環王子 (巴塞隆拿伯爵)

  提示：呢篇文講嘅唔係環王子 (蒙蒂松伯爵)。

呢個人物係用緊西班牙人名：首姓或者父姓（即老豆個姓）係「波旁」，次姓或者母姓（即阿媽個父姓）係「巴騰堡」。

環·德波旁
巴塞隆拿伯爵
西班牙波旁王朝家長
在位	1941年1月15號ー1977年5月14號
前任	亞利方疎十三世
繼任	環卡洛斯一世（西班牙國王）
私人明細
配偶	兩西西里公主瑪麗亞·瑪科迪絲（1935年結婚）
仔女	巴達何斯女公爵皮拉王女 環卡洛斯一世 蘇里亞女公爵瑪嘉塔 阿方素王子
諡號	環三世（西班牙文：Juan III）
皇族	西班牙波旁王朝
父	亞利方疎十三世
母	維多利亞·尤金妮亞
出世	(1913-06-20)1913年6月20號 西班牙王國聖伊德方素宮
過世	1993年4月1號(1993-04-01)（79歲） 西班牙旁普隆納納華拉大學醫院
安葬	1993年4月7號 西班牙聖羅倫佐修道院
宗教	羅馬天主教
出世名	羅馬天主教

環王子（西班牙文：Infante Juan，1913年6月20號—1993年4月1號），全名環·卡洛斯·德蘭沙·斯維里奧·阿方素·德波旁ー巴騰堡（西班牙文：Juan Carlos Teresa Silverio Alfonso de Borbón y Battenberg），係巴塞隆拿伯爵，西班牙國王亞利方疎十三世第三個仔、環卡洛斯一世個老豆。

生平

細個嘅環王子（畫像）

1913年，環王子響聖伊德方素宮出世，係西班牙國王阿方索十三世同王后維多利亞·尤金妮亞嘅第六個細路，第三個仔。佢響一間位於加的士省聖費迪南鎮嘅海軍學校讀書。

1931年，西班牙爆發革命，之後成立咗西班牙第二共和國，佢同老豆阿方索十三世流亡外國。之後佢到英國海軍當兵。佢響1935年通過導航同射擊嘅考試，如果佢放棄西班牙王子呢個銜頭就有機會做英國海軍中尉，但環王子唔願意。

1941年，亞利方疎十三世決定封佢為巴塞隆拿伯爵（但由於阿方索已經唔係國王，所以呢個銜頭冇效）。到1947年，佛朗哥宣佈恢復西班牙王室，咁佢先有得返去西班牙。

因為兩個大佬，阿斯圖里亞斯親王阿方索同凱瑂王子，分別因為揀咗同平民結婚同埋耳聾，而放棄王室成員身份，同埋放棄自己兼後人嘅王位繼承權；而另一個大佬費蘭度王子就死產。所以環王子恃住自己有同王位相關嘅銜頭「巴塞隆拿伯爵」、「阿斯圖里亞斯親王」，響流亡期間一直宣稱自己有王位繼承權，仲更加畀人民視為係下任西班牙國王。

但係因為環王子係個自由主義者，佛朗哥驚佢作反、推翻自己，所以就以攝政王嘅身份繼續統治，遲遲唔肯將王位傳畀佢，環王子一直都淨係西班牙王室首領。直到1969年，佛朗哥改為指定環王子個大仔環卡洛斯係王位繼承人。佛朗哥覺得環卡洛斯響佢死後好有可能會繼承佢嘅獨裁作風。

1975年，佛朗哥走咗，環卡洛斯登基做國王。環王子兩年後放棄王位繼承權同親王銜頭，同時環卡洛斯一世正式封佢為巴塞隆拿伯爵。而親王銜頭就由環卡洛斯一世畀咗佢個仔菲臘六世。

1993年，環王子響旁普隆納一間醫院走咗，終年79歲。之後阿仔環卡洛斯一世追封佢為「環三世」（即追封佢做西班牙國王，西班牙文：Juan III）。

屋企

佢老婆係兩西西里公主瑪麗亞·德·拉斯·瑪科迪絲·德波旁ー兩西西里，兩個人響意大利國王維托里奧·艾曼奴爾三世嘅婚禮上面識嘅。1935年結婚，有兩個仔兩個女：

• 大女：巴達何斯女公爵皮拉王女（1936ー2020）
• 大仔：環卡洛斯一世（1938ー）
• 二女：蘇里亞女公爵瑪嘉塔（1939ー）
• 細仔：阿方素王子（1941ー1956）