秦錦釗

秦錦釗，香港商人，前建萊集團主席，曾經有豪宅大王之稱，之後因為串謀銀行高層偽造信用狀而入獄。

早年生涯

秦錦釗喺中國出世，中學畢業後被派往農村耕田，79年偷渡去咗港，1983年同朋友喺內地合資經營工程機械廠，賺取第一桶金。

1989年，佢趁住六四事件買賣大埔康樂園同元朗錦綉花園獲利。去到1996年，佢又狂掃山頂豪宅，曾坐擁300個市值共40億元嘅豪宅，被冠以「豪宅大王」嘅稱號。

投資失敗、入獄經過

不過，去到1998年嘅亞洲金融風暴，佢將大批物業抵押銀行融資，但因為多項物業交易撻定而被追討損失。去到2001年，佢被廉政公署拘捕，之後被控涉嫌串謀銀行高層偽造2.2億元信用狀。去到2004年，佢被判罪名成立，被判入獄六年半，之後上訴獲減刑至五年半。

佢嘅案件後來被改編為電視劇集《廉政行動2007》嘅其中一集，但係播出前，佢入稟高等法院控告金融管理局，指金管局高層曾經作失實陳述。本來1996年至1998年間， 當時嘅新華銀行（之後併入中銀香港）願意提高建萊集團嘅信貸額度，但就係因為金管局搞到新華銀行凍結批出嘅貸款額度，導致其公司周轉不靈以致倒閉，要求以億元計賠償，而之後新華銀行成立嘅專責小組調查建萊之後，亦無發現建萊嘅貸款有違規。佢嘅法律行動，亦令廉政公署一度考慮將呢集停播。

被控告洗黑錢

佢亦曾經被指喺2010年1月至2012年1月期間，涉嫌同人洗黑錢近32億元，2019年經審訊後獲判無罪釋放。