白駒榮

出自維基百科,自由嘅百科全書
白駒榮
職業opera singer、演員 喺Wikidata改呢個
仔女Bak Sheut-sin 喺Wikidata改呢個

白駒榮1892年1974年),原名陳榮,字少波,係粵劇演員,粵劇界嘅四大天王之一,廣東順德人。戲行人叫佢做「七叔」。佢老豆陳厚英都係粵劇演員,佢個女陳淑良就係花旦白雪仙

生平[編輯]

少年[編輯]

白駒榮九歲死老豆,自細父母雙亡既佢由嫡母韋氏帶大,供佢讀咗四年私塾,十四歲既時候就無讀,十九歲喺順德勒流怡益紙扎舖做學徒,又喺廣州英芳鞋舖做過店員。

青年[編輯]

1911年(19歲)開始學戲,拜男花旦鄭君可、吳有山做師父。第二年(1912年),加入咗由吳友山新組成既「民壽年」劇班,做第二小生,同時跟紮腳文(粵劇精於武工既演員叫做紮腳,例如出名既紮腳文、紮腳呂、紮腳勝等[1])學嘢,仲同佢合演過《仕林祭塔》、《閨留學廣》兩齣戲。無幾耐,佢就做咗正印小生,班主兼師父吳友山幫佢起咗個藝名叫白駒榮,呢個名嚟自當時最紅既花旦千里駒(番禺縣既區家駒),希望用個「駒」字起名,會引起觀眾既注目,同埋會好似千里駒一樣咁紅。 佢第一次用呢個藝名就係演出《太平天國》。

1913年白駒榮加入咗漢天樂做正印小生,向班中既周瑜林、金山貞、新奇仔、蛇王榮等演員學小生、二花面、公腳等唔同行當既唱腔同功架。1913年下半年,白駒榮加入寶昌公司屬下既四大名班之一「國豐年」劇班做第二小生,演出《柴桑弔孝》時唱自己設計既新唱腔,演出《狄青三取珍珠旗》又改動唱詞,特別係演出《金生挑盒》既時候,自創「白派」既演唱方式,創造咗用廣州方言唱「平喉」(用真嗓取代假嗓),音色優美清潤,大受觀眾歡迎,白駒榮因此而一唱成名。之後佢又轉到「華天樂」戲班做正印小生,往來喺廣州、香港既各大戲院演出。

1917年到1925年,係白駒榮粵劇藝術發展既黃金時期。佢先係喺省港粵劇大班「周豐年」升任正印小生,演出連台本戲《再生緣》既時候,飾演皇帝,因為佢表演精雕細刻,唱腔新穎豐富,令觀眾耳目一新,喺澳門同香港引起轟動。之後「花旦王」千里駒亦都加盟「周豐年」戲班,兩個人合作演出千里駒既首本名戲《盪舟》、《舍子奉姑》、《夜送寒衣》同白駒榮既首本戲《金生挑盒》、《再生緣》等。白駒榮因為表演技藝精進,藝術造詣高超,俾廣大觀眾同埋戲班同行叫做「粵劇小生王」。

中年[編輯]

1926年到1937年之間,白駒榮兩度出國演出,先係喺1926年去美國三藩市既大中華戲院,同新珠、子喉七、小丁香等合作演出《泣荊花》、《客途秋恨》,之後又喺1936年到越南、新加坡、馬來西亞同菲律賓等國家演出,「粵劇小生王」既美譽因此而蜚聲海外。呢十年間,白駒榮因為同寶昌公司既老闆有拗撬,曾經暫停舞台演出,專心灌唱片,包括《金生挑盒》、《再生緣》、《泣荊花》等。

1937年,白駒榮開始患咗眼疾,眼病影響咗佢正常既舞台演出。

1937年到1947年年間係白駒榮舞台生涯既低潮。1938年日軍飛機轟炸廣州,佢同薛覺先走難到香港,參加咗薛覺先既「覺先聲」劇團,薛覺先反串旦角,白駒榮依舊做小生,合演過《十三妹》、《女兒香》、《蘇小妹三難新郎》等劇。日本佔領香港之後,為咗維持生計,佢組班演出咗《雙槍陸文龍》、《落霞孤鶩》等戲。日治時期。佢又臨時組過班去廣州演出。1946年春節返去廣州東樂戲院演出既時候,眼病變得更加嚴重,只好喺舞台既虎道門鋪上白布條,幫佢識別,勉強演出。後來雙目失明既佢,迫不得已,只好離開粵劇舞台。

晚年[編輯]

1951年,白駒榮參加廣州市曲藝大隊,擔任隊長,為幫助北韓既打仗籌款,1955年曲藝大隊演出粵劇《重冤得雪太陽紅》,佢飾盲眼爺爺,大受觀眾歡迎。1953年初,廣州市粵劇工作團成立,擔任團長既白駒榮仍堅持參加演出《白蛇傳》、《寶蓮燈》、《選女婿》、《紅樓二尤》等劇,改演老生、醜生等角色。演出前,工作人員會喺舞台既地毯下面放幾條長竹片,令到佢可以辨別舞台既前後同埋出入口既位置。喺《紅樓二尤》嗰度,佢扮演既賈璉有比較大幅度既動作,但係佢克服咗難以想象既困難,喺其他演員既協助同配合之下,演得好逼真,令人唔記得佢係盲既。

1974年2月13號,白駒榮喺廣州逝世,終年八十三歲。

[編輯]

  1. ccmscuhk (2018-09-28). 劇漫談(九四). . 喺2024-03-07搵到.

出面網頁[編輯]