畀埋另一邊面佢打
畀埋另一邊面佢打依句說話，出自《新約聖經》耶穌嘅寶訓。成段說話嘅內容字面解就係教緊信徒，假如敵人打自己嘅右邊面，就俾埋左邊面佢打。根據主流詮釋，其意思就係想反暴力，勸導信徒受到冒犯甚至暴力對待嗰陣，唔好還手，而係以和平方式回應。[1]
耶穌寶訓
[編輯]依句教導出自登山寶訓，《瑪竇福音》[2]同《路加福音》[3]依兩本對觀福音書都有記載。
你哋成日聽到人講，話要以牙還牙、以眼還眼。但係我同你哋講，唔好同啲惡人作對，如果有人一巴
𢫏 你右邊面嘅話，俾埋左邊面佢𢫏。
而《路加福音》嘅記載就係噉嘅：
嗰啲咒罵你嘅人，你要祝福佢哋。嗰啲對你心存惡念嘅人，你要為佢哋祈禱。而對於掌摑你一邊面嘅人，俾埋另外嗰邊面佢摑。
倫理意義
[編輯]對於依句教誨，一般認為耶穌嘅目的，係想要取代當時普遍流行嘅以眼還眼思想，叫佢嘅追隨者受到各種傷害嗰陣，要以非暴力嘅方式嚟抵抗。
有廿世紀嘅神學家指出，畀埋另一邊面佢打，亦可以當係一種有尊嚴嘅對抗方式[4]：據講喺當時嘅猶太文化入便，用自己右手嘅手背嚟摑人右邊面頰，係一種帶有侮辱意味嘅行為，通常係主人對奴隸，或者地位高嘅人對地位低嘅人，先至可以噉做；假如被打嗰個唔還手，而係將自己左邊面頰露出嚟俾對方打嘅話，對方就會陷入兩難—佢一係就用左手嘅手背嚟摑，但當時猶太人喺習俗上左手只可用嚟做一啲唔乾淨嘅嘢，而如果要用右手摑，佢就焗住要正手而非手背嚟摑，而用正手摑通常只適用於地位對等嘅人之間。噉即係話，畀埋另一邊面佢打查實仲有一種隱藏含意，就係迫施暴者將被打嗰個人視為與之平等嘅人，於是被打嘅人就達致以非暴力方式，抵抗對方彰顯權力嘅意慾。
猶太起源
[編輯] | 呢節要加長。 |
耶穌嘅依句教誨因為基督教而廣傳，但係依句說話查實可以追溯至猶太教入便嘅思想：耶穌本身係猶太人，深受猶太教育；而畀埋另一邊面佢打依一個教誨，其雛型可見於希伯來聖經嘅《耶利米哀歌》，依本書第 3 章第 30 節嗰度就講過好近似嘅諗法，都係講「受難嗰陣，要畀埋面頰對方打」噉嘅態度[5][註 1]。
睇埋
[編輯]引咗
[編輯]- ↑ Levine, Amy-Jill; Brettler, Marc (2020). The Bible with and without Jesus: How Jews and Christians read the same stories differently. Harper One. pp. 201–203. ISBN 9780062560155.
- ↑ 馬太福音5章38-39節（基督教欽定本：太5:38-39；可以睇埋：基督教和合本：太5:38-39、天主教思高本：瑪五38-39）.
- ↑ 路加福音6章29節（基督教欽定本：路6:29；可以睇埋：基督教和合本：路6:29、天主教思高本：路六29）.
- ↑ Wink, Walter (1992). Engaging the Powers: Discernment and Resistance in a World of Domination. Fortress Press. pp. 175–82. ISBN 978-0-80062646-4. 喺December 27, 2013搵到.
- ↑ 耶利米哀歌3章30節（基督教NIV：Lm 3:30；可以睇埋：基督教和合本：哀3:30、天主教思高本：哀三30）.
註釋
[編輯]- ↑ 對於依句說話要點樣詮釋，唔同學者有唔同見解。