環球匯

環球匯（International Gateway Centre），簡稱IGC，係高鐵西九龍站上蓋嘅大型綜合商業項目，位於九龍西九龍匯民道1號，係2026年至2027年分階段落成，由新鴻基地產發展、Zaha Hadid Architects（ZHA）負責建築設計。項目提供約250萬平方呎甲級寫字樓同62萬平方呎大型商場。

歷史

西九龍高鐵站上蓋物業嘅地盤面積高達64萬3千平方呎，最高可建樓面約316萬5千平方呎，其中寫字樓樓面約285萬平方呎，而基座零售商場就佔約31萬平方呎。項目原本可以興建3幢樓高19至28層嘅商業大廈，規模屬於香港歷來最大型嘅地產項目之一。

根據賣地章程，項目落成之後，只可以成幢大廈形式出售，唔可以拆散逐層或者分開單位出售。中標嘅發展商亦要負責興建指定嘅有蓋行人天橋，以及綜合車站出入口，直接連接香港西九龍站。

政府喺2019年9月13日正式為地皮招標，當時市場估值最高接近791億港元。不過去到同年11月22日截標嗰日，地政總署最終只收到3份標書。長江實業集團同新鴻基地產分別以獨資形式入標，而恒基地產、九龍倉置業、信和置業、華人置業同利福國際，就合組財團競投。到11月27日，地政總署公布，新鴻基地產以422.32億港元成功投得項目，每平方呎樓面地價大約由1萬至2.5萬港元，成交價打破政府賣地紀錄，令項目成為當時香港歷來最昂貴嘅地皮。

2020年4月，新地引入中國平安保險同瑞銀集團做投資夥伴，涉及金額約112.73億港元。目前，新地、平安人壽，同新地大股東郭氏家族，分別持有項目寫字樓部分50%、30%同20%權益；至於商場部分就由新地全資持有。

同年9月，新地向城規會提交新嘅發展方案，將原先獲批興建嘅3幢「波浪形」商業大廈，改為2幢「鑽石形」商廈，並申請將最高建築物高度限制放寬至159米。新方案將寫字樓樓面削減約28萬6千平方呎，再將部分樓面轉移去商場，令零售樓面由原本約31萬平方呎，大幅增加至約60萬平方呎。休憩用地亦由原本約2萬5千平方呎，增加至約9萬1千平方呎。商廈每層都會設有園景露台，頂層亦設天台花園，增加綠化同戶外休憩空間。新地地產策劃及發展部規劃總監黃舜浣就指出，舊有設計「唔易行」同埋「唔夠貼地」，即係行人動線唔夠方便，亦未充分配合周邊社區同街道環境。佢亦表示，如果城規會唔批准新方案，發展商冇準備其他後備方案。不過，呢個新方案喺2021年1月被城規會否決。

新地之後再調整項目設計，包括降低兩幢商廈嘅建築高度、取消原本係4樓、高達15米並採用天然通風設計嘅「The Market」樓層，同時減少天台花園嘅面積。修改後嘅方案仍然收到超過500份反對意見。部分反對者認為大廈高度會破壞維港背後嘅山脊線，亦有人批評建築設計同西九文化區嘅整體環境格格不入。雖然坊間有大量反對聲音，但規劃署最終仍然支持有關方案。去到2021年8月20日，經過降低建築高度等修改之後，項目正式獲城規會有條件通過。

寫字樓

寫字樓樓高23層至30層，採用「兩組雙子塔」布局，一共有4座。內部用大面積、相對少柱甚至無柱嘅樓面設計，方便跨國金融機構、銀行、資產管理公司同大型企業設置交易樓層、開放式辦公室及總部。放租的寫字樓面積由500至40424平方呎，部分樓層樓底淨高至少約3米，配合大型玻璃幕牆。

租戶

平安銀行租用IGC一座，叫做平安中心（Ping On Tower）；瑞銀集團租IGC三座，大廈內其中14層作為香港總部，叫做瑞銀中心（UBS Tower），預於2026年第四季啟用。

西班牙桑坦德銀行（Banco Santander）亦已經營運。其他租戶包括、荷蘭合作銀行（Rabobank）、中國建設銀行（亞洲）（CCB（Asia））、AXA安盛、友邦保險（國際）（AIA）與富衛（FWD）等知名企業亦已落實去租；其他客戶包括家族辦公室、中國頂尖證券公司同人力資源機構等。

商場

商場喺2026年7月28日正式命名為 Stage IGC。商場樓高5層，總樓面面積達60萬平方呎，預計會提供約240間商戶，會引入創新及同有特色品牌。當中餐飲店舖佔大約三成，而商舖面積就由幾百平方呎至大約1萬平方呎不等。

商場計劃喺今年年底率先開放地下樓層試業。地下層佔地約8萬平方呎，會以「香港美食」做主題。Flavour on Stage設有大約40間店舖，涵蓋較貼地親民嘅餐廳、手信店、藥妝店，以及較高級精緻嘅餐飲選擇。地下亦可以直通西九龍高鐵站。至於意向呎租，就會參考西九龍同尖沙咀一帶商場嘅水平。

其餘4層商場，預計會喺2027年第三季開始分階段開放。

商場亦提供超過15,000方呎推廣活動場地，包括1個約3,000平方呎室內空間，同埋3個室外綠化空間。

停車場方面，商場一共有543個車位，亦會成為全香港首個所有車位都配備中速充電設施嘅商場停車場。當中亦包括20個快速充電車位，方便電動車車主使用。

休憩空間和觀景台

項目提供超過10萬平方呎休憩用地，包括戶外廣場同花園平台，可以舉辦唔同文化、藝術活動。大廈頂層將會有免費天台觀景台開放俾公眾。

環保設計

環球匯採用高效能玻璃幕牆、外牆遮陽裝置、太陽能光伏板、能源回收系統、智能樓宇管理系統，以及海水冷卻等設計。塔樓向上收窄同分拆成多個弧形量體，除咗係造型需要，亦可以減低風阻、增加空氣流動，改善中央廣場同低層公共空間嘅微氣候。項目取得或爭取包括BREEAM、LEED、WELL同香港綠建環評BEAM Plus多個環保、健康同埋ESG認證/預認證。發展商表示，項目有10項國際、內地及本地相關認證或預認證。