁研究昆蟲學[2]。

特別興趣嘅發展，有以下呢啲特性：

  • 特別興趣可能會隨時間改變，亦有可能維持一世[11]。
  • 二〇一四年有研究發現，自閉症人士平均有兩個特別興趣，平均持續十三年[2]。
  • 二〇二一年又有研究發現，受訪者報告嘅「目前特別興趣」平均有九個[12]。

喺一九八〇年，特別興趣成為 DSM-III 列出嘅「自閉症其中一個特徵」，史上首次公認係自閉症嘅特徵之一[2]。到二〇二四年，喺最新嘅 DSM-5-TR 入便，特別興趣仍然被列為自閉症診斷特徵之一，份文件係噉寫嘅[13][註 2]

（特別興趣係指）高度受限、固定嘅興趣，其強度或者焦點異常，譬如係對唔尋常物件有強烈嘅依附或者成日諗住呢啲物件，專注、過分局限同持續嘅興趣。

處於自閉症譜系嘅人發展出特別興趣，常見嘅係基於交通工具、動物、運動同流行文化[14]，尤其係呢啲事物當中一啲容易數字化嘅嘢，例如係收集足球員嘅閃咭以及背誦有關佢哋嘅統計數字呀噉。

影響

[編輯]
睇埋：專家知識

自閉症譜系人士投入自己嘅特別興趣，可以感受到巨大嘅喜悅[15]，好多自閉症人士都會花大量時間落去追求自己嘅特別興趣[4]，而對大人嚟講，參與特別興趣對精神健康有正面影響，可以提升自我肯定，仲可以用嚟處理壓力。[10]

特別興趣有時可能會影響一個人生活嘅其他範疇，譬如係學業[2]。對兒童嚟講，處於自閉症譜系嘅細路將自己嘅特別興趣融入學習，可以改善學習成果[14]，令到佢哋更專心學嘢[16]，仲可以用嚟教導佢哋一啲正面嘅行為[17]。例如：

  • 研究顯示，學生寫一啲關於佢哋特別興趣嘅文嗰時，寫作質素會好咗[14]。
  • 二〇二二年有研究顯示，25% 有工作嘅自閉症人士會選擇喺佢哋特別興趣嘅範疇做嘢，而有就業相關特別興趣嘅大人可能有更好嘅就業前景[10]。自閉症人士亦有可能喺佢哋感興趣嘅範疇度成為專才或者老行專[18]。

等等。

社交

[編輯]
睇埋：資訊轟炸

特別興趣有可能導致社交上嘅問題，原因有好多：如果一個有 ASD 嘅人猛咁只講某個話題嘅嘢，可以令到其他人喪失同佢講嘢嘅興趣，尤其係如果佢資訊轟炸（係噉勁講大量有關某樣嘢嘅資訊）對話就可能會變得單向[2][19]。有部份嘅特別興趣可能會畀人覺得佢怪，譬如想像某個人對足球隊有興趣未必會畀人覺得佢怪，但係如果係對電塔有興趣其他人可能比較難接受。自閉症人士由於某啲原因（例如係因為佢哋嘅特別興趣畀人笑）而意識到呢點[10]，可能會特登唔講佢哋嘅特別興趣，掩飾自己嘅自閉症障礙[14]。特別興趣亦可能同一個人嘅年齡唔相符[2][20]。

特別興趣亦有可能用嚟幫 ASD 人士培養社交技巧[14]：好多人都主張，只要興趣唔阻礙生活其他方面，自閉症人士大可以培育自己嘅特別興趣[21]；除此之外，自閉症人士亦有可能靠住特別興趣同他人建立關係——佢哋假如搵到同自己有共通興趣嘅人，就可能會好好傾，結交到感情非常深厚嘅朋友[22][23]。

睇埋

[編輯]

註釋

[編輯]
  1. ↑ 不過鍾意收集物品唔表示一個人有自閉症：一個人係咪有自閉症譜系障礙，係要睇勻多種症狀嘅。
  2. ↑ 英文原文："highly restricted, fixated interests that are abnormal in intensity or focus (e.g., strong attachment to or preoccupation with unusual objects, excessively circumscribed or perseverative interests)."

引咗

[編輯]
  1. ↑ "Special interests". Ambitious about Autism (英文). 喺2024-05-02搵到.
  2. ↑ 2.0 2.1 2.2 2.3 2.4 2.5 2.6 Armstrong, Kimberly Ann (2014-10-17). "Interests in Adults with Autism Spectrum Disorder". summit.sfu.ca (英文). 喺2024-05-02搵到.
  3. ↑ https://www.autismparentingmagazine.com/autism-children-special-interests/. Original release on April 29, 2024. Retrieved on May 19, 2024.
  4. ↑ 4.0 4.1 4.2 4.3 Caldwell-Harris, Catherine L.; Jordan, Chloe J. (2014-01-01). "Systemizing and special interests: Characterizing the continuum from neurotypical to autism spectrum disorder". Learning and Individual Differences. 29: 98–105. doi:10.1016/j.lindif.2013.10.005. ISSN 1041-6080.
  5. ↑ Spiker, Michael A.; Lin, C. Enjey; Van Dyke, Marilyn; Wood, Jeffrey J. (May 2012). "Restricted interests and anxiety in children with autism". Autism (英文). 16 (3): 306–320. doi:10.1177/1362361311401763. ISSN 1362-3613. PMID 21705474.
  6. ↑ "Art and Identity on the Spectrum". YES! Magazine (美國英文). 喺2024-05-02搵到.
  7. ↑ Huang, Claire (2022-08-31). "A Snapshot Into ADHD: The Impact of Hyperfixations and Hyperfocus From Adolescence to Adulthood". Journal of Student Research (美國英文). 11 (3). doi:10.47611/jsrhs.v11i3.2987. ISSN 2167-1907.
  8. ↑ "Hyperfixation: What Is It & How to Manage It". Thriveworks (美國英文). 2024-02-02. 喺2024-05-22搵到.
  9. ↑ Wakeman, Caressa (2022-06-28). "May 14, 2024 | Neurodiversity in Engineering" (美國英文). 喺2024-05-15搵到.
  10. ↑ 10.0 10.1 10.2 10.3 Bross, Leslie Ann; Huffman, Jonathan M.; Hagiwara, Mayumi (2022-01-01). "Examining the special interest areas of autistic adults with a focus on their employment and mental health outcomes". Journal of Vocational Rehabilitation (英文). 57 (3): 289–305. doi:10.3233/JVR-221218. ISSN 1052-2263.
  11. ↑ Davey, Lydia (2020-05-31). "Using the special interests of autistic children to facilitate meaningful engagement and learning". Good Autism Practice (GAP). 21 (1): 43–64.
  12. ↑ Nowell, Kerri P.; Bernardin, Courtney J.; Brown, Cynthia; Kanne, Stephen (August 2021). "Characterization of Special Interests in Autism Spectrum Disorder: A Brief Review and Pilot Study Using the Special Interests Survey". Journal of Autism and Developmental Disorders. pp. 2711–2724. doi:10.1007/s10803-020-04743-6.
  13. ↑ CDC (2022-11-02). "Diagnostic Criteria | Autism Spectrum Disorder (ASD) | NCBDDD | CDC". Centers for Disease Control and Prevention (美國英文). 喺2024-05-02搵到.
  14. ↑ 14.0 14.1 14.2 14.3 14.4 Winter-Messiers, Mary Ann (2007). "From Tarantulas to Toilet Brushes: Understanding the Special Interest Areas of Children and Youth With Asperger Syndrome". Remedial and Special Education. 28 (3): 140–152. doi:10.1177/07419325070280030301.
  15. ↑ Winter-Messiers, Mary Ann (2007-05-01). "From Tarantulas to Toilet Brushes: Understanding the Special Interest Areas of Children and Youth With Asperger Syndrome". Remedial and Special Education (英文). 28 (3): 140–152. doi:10.1177/07419325070280030301. ISSN 0741-9325.
  16. ↑ Gunn, Kerry C. M.; Delafield-Butt, Jonathan T. (2016-01-01). "Teaching Children With Autism Spectrum Disorder With Restricted Interests: A Review of Evidence for Best Practice". Review of Educational Research (英文). 86 (2): 408–430. doi:10.3102/0034654315604027. ISSN 0034-6543.
  17. ↑ Wood, Rebecca (2021-05-01). "Understanding Autism, ITS, and Special Interests Through the Experiences of Adults Who Self-identify as Autistic: A Qualitative Study". Journal of Autism and Developmental Disorders (英文). 51 (5): 1417–1428. doi:10.1007/s10803-020-04743-6. ISSN 1573-3432.
  18. ↑ "The importance of special interests in autism". Spectrum | Autism Research News (英文). 2023-05-11. 喺2024-05-02搵到.{{cite web}}: CS1 maint: url-status (link)
  19. ↑ https://www.andnextcomesl.com/2022/09/infodumping-in-autism.html
  20. ↑ Motokane, Christine (2024-04-30). "How Pressure to Be 'Age Appropriate' Can Harm Autistic People". The Mighty (英文). 喺2024-05-10搵到.
  21. ↑ Zukor, Leslie A. (2023-04-27). "Autistic People Should Embrace Our Special Interests". The Mighty (英文). 喺2024-05-10搵到.
  22. ↑ Long, Rebecca-Eli M. (2024). "Access Points: Understanding Special Interests Through Autistic Narratives". Autism in Adulthood. doi:10.1089/aut.2023.0157.
  23. ↑ Hobbs, Laura; Hartley, Calum; Bentley, Sophie; Bibby, Jordan; Lauren, Bowden; Hartley, Jackie; Stevens, Carley (2020). "Shared special interest play in a specific extra-curricular group setting: a Minecraft Club for children with Special Educational Needs". Educational and Child Psychology. 37 (4): 81–95. doi:10.53841/bpsecp.2020.37.4.81.

拎

[編輯]
由「https://zh-yue.wikipedia.org/w/index.php?title=特別興趣&oldid=2362281」收