破冰遊戲

出自維基百科,自由嘅百科全書
(由破冰活動跳轉過嚟)
跳去導覽 跳去搵嘢
玩緊破冰遊戲

破冰遊戲英文Icebreaker),又稱為破冰活動,目的係幫助大家彼此認識,特別係喺有新人加入嘅時候,進而形成團隊而設計嘅引導活動。破冰遊戲通常係熱身用嘅遊戲,幫助參與嘅成員可以彼此認識對方。破冰遊戲通常會以分享個人資訊(例如名、興趣等)為主[1]

目的[編輯]

  • 提供簡單同互動性高嘅遊戲,令到聚會開始嘅時候,營造歡樂、開放嘅團體氣氛。
  • 為聚會嘅內容熱身,引導聚會參與者進入主題。
  • 營造融洽嘅氣氛,幫助大家能夠彼此認識。
  • 幫助大家進一步嘅認識同了解,發掘大家嘅共同興趣。
  • 培養團隊精神,促進組員之間嘅合作力。

流程[編輯]

如果有新朋友,就圍一個圈每個人都介紹一吓佢自己,佢叫咩名、點稱呼佢,為咗增加有趣程度可以加上其他資料,例如鍾意食啲乜、最鍾意去邊度旅行、個人專長、興趣等,令到新朋友喺冇壓力之下融入小組。介紹完之後就可以開始各式各樣嘅遊戲,有冇獎品都冇所謂,有時候重點唔係輸贏,而係大家彼此互相認識,增進感情。

種類[編輯]

破冰遊戲嘅種類有好多種,常見嘅有以下幾種:

介紹性

當一班人第一次聚集嘅時候,佢哋未必認識對方。呢類遊戲一方面幫助大家彼此認識,亦可以了解並欣賞大家嘅差異同相似嘅地方。簡單嘅介紹性破冰遊戲可以係請求大家講出自己嘅名同埋有關自己嘅一件事,呢類遊戲亦可以包括較複雜嘅活動,目的係令到大家彼此信任,並且希望可以彼此合作。

認識性

破冰活動通常係遊戲中幫助團隊熱身成形嘅一部份,幫助團隊中嘅成員彼此認識。呢類遊戲通常着重喺分享個人嘅資訊,例如名、個人喜好、興趣等。呢類遊戲亦能夠幫助一啲已經識得嘅人更加了解對方。

團隊建立

好多破冰遊戲嘅目的係令到參與者開始形成團隊。有啲團隊建立嘅破冰遊戲,會用建立團隊嘅信任、溝通、合作能力等,促進團隊嘅群體動力。

趣味性

趣味性破冰遊戲係利用簡單並且有娛樂性嘅活動,令到大家放鬆、傾偈、歡笑。呢類適用喺活動嘅開始,會令到接下嚟嘅活動有合適嘅氣氛。

破冰式問題

破冰式問題只係向參與者問一啲問題,令佢哋放鬆,感到舒適。破冰式問題可以係認真嘅,亦可以係娛樂性嘅。好嘅破冰問題會專門針對參與者嘅年齡、特質、活動目的而設計,令參與者預備好進行之後嘅活動。

帶領方式[編輯]

負責帶遊戲嘅人,需要注意以下事項:

  • 要將遊戲帶得生動活潑,要引起參與者嘅興趣,眼光要照顧到每一個人,語氣、聲音大細,要營造鼓勵嘅氣氛。
  • 要將主題或討論嘅話題講得清楚、簡潔有力。
  • 盡量令到每個人都有機會參與或分享。
  • 控制時間:可以限住每個人用幾耐。由帶領人開始按順時針或逆時針次序輪流分享。

參考[編輯]

  1. Dennick, Reg. Small Group Teaching: Tutorials, Seminars and Beyond. p. 20.

出面網頁[編輯]