皇上皇
皇上皇（粵拼：wong4 soeng6 wong4）係廣東廣州嘅一間老字號舖頭，1940年由謝昌創辦，家下係嶺南國際屬下嘅企業，總部喺荔灣區下九路1～3號。間嘢喺廣州地區，主要整臘味比較多而出名。
史[編輯]
| 皇上皇臘味店 | |
|---|---|
| 廣州市歷史建築 | |
| 喺邊 | 荔灣區上下九 |
| 籌 | GZ_05_006 |
| 登錄 | 2018年2月11號 |
舖頭喺1940年由謝昌一手創辦，初期嗌過「東昌」個名，1943年改名做「東昌皇上皇」。
1945年光復後，上下東昌（喺海珠南路鋪係上，下九路新開嘅鋪係下）日均分別產銷500到600斤貨品。
其後謝昌由第十甫加拿大冰室度，挖咗個制冰師傅返來主理皇上皇自製嘅雪糕、雪條。1947年，又喺海珠南店開咗東昌冰室，開咗廣州臘味鋪兼營冰室嘅先例。到1948年，又先後喺下九路同太平南分號度做埋凍飲，仲喺一德路石公祠開埋雪條廠做批發[1]。
發展到1949年，皇上皇成咗廣州臘味行業入邊發展較快嘅商家之一。當其時旗下有太平路（現人民路）為記同下九路下東昌兩間分號，仲有大新路、一德路石公祠開嘅3間工廠，主要製造番梘同雪條。而謝昌本人仲有成15個物業[2]。
共和國後[編輯]
謝昌喺1950年代初，同屋企人一齊去咗澳門同香港發展，廣州嘅生意轉由個仔謝德打理，生產經營則交由一位信得過嘅「師爺」（即掌櫃兼買賣手）葉海幫手打理[3]。
到1956年公私合營後，兩間東昌皇上皇畀廣州食品公司（而家嘅廣州食品企業集團）食咗，海珠南老舖畀冚埋，剩低下九路間鋪仲開。而太平南路為記分號，經營逐步改為冬天售賣雲吞麵，夏天賣雪糕、凍飲。
文革受破四舊影響，個鋪名「東昌皇上皇」畀人話含有「帝王思想」，有三層樓高嘅大招牌，喺午夜時分畀拆落來揼爛，之後一度改名做「紅上紅」同「廣東臘味」等。呢段時間啲市民仍然認可皇上皇出嘅臘味係正宗，唔少住東山、海珠嘅街坊仲專程搭車去入貨[4]。
1981年鋪面改返名「皇上皇」，仲重新設計咗皇冠款嘅新商標，1987年發展成肉食製品廠。
香港[編輯]
謝昌1950年代初由廣州遷港後，喺彌敦道開返「皇上皇臘味」仲有「皇上皇餐廳」，中環德輔道中就開咗「皇上皇雪糕公司」，推出咗唔少港人童年熟知嘅「噴火雪糕」。當年謝家「太子」謝興銓係省城名人，「肥仔德」無人不識，搭飛機赴美探親，試過「飛機餐」後，隨即喺「皇上皇」度推出「飛機餐」，用個大盤分大小多格，分格裝麵包、牛油、牛扒或豬扒等餐食[5]。旺角鋪面做到1980年代執咗，留低一棟皇上皇大厦。
臺灣[編輯]
臺北忠孝東路有個「廣東皇上皇」，話係一位居港粵人喺民國68年（1979）創辦，未知係咪謝家後人遷辦。呢個舖頭話原先係自製燒臘為主銷售，後為咗喺臺灣整返道地嘅廣式臘味，就請返香港啲傳統師傅，用埋臺灣當地啲高粱酒等，整過廣式臘味。
出品[編輯]
初頭謝昌係落手落腳整臘味，揀選川純正嘅玫瑰露酒。製作陣要求係「灌得 (滿)、斟得勻、綁得緊」，還由南海度請埋豉油師傅，喺東昌三樓自曬生抽、老抽[4]。
開初嘅品種比較簡單，有「三七腸」、「二八腸」，都係肥瘦比例上嘅變化。後來風味多樣化咗，比如豉油，佢會用有色或者冇色豉油做臘腸，應對顧客嘅唔同需求[6]。有出一款東昌金牌老抽腸比較多見，1945年光復後仲推出過生抽腸、切肉腸、白油腸等多個品種。
搬去香港後出品出名嘅有噴火雪糕、原子燒雞，仲有套餐「飛機餐」。
軼事[編輯]
初頭謝昌嘅大佬謝柏早過佢，開咗個「八佰載太上皇臘味店」。謝昌就係賣鹹魚、沙欖、雜物呢啲嘢先，後尾見大佬嗰度生意做得好，就擺攤賣臘味，有咗本銀後就開咗固定檔「東昌臘味店」。到1943年改名叫「東昌皇上皇臘味」，有意趕超「太上皇」。
而舊日謝昌嘅經營出色，據話當其時佢擺咗好出名嘅「三個陣」。
第一個就係秋冬全力整臘味，叫做以火為主嘅「朱仙陣」。第二個係喺鋪頭做冰室，謝昌當時專門請咗加拿大冰室好有名嘅一啲製作人返嚟，吸引咗好多夏天嘅顧客，呢個就係以冰為主嘅「陰風陣」。第三個，喺做臘味時會剩啲下腳料，呢啲肥肉就可以做番堿，呢個叫做「溫和陣」。因為「三陣並施」，一年四季都有生意做[6]。
謝仲好識做宣傳賣招牌，喺達官貴人常出入嘅海珠大戲院，就重金捐咗幅繡埋「東昌皇上皇臘味店」嘅前幕畀戲院。喺電臺度都放埋臘腸、番梘嘅告白。臘腸嘅告白詞係：「想想想，皇上皇風腸，一年一仗（舊底粵語叫『次』做『仗』），任君選嘗。」番梘嘅就係：「阿伯阿伯點解你件衫咁邋遢？買件『皇上皇』，包你雪咁白」[7]。
而梅艷芳細個，就住旺角嘅「 皇上皇」燒臘同雪糕店對面，嗰陣仲未試過雞髀同雪糕，每次放學經過皇上皇燒臘陣，舖頭金黃色嘅燒雞都誘惑著梅豔芳[8][9]，同其他女仔一樣，大家會圍埋睇著流埋口水。梅就開始有咗願望，諗著大個咗搵到第一份糧，就去「 皇上皇」買返隻童子雞畀自己[4]。
睇埋[編輯]
出面網頁[編輯]
攷[編輯]
- ↑ 皇上皇肉食製品廠傳奇之臘味家族“皇上皇” 互聯網檔案館嘅歸檔，歸檔日期2019年5月30號，. 廣州老字號傳奇
- ↑ 皇上皇”經典的由來 互聯網檔案館嘅歸檔，歸檔日期2019年1月15號，. 2015-01-14 上海澤楷
- ↑ “金冠”照耀 腊味生辉 互聯網檔案館嘅歸檔，歸檔日期2019年5月30號，. 包明仁 李煜 廣州文史
- ↑ 4.0 4.1 4.2 互聯網檔案館嘅[https://web.archive.org/web/20200328025032/http://www.gzlib.gov.cn/gzdl/151412.jhtml 歸檔，歸檔日期2020年3月28號，. 广州副食老字号]皇上皇腊味 “煮豆燃箕”演绎商战风云] 2007-03-19 广州图书馆
- ↑ 生活語絲：陸上飛機餐 文匯報 2006-12-03
- ↑ 6.0 6.1 皇上皇：从青出于蓝到超“粤”发展 互聯網檔案館嘅歸檔，歸檔日期2019年5月30號，. 2013年10月30號 南方都市报
- ↑ 中华老字号 “腊味之王”——皇上皇 越秀区图书馆
- ↑ 梅艷芳：給我一個做女人的空間 文：林燕妮 林燕妮筆下的文化紅星
- ↑ 封面八卦 ▏成年后有多红童年就有多惨，百变天后梅艳芳离开13年了 互聯網檔案館嘅歸檔，歸檔日期2019年5月30號，. 2017-01-01
- 广州腊味鲜为人知的故事，皇上皇的那些年那些事 搜狐
- 皇上皇：从青出于蓝到超“粤”发展 南方略咨询
- 皇上皇 飞嘴特产网