猩紅習作

至初封面

歇洛克奇案開場

猩紅色調

猩紅習作，出名偵探小說，英國醫生兼作家柯南道爾寫㗎，一八八七年出版。呢本書帶出世界知名孖寶，福爾摩斯同華生醫生。故事由華生敍述，講福爾摩斯同其他人物。福爾摩斯四部長篇至早一篇。唐字書名有好幾個，有歇洛克奇案開場，大清時林杼魏易同譯。之後有血字研究、血字的研究、有暗紅習作、猩紅的習作。林杼出身福建閩縣，魏易出身浙江仁和，譯名影響後來翻譯，主角福爾摩司同華生，譯名出自佢哋手筆。

寫嗰陣佢廿七歲，重未搬去倫敦，重喺衡州郡南海鎮做緊醫生。柯氏以寫得快出名，作品一氣呵成，寫咗三個禮拜，一完成就唔再改，但喺寫作之前，反用幾個月先搜集資料。

至初投搞並唔順利，一次過登又太長，連載又太短。至終佢稿費連版權以廿五鎊賣斷出去，一年後喺必頓聖誕年刊，同其他作家作品登出來，並無乜反應。一八八九年獨立出版，大受歡迎。話雖受歡迎大賣，賣斷都無額外收入。到第二部四簽名，佢先開始豐收。之不過，福爾摩斯太過受歡迎，就算寫短篇都好多功夫，無乜時間寫心頭好，作者至終頂唔順，七年後，寫到偵探、大奸角，二人同歸於盡。

部書分成上下卷。上卷七章先帶出兇案結局，用計捉兇手。下卷七章講兇殺原因，點推斷出來，當中有摩門教描述。

書名

英名叫A Study in Scarlet。解釋關鍵喺上卷第四章尾。

「

I might not have gone but for you, and so have missed the finest study I ever came across: a study in scarlet, eh? Why shouldn't we use a little art jargon.

」

意思大概咁。無咗你，我或者唔會去。就咁，係咪錯失一生至好練手良機，猩紅習作呢。就咁何妨用少少美術用語。意思話猩紅習作係美術用語。接住落去。

「

There's the scarlet thread of murder running through the colourless skein of life, and our duty is to unravel it, and isolate it, and expose every inch of it.

」

意思話生活似平淡無色一團綫，而兇案有如鮮紅一綫，穿插喺裏便。我哋任務要解散佢，分佢出來，逐吋展現。

林杼叫佢歇洛克奇案開場，序話歇洛克試手探奇者也，亦即指主角試身手、探奇案咁解，並非按原題譯。事實林杼譯第四章，大大省畧，吾將此案名之曰讀血書帶過，省畧咗個解釋，搞到後世錯解指血書血字。之後來以研究繙study，以血書血字譯scarlet，叫血字的研究，或血字研究。就咁，喺標題度就生出異議。英文a study in 某種色，係講喺正式作畫之前，對某種色練習，係種美術習用語句。同書中講美術用語對應。王爾德同柯南道爾會面中，亦認書名有藝術韻味，可見出自美術用語。英文叫study in，而非study of，可見唔係研究，而係練習。而scarlet意思鮮紅，好紅好紅，相當於鮮紅、深紅、猩紅、花紅、赤紅、朱紅、大紅色。因此書名要理解成破兇案練習作。後來李家真按意思重譯做暗紅習作，以血為喻，認為暗紅貼近過鮮紅。而陳永明認同叫習作係卓見，但唔同意改叫暗紅，理應保留英文意思，稱為猩紅的習作。

另外歇洛克奇案開場為主角定名，華生仍舊華生，福爾摩司日後換咗隻字，叫福爾摩斯。

偵探小說偵探用放大鏡，呢部首創 。

情節

上卷華生回憶錄

福爾摩斯用放大睇RACHE復仇紅字。華生、格臣、萊斯叉都喺處。

兇手合氏被捕

一八八一年，華生醫生決定落腳倫敦，要搵地方住，皆因喺第二次英阿戰爭中服役受傷，錢亦洗得差唔多。偶遇舊友士擔福，話佢知佢同事福爾摩斯，搵人合租必嘉街221號B，但佢先至聲明，福爾摩斯行為有啲古怪，有乜唔夾唔好怪佢。福爾摩斯同華生見面，互評估完對方，睇過房無耐，就搬入去住。福爾摩斯做顧問偵探，來訪常客都係佢啲客仔。華生好奇，福爾摩斯示範演繹推理，華生本來唔信，變到驚訝非常。之後有封電報要求查謀殺案。華生陪福爾摩斯去犯罪現場，即係碧斯頓道廢屋。格臣同萊斯叉兩幫辦，經已到咗現場。受害者懿諾爵伯，出身俄亥俄州卡夫蘭，身上文件顯示，佢有個秘書，約瑟史丹爵臣。房有血，牆上寫RACHE，至初眾人不解，福爾摩斯指德文復仇。不過，爵伯氏無傷。福爾摩斯話呢個訊息，用來誤導差人。佢推斷係中毒死，提供埋兇手描述。移動爵伯氏遺體，發現咗一隻結婚金戒指，女裝款來。

福爾摩斯以華生名義，喺幾份報紙賣告白，放戒指消息出去，並買咗仿製戒指，引兇手上釣，皆因兇手想攞返戒指。有個亞婆上門回應告白，聲稱戒指係佢個女嘅。福爾摩斯畀咗個複製品佢，跟住佢尾。查實亞婆係後生仔扮，兇手有同犯幫手走甩咗。一日之後，格臣去見福爾摩斯同華生，話佢拘捕咗疑犯。幫辦去咗莎邦蒂夫人旅舍，喺謀殺案發生之前，爵伯同史丹爵臣住喺嗰度。爵伯醉酒，調戲強錫愛麗絲，夫人個女。史丹爵臣帶爵伯同就搬走。不過，當晚爵伯折返，企圖捉住愛麗絲，亞哥亞發出手。亞發想用棍追打佢，但話經已見唔到佢。格臣根據證拘留佢。

後來發現史丹爵臣死喺酒店房，刺穿心臟，同樣，牆上用血寫住RACHE呢個字。史丹爵臣隨身帶本小說、煙管、一封電報寫住JH喺歐洲，另有細盒有兩粒藥丸。福爾摩斯返必嘉街寓所，喺隻老病蘇格蘭㹴身上試呢藥丸。食第一粒無效果，食第二粒即死。之後街童威近士入來。街童係街童偵探團亞頭，偵探團福爾摩斯偶爾請佢哋做。威近士叫定架啲士畀福爾摩斯。福爾摩斯叫佢請的士佬上來，話要佢幫手拎行李。的士佬一上到去，福爾摩斯用手扣控制住佢。的士佬正正係殺兩人兇手，積佛臣合。

下卷聖徒之國

積佛臣合、露絲費利亞相戀。

一八四七年，猶他州鹽湖谷，莊費利亞同細蚊女叫露絲。二人係幸存拓荒者。咁啱，楊百翰帶住後期聖徒救咗佢哋，但要佢信摩門教，按照信仰生活。幾年後，一八六〇年，露絲經已成年，同積佛臣合投緣，而且共墮愛河。不過，楊氏禁止佢喺信仰之外結婚，要求佢嫁畀約瑟史丹爵臣、懿諾爵伯其中一位，兩個都係教會四人議會成員啲仔。費利亞氏收養咗露絲，並發誓永遠唔會將個女嫁畀摩門教徒。佢發信畀合氏，以求幫手走佬。

露絲有一個月揀求婚者。合氏喺最後一日前夕來到，暗夜下全部走甩。合氏上山打獵嗰陣，摩門教徒追到上門。史丹爵臣氏殺死死費利亞氏，捉咗露絲返去摩門教聚居地，迫佢同爵伯氏結婚。一個月後露絲心碎而死。合氏闖入爵伯氏間屋，喺露西葬禮前一晚，錫佢遺體，除咗佢結婚戒指，誓要向爵伯氏、史丹爵臣氏報仇。但係，佢患咗主動脈瘤，要離開山區搵錢休養。幾年後返來，知道爵伯氏、史丹爵臣氏同摩門教決裂，逃離鹽湖城。爵伯氏得露絲莊園變有錢，而史丹爵臣氏做咗佢秘書。二十年間，合氏追住佢哋。喺卡夫蘭，合氏認出爵伯氏，爵伯氏認為佢係情敵，困咗佢幾個月。放咗之後，合氏追蹤到歐洲，過法國、俄國、丹麥，到尾英國。

喺倫敦，合氏做咗的士佬，搵到爵伯氏、史丹爵臣氏。爵伯氏同莎邦蒂夫人個仔亞發爭執，爵伯氏上咗合氏架的士，花咗好幾個鐘飲酒。之後合帶佢去碧斯頓道廢屋，迫爵伯氏認得佢，要佢喺兩種藥丸之間揀，一粒無嘢，另一粒有毒。爵伯氏食咗粒有毒，臨死嗰陣，合氏展示露絲隻結婚戒指。合氏興奮，加上動脈瘤令到佢流鼻血，喺爵伯氏牆上，用血寫RACHE，擾亂偵查探員。史丹爵臣氏得知爵伯氏被殺，拒絕離開酒店房。合氏爬窗口入，一樣畀史丹爵臣氏揀藥丸。不過，史丹爵臣氏反擊，而合氏自衛，刺咗穿佢個心。

出版

柯南道爾廿七歲寫咗呢本小說，用咗三個禮拜都無。 一邊做衡洲郡南海鎮醫生，一邊幾本雜誌上發表短篇小說，好似期刊倫敦學會。故事原本叫糾纏不清，英文A Tangled Skein，畀好多出刊拒絕後 ，最終一八八七年和樂公司出版，放喺必頓聖誕年刊入便。柯南道爾要求版稅，反而收到廿五英鎊買斷版權，約今日三千幾英鎊。插畫就有爹域亨利飛斯頓做。一八八七年七月，和樂公司單獨成書出售，亞爸查理道爾插畫。之後有唔同版本，同外國翻譯。

描繪摩門教

鹽湖城論壇報文章，問到柯南道爾對後期聖徒描述，綁架、謀殺、奴役。咁佢話，但支派同謀殺案，都係史上描述，唔可以撤回，雖則小說入面，描述得人驚過歷史。 柯南道爾個女話，你知啦，亞爸第一個出來承認，第一本福爾摩斯小說，滿篇講錯摩門教徒。史學家推測「柯南道爾係個書蟲，會睇到范妮斯釘侯、威廉喜文、威廉乍文、莊諧、安義拉莎楊等人作品， 解釋到作者對摩門教早期觀點。

柯南道爾死咗幾年之後，楊百翰後代，摩門教權威人士楊利維，就話作者私下道歉過，話佢畀當時著作誤導 ，又話寫咗本書，惡意誹謗摩門教徒。

改編

電影

福爾摩斯第一本書， 猩紅習作熾率先改編上銀幕。 一九一四年，柯南道爾授權首部英國默片猩紅習作，佐治三苗臣監製。喺詹士巴景頓演福爾摩斯。佢本身做會計師，唯一一次做演員。佢同福爾摩斯好似，做到小說咁款。 早年默片材料差，好少保留到，所以經已散失。呢套片成功，令三苗臣一九一八年出咗電影恐懼之谷 。

一九一四年美都有部猩紅習作，兩卷短片。前英國電影上映之後第二日。番鍚士霍演福爾摩斯，未得道爾授權。同樣散失。

一九三三年又拍多部猩紅習作 ，域煎奴奧雲演福爾摩斯，黃柳霜演排太太，同小說冇任何劇情關係。 除咗福爾摩斯、華生、赫臣太太、萊斯叉幫辧之外，同正典唯一聯繫得幾個角色名，聚箇士偉臣等。 劇情包同幾年後亞嘉莎姬絲蒂小說一個都不留元素相似。

聲音

伊迪邁沙創作播音戲福爾摩斯歷險記，到一九三一年尾，猩紅習作改編成四集，十一月十二號播出，理察哥頓演福爾摩斯，利羅浮演華生。