盤古

出自維基百科,自由嘅百科全書
跳去導覽 跳去搵嘢
盤古

盤古,係而家嘅中國神話體系入邊,一個相當係始祖地位嘅自然神。按照體系嘅傳說,佢係同耶和華咁開天闢地,而天地萬物都係由佢個身轉化出嚟,三皇五帝係要跟尾先至出埋嚟嘅[1]。喺唐字界入面,盤古大陸就用佢個名命名。追溯返去,相信佢係盤瓠度演變過來嘅,呢個係畀先古嶺南嘅瑤族認為係佢哋族群嘅祖先,喺瑤人建立嘅南海中盤古國度亦延續咗呢個信仰[2]

起源[編輯]

關於盤古嘅起源,一般主流認為係來自百越嘅地頭度,細啲講就係喺廣東度,有相信盤古就係廣東人嘅祖先嚟嘅。根據《述異記》載:「南海中盤古國……今南海有盤古氏墓,亙三百里,俗雲後人追葬盤古之魂也;桂林有盤古氏廟,今人祝祀」根據啲專家學者嘅考證,舊陣時盤古國嘅位置,估計係而家嘅廣東爐山地區,喺古代原先係瑤族人生活喺嗰度[3]

相信大概係1500年前,瑤族遷入咗南粵,而其中一支落腳咗南嶺嘅青雲山餘脈(即係花縣花山度),而據《花縣誌》記載,獅嶺嘅爐山(後稱盤古王山)、花山、梯面一帶,就係古代瑤族嘅居所。舊底落腳喺梯面嘅瑤人,就建立咗盤古國,仲喺盤古峒度起咗盤古廟,逢農曆十月十六日嘅盤王節都會盛大慶賀,活動延續到咗明弘治年間。後尾明廷官兵去到鎮壓盤古國,盤古廟畀焚毀,啲瑤民唔少走難咗,留低咗盤古神碑等遺跡[4]。剩低嘅瑤人亦慢慢畀同化咗就[5]

書畫記載[編輯]

盤古傳說嘅漢書記載,就喺東漢後期出現咗,到三國陣經已廣為流傳。現存嘅文獻度,最早有講到盤古嘅係222年《魏大饗記碑》:「起尚盤古,羅天⎕焉。」(⎕為虛缺號[6] 東吳韋昭嘅《洞記》就講到,盤古嘅傳說流傳喺世間:「世俗相傳為,盤古一日七十化,覆為天,偃為地……[7]

古仔[編輯]

三國陣盤古嘅古仔係咁話嘅[8]

天地渾沌,盤古生其中,一日九變,神於天,聖於地,主於天地。天日高一丈,地日厚一丈,盤古亦長一丈,如此萬八千年,然後天地開闢。盤古龍身人首,……開目成晝,合目成夜,呼為暑,吸為寒,吹氣成風雲,叱聲為雷霆。盤古死,……目為日月,髭為星辰,眉為斗樞,九竅為九州,乳為崑崙,膝為南嶽,股為太山,尻為魚鱉,手為飛鳥,爪為龜龍,骨為金銀,髮為草木,毫毛為鳧鴨,齒為玉石。汗為雨水,大腸為江海,小腸為淮泗,膀胱為百川,面輪為洞庭。

又傳言[9]

盤古一日七十化,覆為天,偃為地,八萬歲乃死。

到南北朝嗰陣嘅傳說[10]

昔盤古氏之死也,頭為四岳,目為日月,脂膏為江海,毛髮為草木。秦漢間俗說:盤古氏頭為東岳,腹為中岳,左臂為南岳,右臂為北岳,足為西岳。先儒說:盤古氏泣為江河,氣為風,聲為雷,目瞳為電。古說:盤古氏喜為晴,怒為陰。

到咗西晉陣,就有埋畫咗盤古嘅壁畫:太康年間(280-289),益州刺史張收,就喺成都嘅周公禮殿牆壁度,畫上咗盤古[11]。」

信仰[編輯]

瑤族係將盤古王奉做係開天闢地嘅始祖,排瑤叫佢做盤古王公(盤古王婆),過山瑤就叫佢做盤王、盤瓠王或盤王聖帝。

道教後尾吸納埋盤古做自己嘅神祗,兼加咗號叫佢做「元始天王」。上清經《枕中書》係咁寫到:「昔二儀未分,溟滓鴻蒙,未有成形。天地日月未具,狀如雞子,混沌玄黃。已有盤古真人,天地之精,自號元始天王,游乎其中」。

粵民間嘅信仰[編輯]

喺南北朝時代,嶺南度就有祀奉盤古嘅活動,「今南海有盤古氏亙三百餘里,俗云後人追𦵏盤古之魂也。桂林有盤古氏廟,今人皆祝祀[12] 。」排瑤係喺舊曆七月七搞盤古王誕,舊曆十月十六就係搞盤古王婆誕,瑤人會喺慶典入邊做具族裔特色嘅耍歌堂。舊底每個大嘅瑤排有自己嘅盤古王廟,廟廳除咗擺盤古王兩公婆嘅像,仲有各房姓祖先嘅像,設埋有掌廟公同燒香公去到打理,每逢節日仲有每月初一、十五,都會由燒香公代為到廟焚香敬奉。過山瑤除咗年節祭祀外,仲不定期會搞「還盤王願」嘅儀式[13]

廣東花縣係傳聞中盤古國同盤古氏墓嘅所在地,到依家仲有盤古王山同埋盤古王廟,誕會就同其他幾處瑶人舉行嘅誕期唔同,當地係喺每年舊曆八月十一到十五搞盤古王誕會,係非常之盛大嘅,會有過萬嘅信眾參與。期間嘅活動有鬧花燈、搶花砲,舊底仲有請戲班演大戲,戲臺搭到廟前,仲請埋盤古王睇戲。

而廣州北面嘅人和、鴉湖、高增、長紅、南村同太和莊等鄉村,亦建有盤古廟,都會搞同獅嶺度一樣嘅祭祀活動,如廣州均和長紅村嘅盤古廟度嘅《重建盤古廟碑記》記載咗:「盤古王之出世也,辟地開天,首達陰陽之理,治人御物,先宏庶類之源,大有利於生民,宜酬功於萬古。」而呢啲鄉村嘅盤古誕辰,就跟返瑶族嘅盤古王婆誕喺舊曆十月十六日搞嘅[14]

而廣西來賓度亦有盤古廟,仲有盤古嘅傳說同歌謠,有唔少以盤古做名嘅村、山同山窿等,有著完善而獨特嘅盤古文化體系[15]

盤古嘅信仰喺香港度就唔多流行,除咗啲比較耐嘅佛堂,得喺大埔嘅盤古王廟係奉盤古做主神。而供奉盤瓠嘅,就得大澳度嘅創龍社,係喺隔離擺咗個狗型神像嘅神龕,畀啲街坊當係一般嘅神獸嚟拜 [1]

盤古遺跡嘅一覽[編輯]

地區 分佈市縣 盤古廟(壇) 起咗盤古嘅地頭 墓地
廣東 51 221 14 2
廣西 32 100個有多 包括起咗盤古名嘅地頭

喺廣東方志記載度,有盤古廟同叫盤古嘅地頭,係中國大陸度共和國各省入邊最多嘅,廣西度嘅統計就僅次廣東。而其他有稍微多啲盤古遺跡嘅,仲有湖南、江西、海南、雲南、貴州等地[16]。嶺南度仲留存嘅盤古廟或盤瓠廟,祀祭嘅神像都係狗頭、狗首人身嘅樣,志記有嘅廟或壇,包括咗花都獅嶺、肇慶北嶺山、博羅、南雄、四會,廣西桂林、柳州、柳江、馬平等地[17]

睇埋[編輯]

參考[編輯]

  1. 1.0 1.1 周, 樹佳 (2009). 香港諸神——起源、廟宇與崇拜. 中華書局(香港)出版有限公司. p. 264. ISBN 9789628931101.
  2. "花都盘古王诞". 广州文史. 原著喺2020-02-14歸檔. Unknown parameter |dead-url= ignored (help)
  3. 开天辟地之前,世界是什么样子,盘古又在哪里? 騰訊新聞 2019-05-18
  4. "盘古王——诞民间文化的奇葩". 广州文史. 原著喺2020-02-14歸檔. Unknown parameter |dead-url= ignored (help)
  5. "狮岭盘古王文化放异彩". 广州文史. 原著喺2020-02-14歸檔. Unknown parameter |dead-url= ignored (help)
  6. 劉屹:《神格與地域:漢唐間道教信仰世界研究》(上海:上海人民出版社,2011),〈太一與盤古〉,頁7。
  7. 〈太一與盤古〉,頁8引。
  8. 唐代澄觀:《大方廣佛華嚴經隨疏演義鈔》(《大正新修大藏經》36冊),卷42,頁320c引東吳徐整《三五曆記》,誤題「三王曆」。又節引於歐陽詢:《藝文類聚》(北京:中華書局,1982)卷1,頁2。
  9. 〈太一與盤古〉,頁8引東吳韋昭《洞記》。
  10. 〈太一與盤古〉,頁13引任昉(460-508)《述異記》。
  11. 〈太一與盤古〉,頁4-5。饒宗頤:〈盤古圖考〉,《中國社會科學院研究生院學報》,1986年1期,頁75-76以為此盤古圖於194年由漢末益州太守高眹所畫,不確。
  12. 〈太一與盤古〉,頁13引《述異記》。
  13. "连南民俗·宗教信仰". 连南县政府. 原著喺2020-02-15歸檔. Unknown parameter |dead-url= ignored (help)
  14. "花都獅嶺盤古神壇述略". 中國評論學術出版社. 原著喺2020-02-15歸檔. Unknown parameter |dead-url= ignored (help)
  15. 方, 鹏 (2010). 中国人的起源——基因解读三皇五帝. 江西人民出版社. ISBN 9787210041689.
  16. "中华民族创世神话岭南首创?". 广州文史. 原著喺2020-02-14歸檔. Unknown parameter |dead-url= ignored (help)
  17. "嶺南漢民系神靈崇拜地理差異". 伏波庙. 2017-03-12. 原著喺2020-02-15歸檔. Unknown parameter |dead-url= ignored (help)