穿梭巴士

香港嘅機場快綫穿梭巴士

喺加拿大嘅多倫多，輕鐵停駛期間，輕鐵會變接駁巴士

被加拿大聯邦政府叫佢做穿梭巴士嘅賈斯帕公車局正常巴士服務

穿梭巴士（英文：shuttle bus，簡稱 shuttle），又稱接駁巴士，國語又叫擺渡車、穿巴、接駁車，係巴士服務嘅一種；概念上係指不斷往返一段短路程嘅巴士服務，通常即係定點穿梭往來兩度地方（即係好似織梭咁行法），但係亦可以多過兩度地方都得。

服務形式

一般正常情況

一般嚟講，穿梭巴士都係指條路綫係接駁一啲地標，例如機場、酒店、碼頭、海關口岸、關閘、鐵路車站、巴士站、旅遊景點、展覽會場、商場、寫字樓、屋村、工廠、醫院等等。當中有啲係活動組織者租賃包車，例如賭場、地產展銷會、嘉年華會場、體育賽事等；有啲係由巴士公司承包，亦有啲係外判畀專線小巴經營。呢啲穿梭服務通常都一係免費，一係好平，或者收取一個象徵式收費嘅非牟利服務，目的係增值，服務街坊、方便學生、員工福利、吸引遊客人流等。

臨時替代服務

穿梭巴士亦可以指一啲臨時代替某種正式公共交通服務嘅嘢。例如，喺加拿大嘅多倫多，當例如地鐵停駛嗰陣（例如因為壞咗車、發生咗意外，警察要查案等等），暫時代替佢嘅臨時服務喺當地係叫接駁巴士，而呢啲巴士嘅路程其實可以好長（例如代替成條地鐵綫嘅話，就係成條地鐵綫咁長），乘客亦係畀正常車費，只係鐵路變咗巴士。

正式公共交通

另外，喺某啲地方，政府提供嘅巴士服務，可能因為原意係用嚟接駁一啲地標，可能喺初期會畀人話或者自己話係穿梭巴士。例如加拿大賈斯帕嘅正式巴士服務，就被聯邦政府叫咗做穿梭巴士，不過乘客一樣要畀錢，路綫亦唔係全年固定。