研究海報

一般嘅研究海報通常其實係論文

研究海報（英文：poster）係指喺學術研討會貼喺牆或者釘喺架上面嘅一種貎似海報，有時限性嘅學術發表方法。雖然叫做海報，但係研究海報上面嘅好多時其實都係論文，只係唔夠斤兩當論文發表；所以又有人叫佢做海報論文。不過亦都有以圖為主嘅研究海報。

喺學術研討會通常都會有一或者多個時間畀學者親自解釋張海報，叫海報環節。有啲研討會，啲海報會喺個研討會未開始已經貼出嚟，又或者完咗唔會即刻搣走，呢類研討會以外嘅展出可以叫做 ｢海報展覽｣。

研究海報通常只係研討會進行期間先可以搵到內容，搣咗落嚟之後一般唔會搵得返；就算貼返喺學者嘅大學入面，都唔會有正式紀錄擺咗喺邊，一般人搵到嘅至多係得返個摘要。

好多人整研究海報會用 PowerPoint，不過亦有啲學者會用排版軟件或者繪圖軟件，研究海報嘅重要字眼應該喺 3 米以外睇得見，所以整研究海報其實有啲類似展覽設計。