科學

出自維基百科,自由嘅百科全書
跳去: 定向搵嘢
科學有好多唔同學科,可以按研究題目或者研究嘅嘢嘅規模嚟分類。

科學粵拼fo1 hok6日文科学かがく(Kagaku))係指一個有系統咁去尋求同組織知識嘅行業。佢嘅方法係建基於實證方法-科學家會諗一啲驗證得到嘅理論假說出嚟,再做實驗或者用觀察嘅方法嚟攞數據,跟手再睇吓佢哋嗰柞理論同假說係咪真係符合攞到嘅數據,最後唔啱嘅理論同假說會畀科學家淘汰或者改;跟住科學家會係咁重覆呢個過程,一路直到揾到一啲完全符合實驗同觀察數據嘅理論為止。

現代嘅科學會按照研究嘅題目分做唔同嘅學科,大類有形式科學(Formal Science)、物理科學(Physical Science)、生命科學(Life Science)、同社會科學(Social Science)[1]-而呢啲大類重有得分得再細啲,好似係專係研究冇生命嘅自然物體嘅「物理科學」,就有得細分做物理同埋化學呢啲再專門啲嘅學科。而且學界重有「應用科學」(Applied Science)呢樣嘢-專係指一啲將科學用喺實際範籌嘅學科,例如係工程學呢啲。

科學呢家嘢歷史好悠久,有得追溯到去古希臘時期。嗰時古希臘嘅哲學家好鍾意傾同諗點樣先至可以得到知識,開始度咗啲橋出嚟:佢哋有討論科學同實證方法點樣可以幫到人類得到知識。由嗰時開始,科學就有一路發展,古羅馬印度文明、中世紀歐洲、同期嘅伊斯蘭世界華夏文明(尤其係趙宋皇朝)、文藝復興嘅歐洲、同埋近世嘅歐美同日本都有見到重大嘅科學進展。而到咗廿一世紀,科學已經做咗一樣全世界都喺度搞嘅嘢。每年世界各個大國都投資好多錢落去科學研究度,而科學家亦都成為咗一份幾有社會地位嘅工。另一方面,科學對社會同人文嘅影響好大,有好多科幻戲同小說都係喺度探討緊科學對人類社會嘅影響,而科學上嘅進步又好多時會產生新科技嚟刺激文藝方面嘅發展,例如光學(研究光嘅物理學分枝)嘅進步令到人發明咗相機呢樣機器-進而令到現代人有咗影相呢門美術。

個名點嚟[編輯]

西方起源[編輯]

科學個英文名係「Science」。呢個字好耐歷史[2],係 14 世紀中期嗰陣嘅英國人由古法文(Old French;即係中世紀嘅法文,現代法文嘅祖先)嗰度借過嚟嘅,個字喺古法文入面有「知識」同「學習」呢類嘅意思。呢個字有得再追溯到去古羅馬嗰度-古羅馬人講嘅話拉丁話裏頭有個字叫「Scientia」,意思係「知識」或者「學問」咁解。Scientia 呢個字亦都同拉丁話嘅字「Sciens」(意思係「聰明」)同埋「Scire」(意思係「知道」或者「分辨」)有啦掕,而且「知識就係力量」呢句嘢亦都係喺拉丁話嗰度走出嚟嘅(Scientia potentia est)。有啲語言學家重有個講法,話呢個字可以追溯得再古老啲:希臘話度有個字「Skhizein」,意思係「分開」或者「切開」,而古希臘嘅文化對古羅馬有好大影響,有機會係由希臘話傳咗入去拉丁話度。

本嚟「Scientia」呢個字(同埋佢嗰柞變種)淨係指一啲有系統性或者有記錄嘅知識,引申到包嗮所有由學術研究嗰度得返嚟、有紋有路嘅人類知識-個意思其實好籠統。而且響公元 1600 年到 1800 年嗰陣時,專門研究大自然嘅學問喺歐美地方係畀人嗌做「自然哲學」(Natural Philosophy),用意係要表示佢同研究人嘅行為嘅學問「道德哲學」(Moral Philosophy)唔同。到咗 1800 年(啟蒙時代)開始,呢個字先至讓位畀「自然科學」(Natural Science)呢個字。由嗰時起,「Natural Science」呢個字就演變做今日嘅用法:佢包嗮物理科學同生命科學呢啲用科學方法嚟研究大自然嘅學科,而 Moral Philosophy 就變咗做現代嘅「社會科學」(Social Science),而且家吓佢哋都係跟科學方法,所以都畀人歸埋入 Science 度。今時今日,研究道德嘅學問(Ethics)就畀人分類做哲學嘅一門。

傳嚟東方[編輯]

由 16 世紀開始,中原大明皇朝同埋江戶幕府統治下嘅日本都分別咁開始同西人打交道,日本重好快變咗做成個亞洲入面最標青嘅國家。日本人幫 Science 呢樣嘢改咗個名叫「科学」(平假名:かがく;羅馬字:Kagaku),而西人嘅 Science 傳到去中原畀人嗌做「格致」,意思係《大學》所講嘅格物致知,即係探究事物嘅原理,從而攞到知識。後嚟康有為由日本嗰度引入咗「科學」呢個詞語,重令到成個大中華地區都採用呢個詞語嚟稱呼用科學方法尋求知識嘅學問。

科學哲學[編輯]

內文: 科學哲學

科學哲學(粵拼:Fo1 hok6 zit3 hok6;Philosophy of Science)簡單啲講就係一套有關科學呢家嘢應該點搞嘅諗法。「哲學」(Philosophy)呢個詞語一般都係指緊某一個學科,但係響廣義上嚟講,呢個詞語重可以用嚟指一個人或者一班人對於做某一樣嘢嘅基本信念[3]-所以粵文入面會有「做人哲學」呢個詞,指一個人對於「做人」嘅諗法同信念。而按呢個邏輯,「科學哲學」就係指緊科學家對於「科學係啲乜」同埋「科學應該點樣搞」呢類問題嘅一套信念。一般嚟講,科學家堅持科學研究一定要跟足科學方法。佢哋假設咗一切出於自然嘅嘢都可重覆驗證(Replicable),而會唔理任何唔可重覆驗證嘅嘢,而會嗌呢啲嘢做超自然(Supernatural)。大致上嚟講,學界而家基本上對於科學哲學已經有咗一套共識-絕大多數科學家都會讚成好似係可否證性或者係精確性呢類原則係做科學一定要有嘅,而呢套科學哲學基本上想做科學家嘅人都一定會讀。 Karl Popper 喺佢本名著《The Logic of Scientific Discovery》(個名直譯係「科學發現嘅邏輯」)嗰度詳細咁講解咗呢柞原則;而呢本嘢家吓重做咗好多新進科學家嘅必讀書。

基本假設[編輯]

科學哲學有柞基本嘅假設(Assumption) [4]

  • 喺人以外存在住一個客觀嘅真實世界,而呢個真實世界係所有理性嘅觀察者(Rational Observer)共享嘅。
  • 呢個真實世界並唔係完全混亂(Chaotic)嘅:佢係畀一啲有規律嘅自然法則(Natural Law)控制住。
  • 人可以透過有系統嘅實驗同觀察(Systematic Experimentation and Observation)嚟去發現呢柞自然法則。

而科學哲學就係建基喺呢柞假設上面嚟去傾科學應該點樣搞。

歸納[編輯]

內文: 歸納

歸納(粵拼:Gwai1 naap6;Inductive Reasoning)係科學家嘅基本諗嘢方法,佢係指緊由啲個別嘅事例嗰度去推斷出一啲普遍原理(General Principle)[5]。佢同數學家成日用、可以得出肯定結論嘅演繹推理(Deductive Reasoning)唔同,佢唔會保證到個結論係一定啱,但係會靠住有大量事例嚟去提升自己個論證(Argument)嘅強度,好似係以下嘅論證咁樣:

前提一:所有人類嘅壽命都係有限嘅;
前提二蘇格拉底(Socrates)係個人;
結論:蘇格拉底嘅壽命係有限嘅。

呢個係一個典型嘅演繹推理論證:雖然話係有得詏佢嗰兩句前提(Premise)到底係咪真,但係事實係如果佢嗰兩句前提係成立嘅,咁佢個結論邏輯上都一定會成立-喺一個有效(Valid)嘅演繹推理論證入面,前提嘅真確性會保證到個結論嘅真確性。呢種思考方式喺數學上成日都會用嚟證明(Prove)一啲定理。同呢種諗嘢方式唔同,響歸納性質嘅論證入面,前提嘅真確性冇辦法保證到結論嘅真確性,只係可以靠住大量嘅事例嚟提升個論證嘅強度,好似係以下呢個論證咁:

前提:我之前見過嘅天鵝都係白色嘅:
結論:呢個世界上所有天鵝都係白色嘅。
呢個世界上查實有黑天鵝。

呢個係一個典型嘅歸納論證:佢個前提就算係啱都保證唔到個結論係啱-前提入面嗰個「我」並冇見過嗮世界上所有嘅天鵝,而事實係世界上有黑天鵝,個觀察者會咁諗只不過係因為佢未見過黑天鵝。個觀察者想佢個論證強啲嘅話,佢就一啲要去見多啲天鵝:如果佢睇勻嗮全歐洲嘅天鵝,呢個論證嘅說服力會比較強;相反,如果佢只係見過英國嘅天鵝,咁呢個論證嘅說服力會謯好多。科學家都係跟住呢種諗嘢方式去搞科學:喺驗證「萬有引力係真嘅」呢句說話嗰陣,牛頓(Isaac Newton)觀察到一個蘋果由樹上面跌落嚟,佢亦都觀察到好多嘢都係跟呢條規則,但係佢始終冇辦法去真係「證明」呢個宇宙入面真係所有嘢都有萬有引力-因為可能喺宇宙嘅某啲黑暗角落度會有啲冇引力嘅嘢,只係人類重未揾到。科學家靠嘅係觀察同實驗,佢哋冇辦法好似數學家咁真係證明佢哋講嘅嘢,佢哋只可以靠住重複做觀察同實驗嚟支持自己諗出嚟嗰啲定律同埋加強自己嘅論證,但係始終係冇方法排除一個可能性:呢個宇宙入面可能真係有啲嘢係唔跟佢哋諗出嚟嗰啲定律嘅,只係佢哋未揾到呢啲嘢。

就係因為咁,喺正式嘅科學論文入面,科學家好少可會話自己「證明」咗乜嘢乜嘢理論,只係會話「觀察同實驗結果撐嗰個理論」,而且佢哋重會好積極咁去揾新數據,睇吓呢啲佢哋之前未見過嘅數據會唔會推翻舊嘅理論。如果會嘅話,佢哋就會開始諗新理論,或者睇吓點樣將舊嗰個理論改吓等佢可以同新數據夾得埋。

可否證性[編輯]

內文: 可否證性

可否證性(粵拼:Ho2 fau2 zing3 sing3;Falsifiability)[6]係做科學研究一定要有嘅東東。呢個宇宙度有數唔嗮咁多嘅諗法,但係當中大半都係冇可否證性呢種特質。話一個諗法「有可否證性」嘅意思即係話呢句嘢有可能透過觀察或者實驗嚟驗證:例如「阿松左手上面有個橙」(假設我哋對「」呢個字有個明確定義)呢句嘢有可否證性,因為我哋只要用對眼望吓阿松左手上面係咪真係有個橙就可以驗證呢句嘢係真定假-喺至少有一個可能情況之下,呢句嘢會畀人證明係一個錯嘅預測。相反,一句冇可否證性嘅嘢係無論觀測結果點,都冇可能畀人否決嘅:例如一個睇相佬話「阿松今年可能會有大病」。呢句嘢查實冇可否證性-如果阿松真係有大病,個睇相佬會話佢批中咗,但係如果阿松冇大病,個睇相佬照樣會話佢批中,因為佢淨係話阿松「可能」會有大病-無論個結果係點,個睇相佬都有得話佢講啱咗,所以實際上根本就冇可能知個睇相佬係咪真係做咗個準確嘅預測。

可否證性喺科學上好緊要:如果一個理論或者假說冇可否證性嘅話,科學家冇可能透過觀察或者實驗嚟驗證睇吓佢係唔係真係啱-觀察同實驗係科學嘅根本-亦即係話佢根本就唔係科學嘅範疇,所以科學家基本上都唔會理呢啲咁嘅嘢。

例子:萬有引力定律[編輯]

萬有引力定律話是但兩舊有質量嘅物體會喺通過連心線方向上互相產生一鼓引力吸引住對方。

牛頓嘅萬有引力定律(Newton's Law of Universal Gravitation)係一個有可否證性嘅理論。佢基本上話是但兩舊有質量(Mass)嘅物體會喺通過連心線方向上互相產生一鼓引力吸引住對方。呢個引力嘅大細同佢哋嘅質量相乘成正比,同佢哋距離嘅平方成反比,同兩樣嘢嘅化學本質唔啦更。牛頓佢重提出咗一條方程式嚟計兩舊嘢之間嘅引力:

萬有引力定律同佢條方程式有可否證性:如果科學家揾到兩舊物體,佢哋之間嘅引力(一)唔係同佢哋嘅質量相乘成正比;(二)唔係同佢哋距離嘅平方成反比;或者(三)同兩樣嘢嘅化學本質有關係嘅話,我哋就可以否決呢條定律,或者最少話佢「唔係萬有」(即係宇宙入面至少有一啲嘢係唔跟呢條定律嘅)。事實上,科學家亦都有做好多嘢嚟試呢條定律:由 17 世紀開始,呢條定律就畀數以千萬計嘅科學家攞嚟計好多嘢:好似係啲物件跌落地嘅速度火箭陞空需要嘅力、或者係行星嘅運行軋道呀咁,而一路以嚟,呢條定律都做到好準確嘅預測,好經得起考驗。於是科學界就覺得呢條定律係一個好好嘅科學理論,到咗今日都重會用到。

例子:精神分析[編輯]

相比之下,弗洛伊德(Sigmund Freud)嘅精神分析(Psychoanalysis)就係一個典型嘅冇可否證性嘅理論[7]。精神分析理論話人嘅潛意識(Unconscious Mind)度有好多畀人壓抑住嘅慾望,而且重好興講話呢柞慾望可以引致精神病,但係對於點樣量度呢柞慾望同埋佢哋有幾畀人壓抑就冇乜嘢標準。例如係抑鬱症咁:精神分析話抑鬱症可以係因為人壓抑自己嘅慾望壓抑得太勁而搞出嚟嘅,但係就算個病人冇抑鬱症嘅症狀,個分析師都有得話「係因為個慾望太過壓抑,壓抑到出唔到症狀」-根本冇可能知個分析師係唔係真係做咗一個準確嘅預測。呢個理論冇提出一個方案去量度壓抑,搞到佢根本冇辦法知個病人係唔係真係壓抑咗啲慾望,冇得量度自然冇得驗證佢係咪真。所以到咗今日,心理學界基本上唔會再點理精神分析呢套理論,而會當佢係偽科學(粵拼:Ngai6 fo1 hok6;Pseudo-science)-望落好似科學,但係查實唔合科學原則嘅學說[8]

科學理論[編輯]

內文: 科學理論

科學理論(粵拼:Fo1 hok6 lei5 leon6;Scientific Theory)係科學上嘅理論。「理論」(Theory)呢個詞語喺日常用語度通常都係指緊「一啲可能有根據,但係未必真係有根據嘅講法」,好似係英國話入面就有「只係一個理論」(Is just a theory)呢句嘢,意思即係話某一個諗法只係屬於推測,未必信得過。而喺呢個廣泛嘅定義之下,好多嘢都可以算係「理論」-例如係唔同基督教派系聖經各自嘅解讀或者係「宇宙係由上帝創造嘅」呢句嘢,喺呢個定義之下都算係「理論」。「科學理論」同一般嘅理論唔同:佢哋有一套好嚴格嘅標準嚟去決定點樣驗證佢哋到底係咪真[9]

喺科學界,一個「科學理論」係指一個知識體(Body of Knowledge)-一柞描述緊某啲自然現象嘅講法-而佢係要達到以下呢啲條件:

  • 佢本身會做一啲有可否證性嘅預測;
  • 佢會同喺實驗同觀察度攞到嘅數據夾得埋;
  • 佢有嚟自唔同源頭嘅證據(Evidence)支持。
五行理論查實好有系統性,但係現代科學揾到嘅證據已經將佢否證咗。

一般嚟講,之前提咗嘅睇相唔會畀人當佢係科學理論,因為佢就連可否證性都冇。上古漢人諗出嚟嘅五行理論反而曾經係科學理論:呢個理論話世間所有現象都係由金木水火土五種氣嘅變化搞出嚟嘅;佢講到明呢五種氣有啲乜嘢特性同埋會點樣互動-即係話佢會做一啲有可否證性嘅預測。但係現代科學已經發現咗五行裏頭有好多諗頭根本就唔符合現實,例如係現代化學嘅元素週期表(Periodic Table)已經話咗畀科學家知,組成世界萬物嘅元素遠遠唔只係得五種咁少,所以五行理論達唔到「同喺觀察同實驗度攞到嘅數據相符」呢個條件,已經畀現代嘅物理學同化學取代咗。相比之下,愛因斯坦(Albert Einstein)嘅狹義相對論(Special Theory of Relativity)就係一個科學理論。呢個理論其中一個諗頭係話當一件物件郁嘅速度愈係接近光速(Speed of Light,物理學會將佢簡寫做「c」),佢嘅時間(Time)就會過得愈慢[10],呢個理論有可否證性:科學家曾經做實驗,揾個原子鐘(Atomic clock)嚟去度吓一架飛得好快嘅火箭裏面嘅時間過得有幾快,結果發現咗架火箭飛得愈快,佢入面嗰個鐘真係會行得愈慢-啲實驗數據支持個理論,而且愛因斯坦佢重諗咗一條方程式出嚟去計時間膨脹(Time Dilation)嘅幅度:

呢條式裏頭嘅 ∆t' 就係指緊企喺度唔郁嗰個觀察者會感受嘅時間(Proper Time),而且呢條式重真係準確咁計到實驗嘅結果。因為呢啲原因,狹義相對論係一個廿世紀嘅科學理論-佢喺廿世紀初由愛因斯坦提出,啲條件佢冚唪唥達到嗮。雖然係咁,未來嘅科學家遲啲有可能會揾到同呢個理論唔夾嘅實驗數據,到時就會令呢個理論畀人否決-之但係到咗廿一世紀,呢個理論都重係做到好準確嘅預測,所以目前物理學家都重當佢係一個好好嘅科學理論。

假說[編輯]

內文: 假說

假說(粵拼:Gaa2 syut3;Hypothesis,眾數係「Hypotheses」)喺科學上嘅定義係指緊一啲由科學理論嗰度衍生(Derive)出嚟,有得直接觀察,但係未經證實嘅講法[11]。每當有科學家提出新嘅理論去解釋某啲之前解釋唔到嘅現象嗰陣,科學界第一時間想做嘅嘢就係會想去揾啲方法去驗證吓個理論。佢哋會由個理論嗰度開始諗吓個理論如果係真嘅,會有啲乜嘢後件(Consequence),跟住就去設計啲實驗出嚟去驗證吓佢。例如係頭先講咗嘅時間膨脹方程式:

如果狹義相對論係啱嘅,咁佢裏頭呢條方程式應該都會係啱嘅;如果呢條式係啱嘅,咁「當一件物件郁嘅速度愈近光速,佢過嘅時間就會愈慢」呢句嘢就應該會成立-而呢句嘢有得靠直接觀察嚟驗證。成個諗嘢過程入面用咗「如果...,咁應該...」(If... then...)嘅邏輯-「如果A係真,咁B應該都係真」,既然係咁,如果發現咗B唔係真,咁A就應該唔係真。如果揾到出嚟發覺「當一件物件郁嘅速度愈近光速,佢過嘅時間就會愈慢」呢一句嘢同實驗結果唔夾嘅話,咁科學家就有理由相信狹義相對論係錯嘅。「當一件物件郁嘅速度愈近光速,佢過嘅時間就會愈慢」呢句嘢喺呢度就係一個假說:佢由狹義相對論衍生出嚟,有得用觀察驗證,但係響愛因斯坦啱啱提出狹義相對論嗰陣佢重係未經證實。到咗今日,呢個假說已經有好多實驗數據撐佢,已經唔再只係一個假說。

科學家一路都會做新嘅研究同實驗,佢哋會揾到啲舊嘅理論解釋唔到嘅現象。跟手佢哋會去諗啲新理論出嚟,再由呢啲新理論度諗一啲假說出嚟,再設計啲實驗睇吓啲假說係唔係啱-如果有數據否證咗啲假說嘅話,啲科學家就會質疑呢個理論。

每一份科學研究都一定會講好嗮自己用緊乜嘢理論同驗證緊啲乜嘢假說先至郁手做。

變數[編輯]

歐姆定律話通過一個導體嘅電流同嗰舊導體兩頭嘅電壓成正比,又同舊導體嘅電阻成反比。
內文: 變數 (科研)

變數(粵拼:Bin3 sou3;Variable),又叫做「未知數」,係科學理論同假說度一定會有嘅嘢。佢係指宇宙入面一啲有可能變、兼且係形容緊某啲事物嘅特性(Attribute) [12]。例如身高、體重、同宗教信仰呢啲特性都可以用嚟形容人,而且呢幾樣嘢個個人唔同,所以呢三個都係屬於「用嚟形容人」嘅變數。大細同質量呢啲可以攞嚟形容人或者物件都得,而且呢兩樣嘢個個人件件物件都可以唔同,所以都係屬於「形容人同物件」嘅變數。

變數大致上有得分做兩種。連續變數(Continuous Variable)係變數嘅一種,指啲有得用數字嚟量度、兼且去到小數點後幾多位都得嘅變數,而佢哋嘅值就叫做數值(粵拼:Sou3 zik6;Value),呢啲數值攞得嚟比較大細同埋做數學嘅運算。例如人有幾高有幾重都可以講係連續變數-「身高」同「體重」有得用數字嚟度(兼且可以用有小數點嘅數字)。我哋有得用呢柞數值嚟比較唔同人嘅身高同體重,重可以用佢哋嚟計數;相反,「宗教信仰」係一個唔連續嘅變數(Discrete Variable)-佢唔可以用數字嚟度,而佢嘅值一般都唔可以攞嚟計數:「183 厘米」同「80 公斤」呢啲數值有得加減乘除,而「信佛」同「信耶穌」呢啲值雖然都係形容緊啲嘢,但係唔可攞計數機去撳加減乘除。

變數係科學嘅關鍵,因為基本上科學成個目標就係要去了解宇宙咁多嘅變數之間嘅關係。例如以下呢柞科學方程式同定律都係講緊某一啲變數:

  • 牛頓萬有引力定律

呢條定律係講緊兩舊嘢之間嘅引力同佢哋嘅質量距離有乜嘢關係。條式有四個變數:引力(F)、兩舊嘢嘅質量(m1 同 m2)、同埋佢哋之間嘅距離(r)。呢四個數字都係連續變數-可以用數字嚟度同加減乘除,而物理學家同工程師亦都真係會用呢條式計好多嘢。

  • 歐姆定律(Ohm's law)

呢條係電磁學(研究電同磁嘅物理學分枝)上嘅一條常見方程式,意思係話通過一個導體(Conductor)嘅電流(Electric Current;I)同嗰舊導體兩頭嘅電壓(Voltage;V)成正比,又同舊導體嘅電阻(Resistance;R)成反比。條式總共有三個變數:電流、電壓、同電阻,而且三個都係連續變數。

  • 需求定律(Law of Demand)係一條經濟學(Economics;研究資源分配同錢銀嘅科學)上嘅定律。佢係講緊話假設其他因素唔變,當一件物品嘅價錢(Price)升,佢嘅需求量(Quantity Demanded)就會跟住跌,反之亦然;簡單啲嚟講,就係話「一樣嘢愈貴就愈少人買」。響呢條定律入面有兩個變數:「價錢」同「需求量」,而呢條定律話佢哋之間有住反比嘅關係。
喺腦入面,資訊係通過神經元(Neuron)射神經脈衝嚟傳送嘅。
  • 赫布規律(Hebbian rule)神經科學(Neuroscience;研究腦同神經系統嘅科學)嘅一條規律。佢係講喺個入面,兩個神經元(Neuron)愈係會一齊射神經脈衝(Neural impulse)佢哋就愈係會連埋一齊。呢條規律同埋佢嗰柞變種大體上有兩個變數:「兩個神經元有幾常會一齊射脈衝」,同埋「嗰兩個神經元之間嘅連結有幾強」,而呢條規律話呢兩個變數係成正比嘅。

無論係邊個學科,科學嘅重點基本上就係想揾出變數同變數之間有啲乜嘢關係,而「知道嗮成個宇宙入面所有嘅變數同埋佢哋之間嘅相互關係」可以話係科學嘅終極目標。變數嘅重要性亦都反映咗喺科研論文嘅寫作嗰度:喺寫一份科研論文嗰陣,寫嗰個科學家一般都一定要搞掂一樣嘢-講清講楚自己啲假說度有啲乜嘢變數,同埋呢柞變數係點樣定義[13]

除咗咁,喺將科學分科嗰陣,科學家可以話係靠睇嗰個學科研究緊乜嘢變數嚟分嘅:研究引力、質量、同距離嘅就係力學;電流、電壓、同電阻呢啲係電磁學嘅範疇;而價錢同需求量就係屬於經濟學呀咁。

一把尺可以用嚟度長度。有啲尺淨係度得到,而有啲尺精細啲,會度到毫米呢啲細啲嘅單位-所以唔同嘅尺佢哋嘅精確性都唔同。

量度[編輯]

內文: 量度

量度(粵拼:Loeng4 dok6;Measurement)係指緊去揾出變數嘅數值嘅一柞過桯[14]。喺做一份科研嗰陣,個科學家會先搞清楚咗用緊乜嘢理論、驗證緊乜嘢假說、同埋驗證緊嘅假說入面有邊啲變數。而佢哋落手做嗰陣就要諗點樣去量度研究緊嗰柞變數。例如係研究狹義相對論嗰陣,啲物理學家會有個假說:「當一件物件郁嘅速度愈近光速,佢過嘅時間就會愈慢」;呢個假說有兩個變數-一件物件嘅速度同埋佢過嘅時間,而要驗證呢個假說就要一定揾出嗰件物件嘅速度同時間嘅數值,然後再計吓佢哋之間係咪真係「郁嘅速度愈近光速,過嘅時間就愈慢」。一件物件嘅速度可以用第三者嘅肉眼觀測嚟度,而嗰件物件嘅時間可以用原子鐘呢類架生去度。

每一個變數都有得用唔同嘅方法去量度,而唔同方法嘅可靠性(Reliability;指嗰個方法度出嚟嘅數值有幾前後一致)同精確性(Precision;指嗰個方法度出嚟嘅數值有幾接近真實數值)都唔同。好似係響量度「時間」嗰陣,可以用沙漏或者係原子鐘去度;前者嘅設計原始啲,而且因為要靠對肉眼睇有幾多沙落咗下格,而人眼又畀好多外在因素影響,所以次次度出嚟嗰個數值都唔多同-可靠性會低啲。度長度嗰陣可以用間尺去度,但係間尺有好多唔同款-有啲淨係度得到厘米(Centimeter),但係有啲有埋毫米(Millimeter),後者嘅精確性會高啲。

量度變數嘅方法喺科學入面係一個幾受關注嘅議題。好多時科學上嘅重大發現都係靠發明啲新嘅量度方法先至做到嘅,而且科學家喺討論一份科研論文嗰陣好多時都會喺度詏嗰份研究用嗰啲量度方法夠唔夠可靠同精確。

實驗[編輯]

台灣一間醫學實驗室
內文: 實驗

實驗(粵拼:Sak6 jim6;Experiment)喺科學上攞數據嘅一種方法,指緊一啲用嚟驗證某啲假說、牽涉到操控(Manipulate)某啲變數嘅程序[15][16]。響做實驗嗰陣,科學家會操控獨立性變數(Independent Variable)-亦係用人工嘅方法改變嗰啲變數嘅數值-再睇吓咁樣會點影響到依賴性變數(Dependent Variable)嘅數值。例如係驗證時間膨脹方程式呢條假說嗰陣,物理學家可以咁樣做實驗:佢哋可以擺個原子鐘喺架好勁嘅火箭裏面,開大架火箭嘅引擎,令佢飛得好快,飛完一輪之後再攞佢裏面嗰個原子鐘同一個喺地球表面唔郁嘅原子鐘比較吓,睇吓前者係咪真係會行得慢咗。喺呢個實驗入面,「架火箭嘅速度」就係一個獨立性變數(一個畀科學家人工咁操咗嘅變數),而個原子鐘所量度嘅「架火箭過咗嘅時間」就係一個依賴性變數(科學家淨係量度咗呢個變數,冇直接咁操控佢嘅數值)。透過睇吓架火箭嘅速度係咪真係會影響到佢裏面過咗嘅時間,物理學家就有得驗證時間膨脹方程式呢條假說。

科學家做實驗通常都會喺實驗室(Laboratory;廣東話日常用語興嗌做「Lep1[17])嗰度做。「實驗室」係指一間專門用嚟做實驗嘅房,入面會有好多專係攞嚟做實驗嘅架生。因為用嘅架生個個學科都唔同,所以會有「醫學實驗室」、「化學實驗室」、或者「心理學實驗室」呢類再專門啲嘅實驗室。

觀察[編輯]

「D」曲線就係需求曲線(Demand Curve);「P」係指價錢(Price);「Q」係指數量(Quantity)。
內文: 觀察

觀察(粵拼:Gun1 caat3;Observation)係另一種攞數據嘅主要方法,指緊一啲用嚟驗證某啲假說、但係唔牽涉到操控任何變數嘅程序。做觀察嗰陣,科學家會量度啲變數嘅數值,再睇吓佢哋之間嘅關係係咪同假說所講嘅一致。佢哋唔會特登去改變任何變數嘅數值。例如係經濟學家驗證需求定律(Law of Demand)嗰陣,佢哋好難直接控制市場上嗰啲商品嘅價錢,但係佢哋可以隨機(Randomly)抽幾樣商品出嚟睇,將每樣商品嘅價錢同相應嘅需求量畫落幅圖表(Graph)度,計吓統計睇吓呢兩個變數-價錢同需求量-係咪真係成反比,係嘅話就可以話啲數據撐需求定律。成個過程入面啲經濟學家冇操控任何變數,只係量度咗佢哋嘅數值,所以佢哋做緊嘅係一個觀察,唔係實驗。

同自然科學比起上嚟,社會科學成日會用觀察。

奥坎剃刀[編輯]

內文: 奥坎剃刀

次次學界發現親啲乜嘢前所未見嘅自然現象,相關學科嘅科學家就會各自咁諗柞理論出嚟去解釋佢。而當有成柞理論都係喺度嘗試緊解釋同一柞現象嗰陣時,啲科學家就焗住要揀返個最好嘅理論。於是乎科學家就諗咗一啲準則出嚟去決定一個理論點樣先至為止好,而奥坎剃刀(粵拼:Ou3 ham2 tai3 dou1;Occam's Razor;又叫做簡潔度,英文係「Parsimony 」)[18][19]就係其中一個最出名嘅。呢條原則查實就好簡單:假設其他因素唔變,科學家會比較鍾意用簡潔啲嘅理論;即係話如果有兩個科學理論都係解釋緊同一柞現象,而佢哋嘅證據強度一樣咁勁嘅話,科學家一般都會揀用變數少啲嗰個理論。呢個一方面係因為西人自古以嚟就覺得「優雅」(Elegance)就係「用最少嘅氣力做最多嘅嘢」-呢點喺佢哋嘅藝術方面都睇得到。而另一方面,呢條準則亦都同可否證性有啦掕[20]:當一個理論牽涉到愈多嘅變數,驗證佢嗰陣就愈難控制嗮所有嘅變數,而呢點令到用佢嘅科學家容易揾到啲事後孔明嘅解法去為自己個理論辯護-間接令到佢更加難驗證。

科學方法[編輯]

用科學方法揾知識嘅成個過程
內文: 科學方法

科學方法(粵拼:Fo1 hok6 fong1 faat3;Scientific Method)係根據頭先講咗嗰柞概念嚟追求知識嘅過程[21][22]。佢本身係一個循環性嘅過程-科學家會係咁重複呢個程序嚟豐富人類知識,因為次次揾到新嘅知識之後,好多時即刻又會有新嘅謎團;好似係牛頓萬有引力定律咁,當啲物理學家發現咗佢哋觀察到嘅嘢都係跟住呢條定律之後,佢哋又要開始去諗「萬有引力係點嚟」呢條新問題同做新實驗嚟揾答案。於是乎,人類喺知識上就不斷咁有進步同發現新嘢。

科學方法有以下幾個步驟:

  • 喺日常生活嗰度觀察吓研究緊嘅自然現象;
  • 諗諗呢啲現象而家有嘅理論解唔解釋得到;
  • 如果唔得,就要諗吓有冇啲乜嘢新嘅定律有可能解釋到呢柞現象;
  • 基於諗出嚟嘅新定律,諗一啲有得驗證嘅假說出嚟;
  • 做實驗或者有系統性嘅觀察嚟睇吓嗰柞假說係咪啱;
  • 如果數據撐條新定律嘅話,就將呢個新發現夾入去現有嘅理論入面,形成一個解釋能力更勁嘅新理論;
  • 如果數據唔撐條新定律嘅話,就重新諗過;
  • 重複上面嘅步驟。

詏緊嘅嘢[編輯]

雖然話就話科學家對於科學哲學係啲乜已經有大致上嘅共識,但係現代嘅科學哲學家(Philosopher of Science)-即係專門研究科學哲學嘅學者-重係會喺度詏一啲嘢。例如係奧地利出世嘅科學哲學家 Paul Feyerabend 就提出咗個觀點,主張科學界唔應該硬性規定科學家要跟足某啲方法學(Methodology;傾研究方法嘅學說),認為咁樣會限制咗科學家諗嘢嘅自由度-佢覺得科學界應該要接受方法學上一定程度嘅非統治主義(Anarchism)[23]。有唔少科學家都唔認同佢呢個諗法,認為科學界應該要有一套既定嘅方法學要求所有科學家都跟。

科學家重搞咗啲好似係 Philosophy of Science 呢類嘅期刊,定時定侯寫論文嚟研究同討論科學哲學。

科學界[編輯]

美國嘅麻省理工學院畀人公認咗係世界上做科研最叻嘅大學之一。
內文: 科學界

科學界(粵拼:Fo1 hok6 gaai3;Scientific Community)包含嗮世界上數以百萬計嘅科研人員。喺科學家方面,世界各地嘅大學同埋科研機構都會招收啲叻嘅人做博士(Doctor of Philosophy;簡稱「PhD」)學生,會喺博士課程度教佢哋點樣跟住頭先講咗嗰柞科學哲學同方法去尋求新知識。啲博士學生做到嘢、畢到業嘅話就有得成為科學家。響世界各地嘅大學、研究所、或者係私營科研機構都會請科學家去搞科研。啲科學家做完研究之後會將自己嗰啲結果(Result)同攞到嘅數據(Data)用科研論文嘅形式發表,等其他同學科嘅科學家有得交流或者試吓將啲結果重覆驗證(Replicate)。創新同有突破性嘅發現會刊登喺啲有料到嘅學術期刊(Academic Journal)嗰度,而一個科學家有冇本事喺啲勁嘅期刊度登佢啲論文亦係佢有冇得升職加人工嘅重要指標。除咗科學家之外,科研人員亦都包括咗好多好似係研究助理(Research Assistant)呢類嘅人員-佢哋通常冇博士學位,但係識少少有關科研嘅嘢,所以就打工喺實驗室或者大學度幫手執頭執尾。

除咗咁,科學界亦都係一個財力好雄厚嘅集團:全世界嘅政府都會幾億幾億咁揼錢落去自己區入面嘅大學嗰度搞科研;研究資金多嘅地區(好似係美國)多數會吸引到多啲有才華嘅科學家去做科研,亦都會出到多啲有影響力嘅研究。

分科[編輯]

內文: 科學分枝

一般嚟講,大學會將科學分做兩大類[24]:研究人以外嘅大自然嘅自然科學(Natural Science)同埋研究人類同社會嘅社會科學(Social Science)。佢哋都係跟住嗰套科學哲學同方法做研究嘅,但係因為社會科學研究嘅係人類,所以喺用嘅研究方法方面就擇使啲。社會科學冇得好似自然科學咁樣自由咁操控佢哋嘅研究對象(人類),會畀專業操守限住:例如係生物學家大可以啲細菌種完之後就攞去銷毀,但係心理學家冇得將啲人做完研究就攞去銷毀,而且後者攞數據嗰陣又要考慮個人私隱嘅問題(原子或者細菌唔會同人講私隱,但係人會),所以好多時冇辦法好似自然科學咁話攞乜數據就攞乜數據。

自然科學重可以細分做物理科學(Physical Science)同生命科學(Life Science)兩大門:前者研究啲原子或者係星球呢類冇生命嘅嘢,後者就研究細菌同植物呢類有生命嘅嘢。社會科學就有得細分做個體層面同社會層面嘅學科,前者研究個人(尤其係心理學),後者研究經濟體或者政府呢類嘅群體。自然科學同社會科學中間重有好似係神經科學呢類學科-神經科學研究嘅係神經系統,神經科學家(Neuroscientist)好多時會研究動物嘅神經系統,但係又會研究人嘅腦,算係夾咗喺自然科學同社會科學之間[25]。自然科學同社會科學嘅主要學科有:

自然科學[編輯]

  • 物理科學
    • 物理(Physics;專門研究物質、能量、同埋佢哋喺時間空間入面嘅郁動[26]
      • 力學(Mechanics;研究力)
      • 熱力學(Thermodynamics;研究熱能)
      • 電磁學(Electromagnetism;研究電同磁)
    • 化學(Chemistry;專門研究物質嘅成份、結構、同變化[27]
      • 無機化學(Inorganic Chemistry;研究無機化學物)
      • 有機化學(Organic Chemistry;研究有機化學物)
    • 地球科學(Earth Science;專門研究地球嘅環境)
    • 天文學(Astronomy;專門研究天體嘅物理運動同化學性質)
    • 宇宙學(Cosmology;專門研究宇宙嘅起源、演進、同最終命運[28]
  • 生命科學
    • 生物學(Biology;研究生命嘅結構同演化)
      • 遺傳學(Genetics;研究遺傳基因)
      • 植物學(Botany;研究植物)
      • 動物學(Zoology;研究動物)
      • 古生物學(Paleontology;研究啲絕咗種嘅遠古生物)
      • 神經科學(Neuroscience;研究神經系統,同社會科學好有啦掕)

社會科學[編輯]

  • 心理學(Psychology;研究人類行為)
  • 語言學(Linguistics;研究人類語言)
  • 社會學(Sociology;研究社會嘅秩序同一般法則)
  • 經濟學(Economics;研究人點樣生產、分配、同消費有限嘅資源)
  • 政治學(Political Science;研究政治行為同政治體制)
  • 考古學(Archaeology;通過發掘同調查古人嘅遺跡遺物同文獻嚟研究古代社會;有時會畀人當係人文學科)

形式科學[編輯]

除咗呢柞學科,數學(Mathematics)同埋邏輯學(Logic)呢柞靠演繹推理(Deductive Reasoning)獲取知識嘅學科亦都係同科學好有關係嘅,幾乎所有科學家或多或少都會掂吓呢啲學科。好似係數學咁,佢用演繹推理,主題係數量、結構、同空間,同頭先講咗嗰柞科學學科一樣咁嚴格;佢揾新知識嘅方法同一般科學完全唔同,之但係科學又唔可以冇咗數學-數學成日引發科學上嘅重大突破,而科學嘅過程裏面都無可避免要用到數學。於是為咗分清楚,數學同埋邏輯呢柞學科畀學界嗌做形式科學(Formal Science)[29],而頭先提咗、用實驗同觀察嘅科學學科就會畀人嗌做實證科學(Empirical Science)。

應用科學[編輯]

除咗咁之外,上面講到嘅科學學科有時會畀學界叫做純科學(Pure Science),意思係佢哋純粹係為咗追求知識而存在。相對之下,有一啲學科就會畀學界嗌做應用科學(Applied Science)-指一啲專係為咗將科學知識用喺實際用途上面而存在嘅學科,當中最出位嘅要數各門嘅工程學(Engineering)同埋醫學(Medicine)。好似係醫學咁,醫學家會留意化學界同生物學界有啲乜嘢新發現,用呢啲發現去發明新嘅醫療技術,再做實驗嚟睇吓呢啲新技術係咪真係得-即係用科學方法去探索點樣將純科學上嘅發現用喺實際用途嗰度,所以畀人叫做「應用」科學。

科學文獻[編輯]

內文: 科學文獻

科學文獻(粵拼:Fo1 hok6 man4 hin3;Scientific Literature)係指科研人員寫嘅一柞有關科學嘅文獻,包含咗做完實驗同觀察之後寫嘅報告同埋純理論性討論嘅文章。通常科研人員會就咁嗌佢哋做「文獻」(Literature)。科研人員喺每次做新研究之前都一定會讀一讀同自己個研究題目有關嘅近期文獻,睇吓同學科嘅科研人員近排做咗啲乜同埋有冇乜嘢新發現或者理論-咁樣做一嚟係要攞靈感,二嚟係要費事自己嘥時間走去做一啲人哋已經做咗嘅嘢。為咗方便科研人員摷文獻嚟睇,科學界重經營咗啲好似係 Web of Science(直譯:科學網)呢類嘅搜尋器(Search Engine)。

科學史[編輯]

公元前 9000 年前未有文字,但係嗰時中美洲嘅人有足夠嘅植物學知識去馴養粟米。
內文: 科學史

上古時代(發明文字之前嘅時期)嗰陣已經有實踐性質嘅科學[30]。嗰時嘅人類已經會整啲發明品嚟幫助自己嘅生活,好似係石器時代(Stone Age)嘅人咁:佢哋識整石器同埋諗方法改良啲石器,雖然因為冇文字搞到佢哋嗰啲有關石器嘅知識只係有得口耳相傳,但係嗰啲查實已經算得上係原始嘅工程學;一個零舍出名嘅例子係中美洲嗰頭嘅人,佢哋喺公元前 9000 年嗰陣已經將粟米馴養(Domesticate)咗,用咗一啲基礎嘅植物學知識[31]。再打後少少,有好幾個古文明-例如係古埃及、古印度、古華夏古典時代歐洲、同兩河流域文明(包埋波斯)-都識得一啲科學知識:好似係用啲簡單嘅方法觀察天體嘅運行同整歷法、用文獻記載一啲基本嘅生理知識、又或者係觀察同紀錄自己周圍啲動植物[32]。雖然係咁,嗰時啲人未有乜嘢嚴格嘅科學可言-冇文獻顯示佢哋會走去傾歸納或者係可否證性呢啲科學哲學嘅概念,所以可以話係冇科學性嘅思考呢回事。

古希臘[編輯]

學者一般都認為科學哲學嘅開端係喺公元前嘅古希臘(Ancient Greece)[33]。嗰陣時啲希臘人好興傾哲學同埋知識方面嘅話題,當中公元前五世紀嘅蘇格拉底(Socrates)就有喺度試緊用哲學方法理解人同政治,又有批判嗰時啲研究大自然啲學者唔夠實證,後嚟重因為佢唔肯接受嗰時希臘人用希臘眾神解釋自然現象嘅做法,畀人當係異端份子(Heretic)處死[34]。再打後少少,喺公元前四世紀,都係好出名嘅哲學家柏拉圖(Plato)同阿里士多德(Aristotle)就有喺度講點樣將人嘅諗嘢方法分類-當中佢哋提咗歸納(Inductive Reasoning)同演繹推理(Deductive Reasoning),同埋有傾兩者之間有乜嘢分別,可以話係歷史上第一次有人喺度傾科學哲學嘅概念。雖然係咁,阿里士多德佢接受少少用人做中心解釋宇宙嘅理論(客觀嘅科學應該係唔用任何人或物做中心嘅),而且又睇重用純理論性分析去了解大自然-唔會點講用實驗同觀察攞數據,所以嗰時嘅科學哲學淨係得個初形,重係未有乜嘢實證科學出現。

科學哲學嘅始祖
柏拉圖嘅頭像 
阿里士多德嘅頭像 
蘇格拉底冇傾到科學哲學嘅概念,但係有用科學方法。 
13 世紀巴格達一間圖書館嘅一班學者;嗰時阿拉伯喺各方面都正係處於一個黃金時代

中世紀[編輯]

中世紀(Middle Age;大約係 5 至 15 世之間嗰段時間)嘅時候,世界各個地區都見到科學上嘅發展,當中好出名嘅有阿拉伯阿拔斯帝國(Abbasid Caliphate)喺 8 世紀左右響巴格達(Baghdad)建立嘅組織-智慧宮(House of Wisdom)[35];智慧宮嘅學者繼承咗古希臘哲學家嘅思想,用實驗方法收集數據嚟研究天文、醫學、化學、同煉金術(Alchemy)等各方面嘅知識。打後法蒂瑪王朝(Fatimid Caliphate)又出咗阿拉伯人學者海什木(Ibn al-Haytham;公元 965 年生 1040 年死),佢用咗實驗嘅方法嚟研究反射(Reflection)同折射(Refraction),得到相當正面嘅評價,畀人覺得早期實證科學嘅代表之一。後嚟畀海什木影響咗,13 世紀嘅英格蘭人學者 Roger Bacon 寫咗好幾本書講光學同語言學等嘅學問,又提倡用實證嘅方法嚟追求知識,令到歐洲嘅實證科學成咗形[36]。喺中世紀後橛,歐洲嘅大學由結合天主教神學同阿里士多德思想嘅經院哲學(Scholasticism)主導。喺呢個時代,亞巴郎諸教(Abrahamic Religions)文明-歐洲同伊斯蘭世界-已經搞實驗科學搞得好犀利-雖然呢個時期嘅科學好多時重係畀宗教限住,例如係當時啲科學家間唔鐘就會因為討論科學嗰陣講錯嘢,得罪啲神職人員而有麻煩。

一架指南車

都係屬於中世紀嘅趙宋皇朝喺各方面嘅科學度都有唔錯嘅發展[37]。大宋嘅漢人發明咗火藥,重利用呢樣發明品整咗一啲原始嘅鎗同大炮出嚟。除咗咁,佢哋發明咗指南車活版印刷,又喺數學上改進咗好多嘢,畀人覺得係華夏文明歷史上最識搞科技嘅皇朝。同西人唔同嘅係,宋人嘅科學以實用為主,好似光學或者科學哲學呢啲冇乜實際用途嘅理論性探究會少啲,但係佢哋嗰啲科技重係吸引到唔少人喺西面走嚟交流。後嚟南宋皇朝喺 13 世紀尾畀蒙古人打冧,令到中世紀華夏文明嘅科學發展停滯咗一排。

趙宋皇朝嘅科技發展主要係喺中原嗰頭:嗰陣時嶺南呢頭重未完全漢化南越人嘅文化冇咁先進,唔似得閩越人咁曉造船[38],搞到粵人嘅祖先響科學上稍為落後啲,冇出到咁多有料到嘅學者或者技術。雖然係咁,嗰時嘅粵廣地區學咗啲大唐同大宋嘅先進漢文化,又有搞啲工藝,所以喺科技上開始萌芽[39]

同期嘅印度文明亦都有出到啲有朵嘅科學家。

伽利略嘅畫像;佢畀好多人覺得佢係現代科學之父。

文藝復興[編輯]

文藝復興(Renaissance;1300 年至 1700 年)係歐洲一個黃金時代,嗰時嘅歐洲人開始重新研究古羅馬同古希臘留落嚟啲文化遺產,令到佢哋喺藝術同思想方面有好多躍進。當中 16 至 17 世紀嘅意大利物理、天文學家伽利略(Galileo)[40]最出位:佢用咗數學嘅概念嚟表達物理學嘅定律-呢樣嘢喺嗰時好新穎,因為佢之前嗰啲自然哲學家多數都淨係會用文字嚟寫科學定律,而好少可用精確嘅數學方程式表達。伽利略做咗好多創新嘅實驗,甚至重夠薑挑戰當時羅馬教廷認定嘅地心說(Geocentrism;話地球係宇宙中心嘅學說),最後搞到教廷唔妥佢,拉咗佢去審同軟禁,成為咗一個「因為唔服從當權者而受迫害嘅科學家」嘅典型例子。同時期嘅北歐開始大量咁用活版印刷,出版咗好多講挑戰「正統思想」嘅書。16 世紀嘅法國哲學家笛卡兒(René Descartes)畀伽利略影響咗,提倡用數學理解大自然,又發明咗用座標嚟計幾何;同期嘅英國哲學家培根(Francis Bacon)寫咗好幾本有影響力嘅著作,主張自然哲學(嗰陣啲西人重係咁樣嗌科學)應該係用實證做主導,又批判咗阿里士多德嘅思想,宣揚一種以「描述自然定律」為核心嘅科學方法。現代科學喺呢個時期成咗形。

呢個時期嘅嶺南地區已經差唔多漢化嗮,做咗大明皇朝嘅主要對外港口。粵人(嗰時現代廣東話已經成咗形)發展咗好多有睇頭嘅工藝技術,會將佢哋啲工藝品(例如係廣彩)賣畀西歐人[41],而且重因為同西歐人交流得多,出咗啲有西歐味道嘅思想流派,好似係嶺南學派咁,就會主張用「質疑」嘅方法嚟求學問。總體嚟講,呢個時期嘅嶺南同其他東方嘅社會一樣,喺純科學方面冇乜話重要影響力,但係喺科技上係做到啲嘢出嚟。

啟蒙時期[編輯]

喺 17 至 18 世紀,歐洲正係處於啟蒙時期(Age of Enlightenment)-畀笛卡兒同培根啟發咗,歐洲響自然哲學上開始進步得好勁,西歐諸國同俄羅斯成為咗橫掃成個世界嘅強國。英國物理學家牛頓(Isaac Newton)同德國數學家萊布尼茲(Gottfried Leibniz)改革咗數學同物理學,形成咗今日嗌嘅經典力學(Classical Mechanics)。後者諗咗微積分(Calculus)同能量(Energy)呢啲概念出嚟-兩樣都係自然哲學上嘅大突破;萊布尼茲重改咗吓自然哲學上用嘅字眼,唔再用啲帶有目的論(Teleology;指一啲假設宇宙所有嘢都有目的嘅學說)嘅字眼嚟寫自然哲學嘢,令到現代科學更加客觀咗。最後,西人就係響呢個時期開始用「Science」呢個字嚟稱呼研究大自然嘅學問。

摩登時代[編輯]

達爾文嘅物競天擇理論改革咗成個生物學界。

自從喺 19 世紀頭開始,各門嘅自然科學就喺度起勢咁發展。歐美地區喺呢個時期出咗好多個有突破性嘅科學理論-好似係達爾文(Charles Darwin)提出嘅物競天擇(Natural Selection)、熱力學定律(Laws of Thermodynamics)、電磁理論(Electromagnetic Theory)、同埋原子理論(Atomic Theory)呀咁。呢柞理論係現代科技嘅基礎-好多現代嘅科技都係要靠佢哋先至整到出嚟,例如係同醫學好有關係嘅細菌研究就成日都會用到物競天擇理論[42]。除咗咁,19 世紀早期重係社會科學嘅開端[43]

響同一時間,遠東地區搞科學亦都搞得有啲睇頭:日本出咗好幾個好似係野口英世(平假名:のぐち ひでよ)咁嘅大科學家,成為咗廿至廿一世紀世界上科學方面最標青嘅國家之一;同期嘅香港亦都開咗好幾間大學搞科研,出咗啲好似係高錕陳易希咁喺科學上有重大成就嘅科學家,前者重攞埋諾貝爾物理學獎,而到咗廿一世紀,香港嘅科研喺國際上都係處於算係比較前列嘅位置;中國大陸嘅嶺南地區冇香港咁先進,但係廣東嘅大學-尤其係廣州嗰頭嗰啲-喺科研上水平都唔低[44]

廿一世紀人類嘅科學進步得愈嚟愈快,有人話科技奇異點(Technological Singularity)就快到[45]

睇埋[編輯]

出面網頁[編輯]

[編輯]

  1. The Branches of Science
  2. Online Etymology Dictionary - Science
  3. Philosophy; note meaning 5
  4. Heilbron, J. L. (Ed.) (2003). The Oxford Companion to the History of Modern Science. New York: Oxford University Press. ISBN 0-19-511229-6.
  5. Deductive and Inductive Arguments
  6. Karl Popper's Basic Scientific Principle
  7. 佛洛伊德︰你總是想幹你娘
  8. Cioffi, F. (1970). Freud and the idea of a pseudo-science. Explanation in the behavioural sciences, 508-515.
  9. National Academy of Sciences (2008), Science, Evolution, and Creationism.
  10. Tipler, P., & Llewellyn, R. (2002). Modern Physics, 4th Ed. Germany: W. H. Freeman & Co. ISBN 0-7167-4345-0
  11. Hempel, C. G. (1966). Philosophy of natural science. Pearson: Prentice Hall.
  12. Michell, J. (1993). The origins of the representational theory of measurement: Helmholtz, Hölder, and Russell. Studies in History and Philosophy of Science, 24, 185-206.
  13. 11 steps to structuring a science paper editors will take seriously
  14. Pedhazur, E. J., Schmelkin, L. P. (1991). Measurement, Design, and Analysis: An Integrated Approach, 1st Ed. Hillsdale, NJ: Lawrence Erlbaum Associates.
  15. Cooperstock, F. I. (2009). General relativistic dynamics: extending Einstein's legacy throughout the universe. Singapore: World Scientific.
  16. Griffith, W. T. (2001). The physics of everyday phenomena: a conceptual introduction to physics, 3rd Ed. Boston: McGraw-Hill. Page 3-4.
  17. 有無人覺得做LAB好high class
  18. Domingos, P. (1999). The role of Occam's razor in knowledge discovery. Data mining and knowledge discovery, 3(4), 409-425.
  19. 奧坎剃刀 Occam's Razor
  20. The Logic of Scientific Discovery
  21. Steps of the Scientific Method
  22. Anderson, P. F. (1983). Marketing, scientific progress, and scientific method. The Journal of Marketing, 18-31.
  23. Feyerabend, P. (1975). Against method: Outline of an anarchistic theory of knowledge (Vol. 156). London: New Left Books.
  24. The Branches of Science
  25. Bovet, É., Kraus, C., Panese, F., Pidoux, V., & Stücklin, N. (2013). Neuroscience examined by the clinical and the social science. Revue d'anthropologie des connaissances, 7(3), a-n.
  26. American Institute of Physics
  27. What is Chemistry?
  28. What Is Cosmology? Definition & History
  29. Formal Sciences
  30. Lindberg, D. C. (2010). The beginnings of Western science: The European scientific tradition in philosophical, religious, and institutional context, prehistory to AD 1450. University of Chicago Press.
  31. Matsuoka, Y., Vigouroux, Y., Goodman, M. M., Sanchez, J., Buckler, E., & Doebley, J. (2002). A single domestication for maize shown by multilocus microsatellite genotyping. Proceedings of the National Academy of Sciences, 99(9), 6080-6084.
  32. Needham, J., Wang, L., & Lu, G. D. (1963). Science and civilisation in China (Vol. 5, p. 301). Cambridge: Cambridge University Press.
  33. Flannery, K. L. (1991). Aristotle: Prior Analytics. Ancient Philosophy, 11(1), 187-193.
  34. Compton, T. (1990). The trial of the satirist: poetic Vitae (Aesop, Archilochus, Homer) as background for Plato's Apology. The American Journal of Philology, 111(3), 330-347.
  35. "Bayt al-Hikmah". Encyclopædia Britannica. Retrieved November 3, 2016.
  36. Lindberg, D. C. (Ed.). (1980). Science in the middle ages. University of Chicago Press.
  37. Needham, J., & Yates, R. D. (1994). Science and Civilisation in China–Vol 5: Chemistry and Chemical Technology, Part 6: Military Technology: Missiles and Sieges.
  38. 《漢書 · 嚴助傳》:「(閩)越方外之地,斷髮紋身之民也,以處溪谷之間,篁竹之中,習於水斗,便於用舟。」
  39. 越人底色+移民-广府源流
  40. Brecht, B. (2015). Life of Galileo. London: Bloomsbury Publishing.
  41. 《挖趣》在美國收藏廣彩瓷器
  42. Dykhuizen, D. E. (1990). Experimental studies of natural selection in bacteria. Annual Review of Ecology and Systematics, 21(1), 373-398.
  43. Thompson, W. (1824). An Inquiry Into the Principles of the Distribution of Wealth Most Conducive to Humane Happiness Applied to the Newly Proposed System of Voluntary Equality of Wealth. London: Longman.
  44. 2016廣東省大學排名
  45. Vinge, V. (1993). The coming technological singularity. Whole Earth Review, 81, 88-95.

參考[編輯]

  • Hagstrom, W. O. (1965). The scientific community. New York: Basic books.
  • Kevles, D. J. (1995). The physicists: The history of a scientific community in modern America. Harvard University Press.
  • Papineau, D. (1996). Philosophy of science (pp. 286-316). New Jersey: Blackwell Publishing Ltd.
  • Popper, K. (2002) The Logic of Scientific Discovery, 2nd Edition. UK: Routledge Classics, ISBN-10 8130908115.(原版喺 1959 年出)
  • Gribbin, J. (2003). Science: A history. London: Penguin UK.
  • Shanahan, M. (2015). The Technological Singularity. MIT Press.