王屋村古屋
(由王屋村民宅跳轉過嚟)
王屋村古屋，又叫「王屋村民宅」（英文：The Old House at Wong Uk Village），係喺香港沙田圓洲角西南端。王屋村喺清朝乾隆年嘅時代（一七三六至一七九五年）由原籍廣東省興寧縣嘅王氏族人起嘅。十九世紀嗰時，由廣東南下九龍嘅旅客同貨物都以圓洲角為交通中心點，王屋村就成為咗商旅嘅貿易站，直至到十九世紀尾先開始末落。隨住沙田海不斷咁填土去發展沙田新市鎮，王屋村好多古老嘅建築已經荒廢同拆咗。剩番嘅呢間古屋大概喺1911年由王氏第十九代祖先王清和起，古屋樓高兩層，用青磚砌成，裡面有精美嘅壁畫同傳統裝飾，係圓洲角嘅歷史標記。香港政府喺1984年接管咗王屋民宅之後，喺隔離起咗王屋花園，更喺1989年12月22號將王屋民宅評為香港嘅法定古蹟。